1Ni sa rogoca o Demetirio nira sa bale e na ivalu o Nikanore kei na nona mataivalu, sa talai Bakitesi kei Alikimo tale i na vanua o Juta vata kei na tabana imatau ni mataivalu.
2Era muria na sala i Kilikali, ra keba donui Mesaloci e Aravela; era vakavua na koro, mokuti ira e lewe levu.
3E na imatai ni vula ni ika152 ni yabaki, era keba donui Jerusalemi;
4era cavutu mera gole i Berea vata kei na ruasagavulu na udolu na sotia taubale kei na rua na udolu na mataivalu vodo ose.
5A keba tiko o Jutasa e Elasa, kei na tolu na udolu na tamata digitaki.
6Nira sa raica na kedra levu na meca, era sa rere vakalevu, e levu era vakalutu lo e na bogi, qai vo wale sara ga e walu na drau.
7Ni sa raica o Jutasa ni levu nona tamata era sa vakalutu ni roro mai na ivalu, sa yalolailai sara kina, ni sega na gauna me vakasoqoni ira kina.
8Dina ni veilecayaki, sa tukuna vei ira na vo, “Meda tu, meda lai valuti ira na keda meca. De rawa nida na vakadrukai ira.”
9Ia era via tarovi koya, ra kaya, “E sega ni rawa. Meda suka meda bula, da qai lesu tale mai kei ira na wekada meda valuti ira, eda sa rui lewe lailai.”
10Sa kaya ga o Jutasa, “Na dro me kua sara. Ke sa yaco mai na noda gauna, meda mate ga e na yaloqaqa e na vukudra na wekada, me kua ni vakabekataki na noda yalodina.”
11Sa qai cavutu mai na keba na mataivalu nei Bakitesi mera sa lai tuva. E waserua na mataivalu vodo ose; era liu tiko na dauveirabo, na dauvavana, kei ira na qaqa.
12O Bakitesi e tu e yasa imatau ni mataivalu. Rau sa taisau tu na vodo ose, sa qai toso vata yani na mataivalu e na domo ni biukila; era qai uvu biukila tale ga na ilala nei Jutasa.
13E sakure na qele e na rorogo ni mataivalu, carubi na vala mai na mataka yacova na yakavi.
14A raica o Jutasa ni o Bakitesi kei ira nona qaqa era tiko e na yasana imatau; era qai muri Jutasa nona qaqa kece,
15era sa qai tavulaki ira na yasana imatau, era cemuri ira me yaco sara i dela i Asoto.
16Nira sa raica na tai imawi nira sa kasura na tai imatau, era qai vuki, ra muri voleka yani e daku i Jutasa kei ira nona ilala.
17Sa katakata sara na veiraravui, levu era vuetaki se mate e na ito ruarua.
18A bale tale ga o Jutasa, ra dro na kena vo.
19Erau sa qai kauta na yago i tuakadrau o Jonacani kei Saimoni, rau buluta e na kedratou ibulubulu e Moteini,
20rau qai tagicaki koya. E siga vica vata nodra lolositaki koya vakalevu o Isireli taucoko, ra kaya,
21“Isa, sa qera na qaqa,
na ivakabula kei Isireli!”
22E levu tale na cakacaka nei Jutasa, na ivalu, nona yaloqaqa, nona rogo, e sega ni volai, ni sa rui levu.
Taravi Jutasa o Jonacani23Ni sa mate o Jutasa, sa babasika tale mai na basulawa e na veiyasai Isireli.
24E na gauna ya, a qai yaco kina na dausiga levu dina. O ira qo kei na vanua taucoko, era sa qai tavuki vei ira na meca.
25O Bakitesi sa qai lesi ira na tawalotu mera liutaka na vanua.
26Era vaqarai ira na ito nei Jutasa, ra kauti ira mai vei Bakitesi, sa qai totogitaki ira, vakadiloi ira.
27Sa tubu kina e Isireli na rarawa levu duadua mai na gauna a cava kina nodra gauna na parofita.
28Era qai soqo kece na ito i Jutasa, ra tukuna vei Jonacani,
29“Tekivu mai na mate i tuakamu o Jutasa, se sega ni dua e vakataki koya me vorati ira na keda meca kei Bakitesi, kei ira na noda era cati keda.
30Keimami sa digitaki iko gona nikua mo sosomitaki koya mo sa neimami iliuliu, mo vala e na vukuda.”
31Sa vakadonuya sara o Jonacani me liutaki ira, me sosomitaki Jutasa na tuakana.
iValu e so i Jonacani32Ni sa kila qo o Bakitesi, sa saga me vakamatei koya.
33Era qai rogoca o Jonacani, o Saimoni na tuakana kei ira kece nona ito, era mani dro i Tekoa na vanualala, ra keba e bati ni tobu e Asifa.(34)
35O Jonacani sa qai talai Jone na tuakana, nodra iliuliu na muri ivalu, me vakamasuti ira na kai Navatea, nona ito, mera bau vakatawana na iyaya era yauta tu mai.
36Ia era basika mai na luve i Jabari mai Meteva, era vesuki Jone, ra drotaka na ka kece e kauta tu.
37Sa qai tukuni vei Jonacani kei Saimoni na tuakana, “Era solevutaka tiko na luve i Jabari e dua na vakamau levu, e dua na ilawalawa levu era kauta tiko mai Natavaci na goneyalewa vou, na luve ni dua na turaga levu ni Kenani.”
38Era sa nanuma sara na dra i Jone na wekadra, era lai vuni toka e delana kei ira na nodrau ilala.
