1A bale ka moce kei ira na nona qase o Josefati, ka bulu kei ira ena koro i Tevita. A lewa o Jiorami na luvena me kena i sosomi.
2A sa tiko eso na taci Jiorami, o iratou na luve i Josefati na tui Juta: o Asaraia, o Jieli, o Sakaraia, o Asaraia, o Maikeli vata kei Sefataia.
3A sa solia vei iratou o tamadratou na i solisoli levu, na siliva na koula, na ka talei eso, kei na veikoro lalai eso e Juta; ia a solia ga na matanitu vei Jiorami baleta ni sa nona ulumatua.
4Ni sa cabeta cake na i tikotiko vakatui o Jiorami ka sa vakataudeitaki kina, a qai vakamatei iratou kece na tacina ena i seleiwau, kei na so talega na vakailesilesi e Isireli.
5A sa yabaki 32 o Jiorami ni sa buli me tui, ka a veiliutaki voli vakatui e Jerusalemi me yabaki walu.
6A sa muria ga na nodra i valavala ca na tui Isireli o koya, me vaka era a kitaka na mataqali i Eapi; ni a watina na luve i Eapi. A sa dau vakayacora na i valavala ca o koya ena mata i Jiova.
71Tui 11.36Ia sa sega ga ni vakarusa na mataqali i Tevita o Jiova ena vuku ni nodrau veiyalayalati kei Tevita, me vaka ni a yalataka me solia vua e dua na cina, vei ira talega na luvena ka tawa mudu.
8 Vteki 27.40 A vuki tani o ira na kai Itomi ena nona gauna, me ra kakua ni qali vei ira na Juta, era a bulia vakai ira ga e dua na nodra tui.
9A lako yani o Jiorami kei ira na nona turaganivalu, na nona qiqinivalu kecega; a tucake ena bogi, ka ravuti ira na kai Itomi era a vakavolivoliti koya kei ira na turaga ni nona qiqi ni valu.
10Era a vuki tani na kai Itomi me ra kakua ni qali vei ira na Juta ka yacova na siga edaidai. Ena gauna vata o ya, a vuki tani talega kina o Lipina me kakua ni qali vua, ni a biuti koya o Jiova na Kalou ni nodra qase.
11A cakava talega na veitikina cecere ena vanua veidelana e Juta, ka vakauqeti ira na kai Jerusalemi me ra talaidredre, ka me lako sese o Juta.
12A yaco yani vei Jiorami e dua na i vola i Ilaijia na parofita, ka vaka, Sa vosa vakaoqo o Jiova, na Kalou i Tevita na nomuni i tubutubu, Me baleta ni o ni sa sega ni muria na i valavala i Josefati na tamamuni, se na i valavala i Asa na tui Juta,
13o ni sa muria ga na nodra i valavala na tui Isireli, ka kauti ira na Juta kei ira na kai Jerusalemi ki na i valavala ni tawa dina, me vaka na nodra i valavala na mataqali i Eapi ni ra a kauti ira na Isireli ki na i valavala tawa dina, ka o ni a vakamatei iratou talega na tacimuni, e ratou mataqali i tamamuni, ka ratou tamata vinaka cake mai vei kemuni;
14raica, ena vakataka mai o Jiova e dua na mate levu vei ira na nomuni tamata, na luvemuni, na watimuni, kei na veika kece o ni taukena,
15ia, ena tauvi kemuni e dua na mate bibi sara, ni na tauvi mate kina na nomuni wawa, ka na lutu tani tiko mai na wawa ena vuku ni mate o ya, ena veisiga.
16A vakauqeta talega o Jiova na lomadra na kai Filisitia, kei ira na kai Arapea, era tiko voleka vei ira na kai Eciopea, me ra veivala kei Jiorami.
17Era a cabe cake mai ki Juta ka curuma vakaukauwa vakaivalu, era a kauta tani na i yau kecega era sa kunea ena valenitui, kei iratou na luvena tagane, iratou na watina, ka sega tale ni vo vua na tui e dua na luvena tagane ka vakavo duadua ga o Jioasi, o koya ka gone duadua sara.
18Ni sa oti na ka kece oqo, a qai vakatubura o Jiova e dua na mate mosimosi ena wawa ni kete i Jiorami, ka sa sega na kena i wali.
19Ia ena toso ni gauna, ni oti e rua na yabaki, a qai lutu mai ki tuba na nona wawa na tui ena vuku ni mate bibi ka tauvi koya, ka mate kina ena dua na mate mosimosi sara. Era a sega ni tuva buka na nona tamata me rokovi kina, me vaka na kena ka tuva me baleti ira na nona qase.
20E a buli taumada me tui o Jiorami ni sa yabaki 32 ka veiliutaki vakatui voli e Jerusalemi me walu na yabaki. A sa sega sara ni dua me bau tagi se vakaisaisa ena nona mate. Era a buluti koya ena Koro i Tevita, ia ka sega ga ni vakotori na yagona ena sau tabu.
Who We AreWhat We EelieveWhat We Do
2025 by iamachristian.org,Inc All rights reserved.
