1Au a tagi vakadomoilevu vua na Kalou;
Ka sa rogoci au o koya.
2Ena gauna ni leqa au a masu vua na Kalou
Au laveta cake na ligaqu ka masu ena veibogi kece,
Ia, au sa sega ga ni kunea na vakacegu.
3Au vakasamataka na Kalou, ka'u sa qai madua,
Au a vakasama vakatitobu, ka sa tarai au na yalolailai.
4Sa sega ni laivi au o koya me'u moce vinaka ena bogi,
Au sa taqaya ka'u sega ni vosa rawa.
5Au vakasamataka na veisiga sa sivi yani
Ka vakananuma na veiyabaki ki muri sara.
6Au sa dau ia ga na vakanananu titobu ena bogi;
Io, au sa vakanananu ga ka taroga e lomaqu na ka oqo:
7“Ena cati au tiko beka na Turaga?
Ena sega beka ni vinakati au tale?
8Sa mudu beka na nona loloma tudei?
Sa oti beka na yaga ni nona vosa ni yalayala?
9Sa guilecava beka na Kalou me dau yalololoma?
Sa taura beka na i tutu ni nona yalololoma na cudru?”
10Ia au a qai kaya e lomaqu,
“Na ka mosimosi duadua vei au oqo,
Ni sa veisau na liga i matau nei Koya sa Cecere sara.”
11Au na nanuma tikoga na nomuni cakacaka lelevu, i Jiova;
Ka vakananuma lesu na ka veivakurabuitaki
o ni a vakayacora ena gauna sa oti yani.
12Au na dau nanuma tikoga na ka o ni a cakava;
Ka'u na vakasamataka vakatitobu na nomuni cakacaka kecega.
13Na ka kece o ni cakava na Kalou e savasava!
E sega ni dua na Kalou me cecere cake vei kemuni!
14Sa i kemuni na Kalou o ni sa daucakava na cakacaka mana;
O ni sa vakaraitaka oti na nomuni kaukauwa
ena kedra maliwa na veimatanitu.
15O ni sa vakabulai ira na nomuni tamata ena nomuni qaqa,
O ira na kawa i Jekope kei Iosefo.
16Ni ra raici kemuni na Kalou na wai era sa rere sara,
Ka sa sautaninini na veivanua titobu e wasawasa.
17Sa sovaraka mai na uca na o;
A sa vadugu na kurukuru mai na maliwa lala,
Ka tibi na livaliva ena veiyasana kecega.
18Na domo ni nomuni kurukuru ena covulaca,
Sa vakararamataka na vuravura na tibi ni livaliva,
Sa sautaninini na vuravura.
19O ni a lako kosova na wasawasa,
Ka kosova na wasawasa titobu;
Ia sa sega ni bau laurai na mawe ni yavamuni.
20O ni sa tuberi ira na nomuni tamata
me vaka na i vakatawanisipi,
Ka rau a veiliutaki kina o Mosese kei Eroni.
Na Kalou kei na Nona TamataA Masikili i Esava.
Who We AreWhat We EelieveWhat We Do
2025 by iamachristian.org,Inc All rights reserved.
