Udite 10 - Vakavakadewa Vou kei na iVola tale eso（FNVDC12）

Lako o Udite i na keba nei Oloferenesi

1Ni sa oti na vakamamasu nei Udite vua na Kalou ni Isireli, ni sa vakacavara na vosa kece qo,

2sa qai duri mai na vanua a davo tu kina, kaciva nona vada, gole sobu i na vale e dau tiko kina e na siga ni vakacecegu kei na siga ni solevu.

3Sa qai luvata na isulutaga, luvata na isulu ni yada, qai sisili, lumulumu e na waiwai talei, seruseru, qai vakaivauvau, tokara na isulu ni marau a dau dara ni se bula o Manase na watina.

4A vakaivava, vaqato, vakamama, vakasau, kei na iukuuku taucoko me rairai totoka kina, me dreta na matadra kece na tagane.

5A solia vei nona vada e dua na tavaya waini, e dua na tavaya waiwai, qai tawaitagataka na sila tavu, na keke vuanikau sigani kei na madrai vulavula; sa qai ologa na iyaya kece qo, solia vei nona vada me dreke.

6Erau sa qai lako i na matamata ni koro o Beculia, rau raici Usia ni duri tu kina kei rau na qase ni koro o Javirisi kei Jaramisi.

7Nodratou raici koya, sa duatani na matana kei nona isulu, eratou sa qoroya vakalevu na kena totoka, ratou kaya vua,

8“Me lomani iko na Kalou ni noda qase, me vakayacora na nomu inaki meda lagilagi na kawa i Isireli, me vakacerecerei o Jerusalemi.” Sa qai vakalagilagia na Kalou o Udite.

9Sa qai kaya vei iratou, “Dou vakarota me dola vei yau na matamata, au na qai curu yani meu vakayacora na nodatou veivosaki.” Sa mani tukuni vei ira na cauravou me dola.

10Ni sa dola, erau sa curu i tuba o Udite kei na nona vada. Era vakaraici koya na turaga ni sirova na baba, muria yani na buca me yacova ni sa tabogo.

11Erau muria tiko yani na buca, e takosovi rau e dua na matayadra ni Asiria,

12era qai vesuki Udite, era taroga, “O yalewa ni vei, o lako mai vei, o lako tiko i vei?” A sauma, “O yau na kawa ni Iperiu, au drovaki ira nira sa vakarau soli vei kemuni mera vakawabokotaki.

13Au lako tiko vei Oloferenesi na nomuni vunivalu meu tukutuku vakadodonu vua, meu vakaraitaka vua na sala me rawata kina na loma ni colo taucoko, me kua ni vesu se moku kina e dua nona tamata.”

14Nira sa rogoca na nona vosa na matayadra, ra raica na matana – sa rui totoka vakaoti vei ira - era qai kaya vua,

15“Nomu kusa mai vua na neimami turaga, o sa bula kina. Lako sara i nona valelaca, e dua na keimami iwase e na kauti iko vua.

16Nio sa tu e matana, kua ni rere, tukuna ga na ka o se qai tukuna qo vei keimami, e na qai lomani iko.”

17Era lesi e lewe dua na drau na sotia mera veitomani i na valelaca nei Oloferenesi.

18Sa yavavala na loma ni keba ni sa rogovaki voli na nona yaco mai. Se wawa kacivi tiko e mata ni valelaca nei Oloferenesi, era sa soqovi koya yani.

19Era qoroya na kena totoka, era qoroya vata kina na kawa i Isireli. Era sa dui kaya, “O cei me beca na mataqali tamata e vaka tu qo na nodra marama? Me kua sara ga ni dua vei ira e bula. Kevaka eda laivi ira, era na coriti vuravura taucoko!”

20Eratou sa qai lako mai na ilala nei Oloferenesi kei ira kece na nona italai mera vakacurumi koya i loma ni valelaca.

21E dodo no o Oloferenesi e dela ni loga, biri tu kina na taunamu e cula e na isulu lokaloka koula, vonoti e na emeralita kei na veivatu talei.

22Sa vakarogoi na vulagi, a toso mai mata ni valelaca ni cinavi nona sala e na cina siliva.

23Ni sa mai tu o Udite e mata i Oloferenesi kei ira nona italai, era sa drukataka kece na totoka ni matana; sa qai davoraki koya o Udite me vakarokoroko vua, ia era laveti koya tale na bobula nei Oloferenesi.