1A yaco tale vei au na vosa i Jiova, ka vaka,
2“Luve ni tamata, o sa tiko ena kedra maliwa na tamata talaidredre. E tiko na matadra, ia era sa sega ga ni rai; e tiko na daligadra, ia era sa sega ga ni rogo; ni ra sa kawatamata dautalaidredre.
3Ia oqo, o iko na luve ni tamata, mo vakarautaka na nomu i yaya ni toki vakabobula, ka vakayacora oqo e matadra ni se bera ni bogi na vanua. Me ra raici iko ni o sa biu vanua ka lako yani ki na dua tale na vanua. De ra na qai kila kina o ira ni ra sa tamata talaidredre.
4Mo kauta ki tautuba e matadra na nomu i yaya ni se siga na vanua me vaka na i yaya ni toki; ia mo lako tani yani e matadra ena yakavi me vaka na nodra sa dau kau yani na tamata me ra la'ki bobula.
5Ni ra vakaraici voli, mo kelia basikata na bai, ka curutaka yani ki tautuba na nomu i yaya.
6Laiva me ra saravi iko ni o sa colata yani na nomu i yaya e tabamu, ka lako yani ki na vanua buto; mo qai ubia na matamu mo kakua kina ni raica rawa na vanua o sa lako tiko kina; ni'u sa digitaki iko mo i dusidusi vei ira na mataqali i Isireli.”
7Ia ka'u a cakava me vaka ka'u sa vakaroti kina. Au sa yauta ki tautuba na noqu i yaya ena siga, me vaka na i yaya ni toki vakabobula, ia ena yakavi, ka'u sa kelia na bai ena ligaqu; ni sa buto na vanua ka'u sa qai yauta tani, ka'u a colata yani e matadra.
8A yaco vei au na vosa i Jiova ena mataka, ka vaka,
9“Luve ni tamata, era sa bau liaci iko li na mataqali i Isireli, o ira na tamata dautalaidredre, me ra tarogi iko, ka kaya, “A cava li o sa cakava tiko oqo?”
10Mo kaya vei ira, “Sa kaya vakaoqo na Kalou o Jiova: Na vosa ni parofisai bibi oqo sa bale vua na tui mai Jerusalemi, vei ira kece talega na mataqali i Isireli era tiko kaya.”
11Mo kaya, “Sa i au na i dusidusi bula vei kemuni: me vaka na ka au sa cakava, ena caka vakakina vei ira; era na toki yani, ka lako vakabobula yani.”
12Ia na tui sa tiko kei ira ena colata na nona i colacola e tabana ni sa yakavi sobu, ka lako yani; sa na kelia basikata na lalaga ka lako yani; me ubia na matana me kakua ni raica na qele.
13Ia ka'u sa tevuka vua na noqu lawa, ena coriti koya talega na noqu i cori: ka'u na kauti koya ki Papiloni ki na nodra vanua na kai Kalidia, ia ena sega ni raica na vanua o ya, ka ni na mate kina o koya.2Tui 25.7; Jere 52.11
14Ia ka'u na veibiuyaki ira ki na veimata ni cagi o ira kecega ka ra tiko vakavolivoliti koya, ka ra dau vukei koya kei ira na nona mataivalu; ia ka'u na ucuna na i seleiwau ka muri ira.
15“Era na kila ni sai au o Jiova, ni'u sa vakasavi ira ki na veimatanitu.
16Ia ka'u na vakalaiva me ra dro bula eso vei ira mai na i seleiwau, mai na dausiga kei na mate dauveitauvi, ka me rawa ni ra tusanaka kina na nodra veika vakasisila kece ki na veimatanitu era dui yaco kina, ka ra na kila ni sai au o Jiova.”
17A yaco tale mai vei au na vosa i Jiova, ka vaka,
18“Luve ni tamata, mo sautaninini ni o sa kania na kemu kakana, ka yavavala ena rere ni o sa gunuva na memu wai.
19Mo tukuna vei ira na lewe ni vanua, Sa kaya vakaoqo na Kalou o Jiova ena vukudra na lewe i Jerusalemi mai na vanua o Isireli: Era na sautaninini ni ra sa kana, ka yavavala ena rere ni ra gunu wai. Ena kau laivi kece na veika sa tu ena nodra vanua, ena vuku ni nodra i valavala kaukauwa o ira kecega sa tiko kina.
20Ena lala mai na veikoro sa tawa, ka rusa na vanua; ia o ni na qai kila kina ni sai au o Jiova.”
21A sa kaya vei au o Jiova,
22“Luve ni tamata, a cava era cavuta vakawasoma tiko kina na Isireli na vosa vakaibalebale oqo, ‘Sa vakadedetaki na gauna, ka sa sega na raivotu me yaco’?
23Mo qai tukuna sara vei ira oqo, Sa kaya vakaoqo na Kalou o Jiova: Au na muduka sara na vosa vakaibalebale o ya. Ena sega tale ni cavuti wasoma e Isireli. Ia mo tukuna vei ira me qai kaya ga na kena oqo, ‘Sa yaco mai oqo na kena gauna, ka sa yaco vakaidina na veika sa yalataki!’
24“Ni sa na sega tale na raivotu lasu se na vosa ni parofisai dauveicavilaki vei ira na Isireli.
25Ni sai au o Jiova, au na vosa vei ira, ia na vosa au na cavuta ena yaco vakaidina. Ena sega ni vakaberaberataki tale. Ia ena nomuni gauna ga, oi kemuni na tamata talaidredre, ka'u na cavuta kina na vosa ka vakayacora sara,” a sa kaya na Kalou o Jiova.
26Sa yaco tale vei au na vosa i Jiova, ka vaka,
27“Luve ni tamata, raica, era sa nanuma na Isireli ni raivotu o sa raica oqo sa baleta e dua na gauna e se bera mai ka se yawa sara ki liu.
28O koya oqo mo kaya kina vei ira, sa kaya vakaoqo na Kalou o Jiova: ‘Ena sega ni vakaberaberataki tale e dua na noqu vosa, ia na vosa au sa cavuta ena vakayacori ga, sa kaya na Kalou o Jiova.’ ”
Who We AreWhat We EelieveWhat We Do
2025 by iamachristian.org,Inc All rights reserved.
