2 Veigauna 11 - Vakavakadewa Vou kei na iVola tale eso（FNVDC12）

Na Vosa ni Parofisai i Semaia(1Tui 12.21-24)

1Ia ni yaco ki Jerusalemi o Reopoama, a sa vakasoqoni ira vata mai na mataqali na Juta kei na Penijamini, era a lewe 180,000 na sotia digitaki, me ra la'ki vala kei ira na Isireli, ka me vakalesui tale vua na matanitu.

2A yaco mai na vosa i Jiova vei Semaia na tamata ni Kalou, ka kaya,

3Mo vosa vei Reopoama, na luve i Solomoni na tui Juta, kei ira kecega na Isireli mai Juta kei Penijamini, ka kaya,

4Sa vosa vakaoqo o Jiova, Mo ni dui lesu tale na tamata yadua ki na nomuni dui vale, ni sai au ga ka vakavuna na ka oqo. Era a vakarorogo ki na vosa i Jiova, ka lesu tale me ra kakua ni vala kei Jeropoama.

Tara Bai ni Valu o Reopoama

5A tiko mai Jerusalemi o Reopoama, ka tara eso na koro ni veitaqomaki ni valu mai Juta.

6A tarai Peceliema, o Etami, kei Tikoa,

7o Pecisuri, kei Soko,

8o Etulama, o Kaca, o Maresa kei Sifi,

9o Etoraimi, o Lakisi kei Aseka,

10o Sora, o Eijaloni, kei Epironi, na veikoro vakabai ka tu mai Juta kei Penijamini.

11A vakatoroicaketaka na kena kaukauwa o koya, ka lesi ira kina na kena kavetani ni valu, ka binia kina na kakana, na waiwai kei na waini.

12A biuta o koya na i sasabai kei na moto, ka cakava me ra taqomaki vakaukauwa sara. A tauri rau rawa kina o Juta kei Penijamini.

Gole ki Juta o Ira na Bete kei na Livai

13Era a gole ki Juta o ira na bete kei ira na Livai mai na veiyasana e Isireli taucoko.

14Ni ra a biuta na nodra veivanua kei na nodra i votavota o ira na Livai, ka lako ki Juta kei Jerusalemi, ni a vakatalai ira tani o Jeropoama kei iratou na luvena me ra kakua ni bete vei Jiova,

151Tui 12.31ka lesia eso na nona bete ki na veitikina cecere, me ra la'ki bete ni matakau ceuti ni manumanu, tamata kei na luve ni bulumakau.

16Era a muri ira na bete kei ira na Livai ki Jerusalemi o ira na nodra veimataqali kece na Isireli ka a toka dei ga na lomadra me ra vakasaqarai Jiova na nodra Kalou na Isireli, me ra vakacaboisoro vua na Kalou ni nodra qase.

17Era a vakataudeitaka na matanitu o Juta, ka tudei kina o Reopoama na luve i Solomoni me yabaki tolu; ni ra a muria na nodrau i valavala o Tevita kei Solomoni ka yabaki tolu na kena dede.

Na Vuvale i Reopoama

18A tauri Meloci o Reopoama me watina, na luve i Jirimoci, ka luve i Tevita, kei Epaieli na luve i Iliavi na luve i Jese;

19ka tolu kina na luvedrau tagane; o Jiusi, o Semaraia, kei Seami.

20Ia e muri, a qai vakawati tale o Reopoama kei Meka na luve i Apisalome, ka luvedrau kina o Apaija, o Atai, o Sisa, kei Silomeci.

21A sa ka levu sara na nona domoni Meeka o Reopoama mai vei ira kece na watina dina, ni ra sa lewe 18 na watina, ka ra lewe 60 na watina lalai, ka ra sa lewe 28 na luvena tagane kei na 60 na luvena yalewa.

22A sa digitaki Apaija na luvedrau kei Meka o Reopoama me luvenitui liu vei ira na tacina, ni a lomana me buli koya me tui.

23A valavala vakavuku o Reopoama, ka lesi ira eso na luvena me ra dui tiko ena veivanua e Juta kei Penijamini, ki na veikoro vakabai kecega; ka solia vakalevu vei ira na veivuke kei ira na yalewa me ra vakawatitaka.