Same 92 - Vakavakadewa Vou kei na iVola tale eso（FNVDC12）

1Sa ka talei dina me da ia na vakavinavinaka vei kemuni Jiova,

Ka vakamolimoli ki na yacamuni, oi kemuni sa Cecere Sara;

2Me tusanaki na nomuni loloma tudei ena veimataka,

Kei na nomuni yalodina ena veibogi,

3Me vakarogoi ena domo ni vakatagi ni yaya ni qiriqiri vakawa,

Kei na rogo kamica ni api.

4Na nomuni cakacaka cecere, i Jiova, sa vakamarautaki au;

Au sa laga sere ena marau ena vuku ni ka o ni sa cakava.

5I Jiova, sa ka levu sara na nomuni cakacaka!

Sa rui titobu na nanuma ni lomamuni!

6Oqo na ka sa sega ni kila rawa na tamata lialia;

Sa sega ga ni vakasamataka rawa na tamata yalowai;

7Era na tubu na tamata ca me vaka na co,

Ka toso cake na nodra rawa-ka na tamata i valavala ca;

Ia era na qai vakarusai kece vakadua,

8Baleta ni o ni sa qaqa tikoga Jiova ena veigauna taucoko.

9Keimami sa kila ni ra na mate na nomuni meca,

Ka ra na vakadrukai kece na tamata ca.

10O ni sa vakaukauwataki au me vaka e dua na bulumakau kila,

Ka vakalougatataki au ena marau.

11Au sa raica na nodra vakadrukai na kequ meca

Ka rogoca na nodra tagi na i valavala ca.

12Era na bula cake na yalododonu me vaka na balabala;

Era na tubu me vaka na sitari mai Lepanoni.

13Era sa vaka na kau era tei ena vale i Jiova,

Ka bula cake ena vale tabu ni noda Kalou,

14Ka vuataka tikoga na vuana ni sa qase mai

Ka drokadroka tu ga ka kaukauwa ena veigauna kece.

15Oqo e vakaraitaka ni sa dodonu o Jiova;

Sa sega ni cala vua na noqu dauveitaqomaki.