39Nodra rai yani, sa votu mai e dua na ilakolako kosakosa, levu nodra iusana; e qai lako yani o tagane vou kei na nona ilala kei iratou na tacina mera tavaki ira e na tibereli kei na ivakatagi kei na levu na iyaragi.
40Era qai cicivi ira mai na vanua era vuni koto kina, ra sa ravuravu. E levu era bale, kena vo era dro i colo; era mani yauta kece nodra iyaya.
41Sa vuki gona na vakamau me somate, na domo ni vakatagi me lele ni mate.
42Nira sa sauma vinaka na dra i tacidrau, era sa mua tale i na veilolobo ni Joretani.
43Ni sa rogoca o Bakitesi, a kauta mai e dua na mataivalu levu e na siga ni vakacecegu i na bati ni Joretani.
44Sa qai kaya o Jonacani vei ira na nona ilala, “Meda cavutu meda valataka noda bula; nikua sa duatani, sa sega ni vaka e liu.
45Ni raica! Sa tu e matada na ivalu, tu tale ga e dakuda; na yasana qo na Joretani, na yasana ya na vanua lolobo kei na veikau; e sega na vanua meda dro kina.
46Ni kaci qo i lomalagi moni sereki mai ligadra na keda meca.”
47Sa qai cabolo na ivalu, sa dulaka yani na ligana o Jonacani me yaviti Bakitesi, mani levei koya, suka i muri.
48Era sa qai lade i na Joretani o Jonacani kei ira nona ilala, ra qalo i tai; era sega ni muri ira na meca mera sagai ira.
49E rauta ni dua na udolu na tamata nei Bakitesi era bale e na siga ya.
50Sa qai lesu tale i Jerusalemi o Bakitesi, lai tara koronivalu voli e Jutia: o Jeriko, Emeo, Becoroni, Peceli, Timinaca, Faraconi kei Tefoni, era vakabai rewa, vakamatamata, qai vakasamugakagaka.
51A vakatikora kina na mataivalu me vakasosataki Isireli tiko.
52A vakabaitaki Becisuri tale ga, kei Qasara, kei na koroturaga, qai lesia kina e loma na mataivalu, binia kina na kakana.
53Sa qai vesuki ira na luvedra tagane na iliuliu ni vanua, sogoti ira e na koronivalu e Jerusalemi mera yadravi tu kina.
54E na ika153 ni yabaki, ikarua ni vula, a lewa kina o Alikimo me talaraki na bai e loma ni valetabu. Me basuraka nodra cakacaka na parofita!
55Se qai tekivu ga, sa tauvimate, mani tao na cakacaka; a galu, paralasi, sega ni rawa ni vosa se vakataulewa me baleta nona vale.
56A mani mate kina o Alikimo e na yaluma levu.
57Ni sa raica o Bakitesi ni sa mate o Alikimo, sa lesu tale vua na tui, mani sautu yabaki rua na vanua o Juta.
58Era qai bukivere na tamata ca kece, ra kaya, “Raica! Era sa wele tiko o Jonacani kei ira na nona ilala. Meda kauti Bakitesi tale mai, e na vesuki ira kece e na dua ga na bogi.”
59Ra sa lai veivosaki kaya.
60Se qai cavutu mai kei na mataivalu levu, sa qai vakau ivola vuni vei ira kece nona ito e Jutia mera vesuki Jonacani kei ira nona ilala; ia a mani seva, ni a kilai nodra inaki.
61Era vesuki ira e rauta e limasagavulu na iliuliu ni bukivere qo na ilala nei Jonacani, ra vakamatei ira.
62Era mani suka i Becebasi e vanualala o Jonacani, nona ilala, kei Saimoni; a vakacokotaka na veitikina a talaraki, ra qai viria na kena bai.
63Ni sa rogoca qo o Bakitesi, sa soqoni ira nona mataivalu kece, talatala vei ira na kai Jutia.
64Sa qai mai keba e mata i Becebasi; siga vica nona kabakoro, buli misini ni ivalu.
65O Jonacani a biuti Saimoni na tuakana e na koro, me gole yani i lomanivanua; e le vica ga na nona ilala.
66A mokuti Otomera kei iratou na tacina kei iratou na luve i Fasironi e na loma ni nodratou valelaca.
67Sa qai tekivu vala, a tomani ira nona mataivalu; era tabili tale ga yani mai loma ni koro o Saimoni kei ira nona ilala, ra visa na misini ni ivalu.
68Era vala kei Bakitesi, ra vakadrukai koya. E yalorarawa vakalevu o koya ni sa maumau wale nona inaki kei na nona sasaga.
69Sa mani katakatataki ira na tamata basulawa era a vakasalataki koya me curu vanua mai, e vakamatea e levu vei ira. Sa mani lewa me lesu tale i nona vanua.
70Ni sa rogoca qo o Jonacani, sa tala mata vua me kere veisaututaki mera sereki kina na bobula.
71A vakadonuya o Bakitesi qai cakava vakina. E bubului vei Jonacani ni na sega ni tovolea tale vakadua e na nona bula me vakaleqai koya.
72A vakasukai ira vua na bobula kece a taura e na vanua o Juta, sa qai tuvuki me gole i nona vanua, sega tale ni lesuva nodra vanua.
73Sa mani mudu kina na ivalu e Isireli. A vakaitikotiko o Jonacani e Mijimasi. Sa qai lewai ira na tamata o Jonacani, vakawabokotaki ira e Isireli na tamata basulawa.
Who We AreWhat We EelieveWhat We Do
2025 by iamachristian.org,Inc All rights reserved.
