Siraki 38 - Vakavakadewa Vou kei na iVola tale eso（FNVDC12）

Tauvimate kei na kena iwali

1Rokova na vuniwai e na ivakarau e veiganiti me vaka na kena yaga vei iko, ni a buli koya na Turaga.

2Na veivakabulai e vu mai vua na Cecere Sara; na tui sara ga e na soli iloloma vua na vuniwai.

3Na maqosa ni vuniwai era rokovi koya kina ra qoroi koya na vakaitutu cecere.

4A bulia na wainimate na Turaga mai na veikabula, na tamata vuku e na sega ni cata.

5 Lako 15.23-25 A sega beka ni vakamikamicataka na wai na vunikau me kilai kina na sau ni Turaga?

6A solia tale ga na kila vei ira na tamata me na vakalagilagi e na nona cakacaka talei.

7E vakayagataka na wainimate me veivakabulai kina, vakaceguya na vutu;

8na kemisi e dau ulia na wainimate me yaga. E na sega ni oti rawa na cakacaka ni Turaga; e solia na bula vinaka e vuravura taucoko.

9Na luvequ, nio sa tauvimate, kua ni wele; masu ga vua na Turaga, e na qai vakabulai iko.

10Vakanadakuya nomu cala, vagolea vakadodonu nomu inaki, savata laivi nomu ivalavalaca kece.

11Vakacabo isoro boivinaka kei na isoro falawa vakadewataki, sova kina na levu ni waiwai o rawata.

12Mo qai kaciva na vuniwai, ni a buli koya na Turaga; kua ni laivi koya me biuti iko, ni na yaga.

13E tu na gauna e rawa kina na bula e na ligamaqosa nei vuniwai,

14nira na masu tale ga vua na Turaga o ira me donu nodra lewa baleta na mate kei na kena wai me rawa kina na bula.

15E valavalaca vei koya a buli koya o koya e beca na vuniwai.

Lolositaki na mate

16 Sr 22.11,12 Na luvequ, mo lolosi ni dua sa mate; e na levu ni nomu rarawa, mo tekivuna na veitagicaki.

Vakarautaka na yagona me bulu e na vakarokoroko e dodonu me tau vua, mo rokova tale ga na kena ibulubulu.

17Tagicaki koya vakalevu e na yalodina, mo vakaloloku me vaka e ganiti koya, siga dua, se siga rua beka mo kua kina ni vakalewai; oti ya, mo vakacegu,

18ni rarawa e dau tini e na mate, na rarawa ni yalo e vakamalumalumutaka na yago.

19E dau dede na rarawa ni takali na wekamu lomani, ia mo kua ni lai dravudravua kina.

20Kua ni rarawa vakasivia, biliga laivi; nanuma ni yalani tale ga na nomu bula.

21Kua ni guilecava nio sega ni vakabula rawa tale na mate, o sega ni vukei koya rawa, o na vakaleqai iko ga kina.

22“Nanuma noqu mate, ni na tautauvata na nomu: enanoa se noqu, nikua sa nomu.”

23Ni sa bulu na mate, me sa mudu tale ga kina na kena nanumi. Mo vakacegu ga ni sa toki yani na yalona.

Vuli kei na cakacaka tale e so

24Na yalomatua ni tamata vuku e vakatau e na gauna galala; o koya e lailai nona ogaoga, e rawa ni yalomatua.

25E na yalomatua rawa vakacava o koya e dau siviyara, ni ka ga e galeleta na tavoraki ira na bulumakau, na raica na nodra cakacaka, kei na talanoataki ira na yadru?

26E dau malele ga na siviyara kei na vakani ira vinaka na bulumakau yalewa gone.

27E vaka tale ga kina na dauceuceu kei na dausivisivi,

e cakacaka siga bogi me ta kina na sitaba e na kedra veimataqali;

e yalona taucoko me dina na kena veiucui, e tinibogivaka na vakacavara vinaka na nona cakacaka.

28E vaka tale ga kina na dau ni kaukamea ni taura na nona ituki, e qacoya tiko na nona cakacaka;

e yamena na yagona na yameyame ni buka, e buno tu ga e na katakata ni ivavi;

e gigi na daligana e na tamela ni kaukamea, e wanonova matua koto na ibulibuli ni kaukamea.

E qacoya sara me oti na nona cakacaka, e tinibogivaka me oti na kena iukuuku.

29E vaka tale ga kina na dautulituli e na nona veivukiyaka dabedabe nona wili e yavana;

e dau kauaitaka vakalevu na nona cakacaka, galeleta na levu ni ka e bulia rawa.

30E vakatavotavoya na qele e ligana, balia e yavana;

e qacoya me talia vinaka na kena idrega, tinibogivaka me savasava na ivavi.

31O ira kece qo, era vakanuinui e ligadra, era dui maqosa e na nodra cakacaka.

32Ke sega o ira, e sega ni tauyavu rawa na koro, sega nira vakaruru se vakaitikotiko rawa kina na tamata.

33Ia era sega ni dau qarai mera vakaitavi e na nodra matabose na lewenivanua se mera rogo e na itutu nuitaki e so.

Era sega ni turaganilewa se mera kila na lawa; era sega ni rogo e na ka vakavanua se vakataulewa, ra sega ni kenadau e na vosa vakaibalebale.

34Ia era vakadeitaka tu na bula ni vuravura, na nodra masu na nodra vakayacora vinaka na nodra cakacaka.