1Sa rogoca o Saimoni ni sa vakasoqona o Tirifo e dua na mataivalu levu me curubotea na vanua o Juta me vaqeyavutaka,
2sa raica nira sautaninini e na rere na lewenivanua. Sa mani gole cake i Jerusalemi, soqoni ira vata,
3vakayaloqaqataki ira ni kaya, “Oni kila sara ga o kemuni na veika lelevu keitou sa cakava na veitacini kei na yavusa nei tamaqu me baleta na lawa kei na vale tabu, oni kila tale ga na ivalu kei na veika dredre keitou sa sota kaya.
4Na ka qo eratou sa mate kece kina na taciqu e na vuku i Isireli, qai vo ga o yau.
5Me yawa sara vei yau na via bula e na gauna ni leqa, niu sega ni vinaka cake vei iratou na taciqu.
6Ia au veisausaumi e na vuku ni noqu vanua kei na vale tabu, e na vukudra na nomuni veitinani, nira sa tovata na veivanua e na veicati mera samuti keda.”
7Sa curumi ira na yaloqaqa nira sa rogoca na vosa qo,
8era qai sauma e na domolevu, “O sa neimami iliuliu, sosomitaki rau na tacimu o Jutasa kei Jonacani.
9Vala e na noda ivalu, keimami na muria na nomuni vosa kece.”
10Sa mani vakasoqoni ira kece na sotia, vakacavara vakatotolo na bai kei Jerusalemi, qai viribaita wavoki.
11Sa talai Jonacani luve i Apisalome i Jopa, kei na dua na mataivalu levu toka, cemuri ira na kena itaukei, a tiko yani kina.
12Sa qai cavutu mai Tolemaisi o Tirifo kei na dua na mataivalu levu me curubotei Juta, a nona kaivesu voli o Jonacani.
13A keba o Saimoni e Atita, qarava na buca.
14Sa kila o Tirifo ni o Saimoni sa sosomitaki Jonacani na tacina, ni sa vakarau valuti koya mai, mani tala mata meratou tukuna vua,
15“Na vu ni neimami vesuki Jonacani na tacimu e baleta na ilavo e dinautaka i na katonitu e na nona ilesilesi e so.
16Mo solia mai qo e 100 na taledi na siliva kei na rua na luvena tagane merau vesu toka me kua kina ni ravuti keimami o koya ni sana sere, keimami na qai sereki koya.”
17Sa kila o Saimoni nira lasutaki koya tiko, ia sa mani vakarautaka ga mai na ilavo kei na gone e rua dera na qai cudru kina na lewenivanua ra kaya,
18“Na nona sega ni solia o Saimoni na ilavo kei na luvena e rua, a mate kina.”
19A mani soli rau na gone kei na 100 na taledi, ia a lasu o Tirifo, e sega ni sereki Jonacani.
20Oti qo sa via curubotei Juta mai o Tirifo me vaqeyavutaka, e muri wavoki mai Atora. Ia na veivanua e lakova, e tayabe tu e yasana na mataivalu i Saimoni.
21Era talatala tiko ga vei Tirifo na lewe ni koronivalu mera kerei koya me gole yani vei ira vaka e na vanualala me kau kedra yani.
22Sa mani vakarautaki ira kece nona mataivalu vodo ose o Tirifo mera lako, ia e na bogi ya a tau bi kina na ucacevata, mani daro kina na lako. A gole sara, yaco i na vanua o Kiliati.
23Ni sa voleka yani i Basikama, sa vakamatei Jonacani, mani bulu kina.
24Sa qai vuki lesu o Tirifo, sa gole tale i nona vanua.
25Sa qai talatala o Saimoni me kau mai vua na sui i Jonacani na tacina, mani buluta e Moteini, na nodra koro nona qase.
26Era tagicaki koya e na rarawa levu o Isireli taucoko, era lolositaka me vica vata na siga.
27Sa qai vakaduria o Saimoni e dua na ivakananumi e dela ni kedratou ibulubulu na tamana kei iratou na tacina, balavu me laurai yawa, vakavatu taliva e matana kei na dakuna.
28A tara tale ga e vitu na piramiti veidonui baleti rau o tamana kei tinana kei iratou na tacina e va.
29Sa qai vakaduria wavoki na duru lelevu, qai ceuta kina na isulunivalu me ivakananumi tudei, ceuta tale ga e tutu ni isulunivalu na waqa mera raica kece na soko wasa.
