1Ia o ira na liuliu ni veivuvale ena nodra mataqali na luve i Kiliati, na luve i Mekiri, na luve i Manasa, ena mataqali ni nodra qase na luve i Iosefo, era a toro voleka mai ka vosa ena mata i Mosese, kei ira na i liuliu, kei na nodra i liuliu ni veivuvale na Isireli, ka kaya,
2Sa vakaroti kemuni na noqu turaga na Kalou o Jiova mo ni solia na vanua me ra taukena vakaivotavota na Isireli; a vakaroti kemuni talega na Kalou o Jiova mo ni solia na i votavota i Silovati na weka i keimami vei iratou na luvena yalewa.Tiko 27.7
3Ia kevaka e ratou sa vakawati kei na tagane ka luvedra na veimataqali tani e Isireli, na nodratou i votavota, mai na nodra i votavota na neimami qase, ena qai kau me wili vata kei na i votavota ni mataqali e ratou sa vakawati kina; ia ena kau tani na nodratou i votavota mai na i votavota ni mataqali ni neimami qase.
4Ia ni sa yaco mai na nodra Yabaki ni Veivakalesui na Isireli, ena qai kau na nodra i votavota me i kuri ni votavota ni mataqali e ratou sa vakawati kina, ia ena kau tani na nodratou i votavota mai na i votavota ni mataqali ni neimami qase.
5Sa qai vakaroti ira na Isireli o Mosese me vaka na vosa i Jiova, ka kaya, “Sa dodonu na nodra vosa na nodra mataqali na luve i Iosefo.
6Sai koya oqo na ka sa vakarota o Jiova ena vukudratou na goneyalewa na luve i Silovati, ka vaka, ‘Me ratou vakawati vata ga kei na tagane e ratou vinakata; ia me ratou vakawati ga ki na vuvale ena mataqali nei tamadratou.
7Me kakua ni veikauyaki na nodra i votavota na Isireli mai na mataqali e dua ki na dua tale; ia me ra taura matua o ira na Isireli yadua na i votavota ni mataqali ni nodra qase.
8Ia na yalewa yadua, sai taukei ni dua na i votavota ena dua na nodra mataqali na Isireli, me vakawati kei na dua na lewe ni vuvale ena mataqali nei tamana, me ra taukena tikoga o ira na tamata yadua e Isireli na i votavota ni nona qase.
9Ia me kakua ni veikauyaki na i votavota mai na dua na mataqali ki na dua tale na mataqali tani; ia me ra taura matua o ira na veimataqali kecega ni Isireli na nodra i votavota yadua.’ ”
10E ratou a vakayacora na goneyalewa na luve i Silovati me vaka a vakarota vei Mosese o Jiova,
11ni ratou sa vakawati kei na luve i tamadra lalai, o Mala, Tirisa, Okila, Milika kei Noa, o iratou na luve i Silovati yalewa.
12E ratou a vakawati ki na nodratou veimataqali na luve i Manasa, na luve i Iosefo, ka sa toka ga kina vakadua na nodratou i votavota ena yavusa ni mataqali i tamadratou.
13Oqo na i vakaro kei na lewa, a vakarota o Jiova ena gusu i Mosese vei ira na Isireli, ena bucabuca ni vanua o Moapi, ena bati ni Joritani, ka donui Jeriko.
Who We AreWhat We EelieveWhat We Do
2025 by iamachristian.org,Inc All rights reserved.
