Siraki 42 - Vakavakadewa Vou kei na iVola tale eso（FNVDC12）

Mo dokadokai iko

1Kua ni maduataka na veika e ra, me kua tale ga ni vakavuna nomu cala na veitotaki:

2na lawa nei koya na Cecere Sara kei na nona veiyalayalati, na vakatulewa vakadodonu vei ira tale ga na tamata valavalaca;

3na wasea na isau ni iyaya kei na nomu itokani se lewe ni sala, kei na wasea vakadodonu kei koya na iyau ni wekamu sa mate;

4na taurivaka vakadodonu na ivakarau kei na bibi, kei na qara tubu vakalevu se vakalailai;

5na qara tubu e na veivoli, na vunauci ira vakalevu na gone, kei na kuitataka vakaukaua na tamata dauveiqaravi ca.

6Kevaka e ligatotolo na watimu sera sa rui lewe levu era tiko, vakadretaka na ka taucoko.

7Na ka kece o solia, me matata na kena iwiliwili kei na kena levu, vola vakavinaka na ka kece o solia se ciqoma.

8Kua ni madua na vakavulica na bavulu se lialia, se na qase e veiba vata kei na gone.

E na qai macala nio tamata vuli, era na taleitaki iko kina na tamata kece.

Goneyalewa kei tamana

9 Sr 7.24,25; 26.10-12 E sega ni liaca na goneyalewa ni o koya na vu ni moce yadrayadra lo nei tamana, nona lomaleqataki koya e sega ni moce vinaka kina:

ni se gone, de lakolako e sega ni vakamau; ni sa vakamau, de cati koya o watina;

10ni se daulato, de dua e vakacacani koya se me bukete e na lomanivale nei tamana;

ni sa dua na watina, de sega ni dina vua se sega ni vakaluveni.

11Qarauna vinaka na luvemu yalewa dau vakaunona, de vakavuna mo nodra ivakadredre na kemu meca,

mo iulutaga ni veitalanoa e na koro, mera kaseti iko na tamata, o qai vakamaduataki e matadra na lewe vuqa.

12Kua ni wanonova e dua e na kena rairai vinaka, kua tale ga ni tiko e na kedra maliwa na yalewa,

13ni sarasara e basika mai na isulu, vua na yalewa e basika mai kina na ivakarau ca ni yalewa.

14E vinaka cake na ivakarau ca ni tagane vua na yalewa itovo vinaka; na yalewa e kauta mai na madua kei na rogorogo ca.

Lagilagi vaKalou e nona veikabuli

15Au na nanuma qo na cakacaka ni Turaga, au na tukuna na ka au sa raica.

E na vosa ni Turaga, sa caka kina na nona cakacaka.

16Sa serauna na veika kece na matanisiga, na cakacaka ni Turaga e sinai e na nona lagilagi,

17E sega ni solia na Turaga vei ira na nona yalosavasava mera talanoataka taucoko na nona cakacaka uasivi

sa vakadeitaka na Turaga sau me tudei na vuravura e na nona lagilagi.

18E dikeva na loma ni wasabula titobu kei na loma ni tamata, e kila na nodra ilawaki qaseqase,

ni kila na Cecere Sara na ka taucoko e kilai, e raica na ivakatakilakila ni gauna.

19E kila na ka sa oti kei na ka se bera mai, e kila na veika vuni kece.

20E sega ni dua na vakasama e sega ni kila, e rogoca yadua na vosa.

21Sa vakadeitaka na lagilagi ni nona yalomatua, e tautauvata tu ga o koya me tawamudu.

E sega na ka me na kuri kina se me kau laivi vua, e sega ni gadreva e dua me nona daunivakasala.

22Sa dua na ka na kedra taleitaki na nona cakacaka kece, sa duatani na kedra tatalivaliva.

23Na ka kece qo era tudei tawamudu, e tu na kedra dui yaga, era vakarorogo kece.

24Na veika kece e veisa, era veibasai, e sega ni dua na ka e cakava me sega ni taucoko.

25Na uasivi ni veika yadua era veivakadeitaki, o cei me na oca rawa na sarava na nona lagilagi?