30Qo na ibulubulu a cakava e Moteini; se tu ga kina me yacova nikua.
31O Tirifo a qai liumuritaki Adioko na turaga lailai, vakamatei koya,
32qai kovea nona bilo kei na isala vakatui kei Esia; qai vakaleqa vakalevu na vanua.
33Ia o Saimoni a vakaukauataka na koronivalu kei Jutia, viribaiti ira, tara na valeniyadra babalavu, na bai lelevu, na matamata kei na kedra samugakagaka, qai cokonaka na veikoronivalu.
34A lesi iratou tale ga e lewe vica meratou talai vei Demetirio na tui meratou kerea me lomana mada na vanua, ni nona cakacaka tu ga o Tirifo na butakoci ira.
35A vakadonuya nona kerekere o Demetirio, vola vua na ivola qo:
36“O Demetirio na tui vei Saimoni, betelevu, nodra itokani na tui, vei kemuni na qase kei na lewe ni yavusa Jiu, ni bula.
37Au sa taura na isala koula kei na taba ni niuniu oni vakauta mai, au sa tu vakarau meda veisaututaki, meu vola tale ga vei ira na noqu vakailesilesi mera vagalalataki kemuni mai na ivakacavacava e so.
38Na noda veiyalayalati kece se dei tu ga, me nomuni sara ga na koronivalu oni sa tara.
39Nomuni cala kece yacova nikua, au sa bokoca; na nomuni dinau ni ivakacavacava vua na tui sa boko; na ivakacavacava kece tale ga e dau kumuni e Jerusalemi, sa sega.
40Ke dua tale ga vei kemuni e ganita me lewe ni noqu matayadra, me curu; meda sa veisaututaki.”
41E na ika170 ni yabaki sa qai tauluva vei Isireli na nodra ivua na kaitani,
42era sa qai tekivu vola na lewenivanua e na veiyalayalati kei na ivola e so, “E na imatai ni yabaki nei Saimoni na betelevu, vunivalu, nodra iliuliu na Jiu.”
43 2M 10.32-38 E na gauna ya a keba kina o Saimoni donui Qasara qai virikovuta na nona mataivalu. A bulia e dua na misini ni kabakoro, torova yani na koro, bololaka e dua na valeniyadra qai ravuta.
44O ira na sotia e loma ni misini, era lade sara i loma ni koro, qai tubu kina na maue levu.
45O ira na lewenivanua era kabata vakaveiluveni na bainikoro, kakadresudresu nodra isulu, ra kailavaka yani vei Saimoni mera sa veisaututaki;
46era kaya, “Kua ni sauma vei keimami neimami ivakarau ca, moni lomani keimami ga.”
47Era sa mani veiyalayalati kei Saimoni, sa mudu kina nona valuti ira. Ia a cemuri ira mai na koro, vakasavasavataka na vale a tu kina na matakau, qai curuma yani e na sere kei na veivakacaucautaki.
48A vakaseva laivi taucoko kina na duka, vakacurumi ira kina o ira na rokova na lawa. A vakadeitaka tale ga na kena bainivalu, tara kina e dua nona vale.
49Era vakatabui na lewe ni koronivalu e Jerusalemi na veicuruyaki e na veivoli. Era walokai sara vakalevu qai le levu ra mate kina.
50Era tagi vei Saimoni me veisaututaki kei ira, mani vaka kina. Ia a cemuri ira mai kea, qai savata laivi na duka ni koronivalu.
51E na ika23 ni siga ni ikarua ni vula e na ika171 ni yabaki, era curuma yani kina na Jiu, ra veivakacaucautaki, ra dulaki palema, ra qiri api, sibali kei na veimataqali ivakatagi vakawa, ra laga serenilotu, ni sa samulaki e dua na meca levu, cemuri tani e Isireli.
52Sa mani lewa o Saimoni mera dau solevutaka e na veiyabaki na siga qo. A vakaukauataka na bainivalu e yasa ni koronivalu e na delana ni valenisoro, mani vakaitikotiko kina o koya kei ira nona tamata.
53Sa qai raica o Saimoni ni sa cauravou o Jone na luvena, mani lesi koya me vunivalu, vakaitikotiko e Qasara.
Who We AreWhat We EelieveWhat We Do
2025 by iamachristian.org,Inc All rights reserved.
