1E na ika151 ni yabaki a vakarewa kina mai Roma o Demetirio na luve i Seleuko kei na vica na nona ilala me soko i na dua na koro e baravi, mani veiliutaki kina.
2Sa curuma tiko na nodra vale vakatui na tukana, era vesuki Adioko kei Lisiasi na nona mataivalu mera kauti rau mai vua.
3Ia ni sa rogoca, a kaya, “Au sega ni via raica na matadrau!”
4Era mani vakamatei rau na sotia, sa qai nei Demetirio na idabedabe vakatui ni matanitu.
5Era sa qai gole kece mai vua na tamata basulawa tawalotu e Isireli; a liutaki ira mai o Alikimo, koya a via betelevu.
6Era beitaki ira na lewenivanua vua na tui: “O Jutasa kei iratou na tacina eratou sa mokuti ira kece na nomuni ito, eratou sa cemuri keimami mai na neimami vanua.
7Moni tala e dua na tamata nuitaki me lai raica na vakacaca kece nei Jutasa vei keimami kei na nomuni vanua, me qai totogitaki iratou kei ira kece na nodratou ito.”
8Sa qai digitaki Bakitesi na tui, e dua na nona itokani, kovana ni yasana o Daku ni Uciwai; e tamata rogo e na vanua, yalodina vua na tui.
9A talai rau kei na tawalotu o Alikimo ni sa buli koya me betelevu; e vakaroti Bakitesi me veisausaumi vei ira na luve i Isireli.
10Erau cavutu yani kei na dua na mataivalu vakaitamera i na vanua o Juta, rau qai tala mata vei Jutasa kei iratou na tacina meratou veisaututaki vakaveidabui.
11Eratou sega ga ni vakabauti rau, niratou raica na levu ni mataivalu erau salavata yani.
12Era qai cabe vei Alikimo kei Bakitesi e dua na ilala vunivola mera lomani.
13O ira na Hasiteo qo era isevu ni luve i Isireli mera soro vei rau,
14nira kaya, “Sa tomana mai na mataivalu e dua na bete kawa i Eroni, e na sega ni sagai keda.”
15Sa qai vosa vinaka vei ira o Alikimo, qai vaqo na nona bubului: “Keimami na sega ni via vakamavoataki kemuni se o ira nomuni itokani.”
16Era mani vakabauti koya, ia a vesuka e le onosagavulu, vakamatei ira e na dua ga na siga, me vaka na vosa sa volai tu,
17Same 79.2,3“Era sovaraka voli e Jerusalemi na lewedra nomuni yalododonu kei na nodra dra, sega ni dua me buluti ira.”
18Sa qai tuburi ira kece na tamata na rere kei na domobula, nira kaya, “E sega vei rau na dina se na dodonu, nirau sa vakacala na veidinadinati kei na bubului.”
19Sa qai biuti Jerusalemi o Bakitesi, lai keba i Becisaici. Sa qai talatala mera vesu mai e levu vei ira era a tavuki mai vua kei na so tale; a vakamatei ira, qai kolotaki ira i na davuke levu.
20A lesi Alikimo me iliuliu ni vanua, qai solia e dua na mataivalu me nona. Sa qai lesu tale o Bakitesi vua na tui.
21Sa gu o Alikimo me vakabau me betelevu,
22era tokoni koya kina o ira kece na vakatubu ca tiko. Era sa lewa na vanua o Juta, ra vakacaca vakalevu e Isireli.
23Sa raica o Jutasa na ca levu sa vakayacora o Alikimo kei ira nona ito vei ira na luve i Isireli, ni lailai nodra vakacaca na kaitani.
24Sa qai lakova o Jutasa na veiyasai Jutia me sausaumi vei ira na a vakasuka vua, sa lewa mera kua ni veilakoyaki.
25Ni sa raica o Alikimo nira sa kaukaua mai o Jutasa kei nona ito, kila ni sega ni rawati ira, sa lesu vua na tui, lai beitaki ira vua.
26Na tui sa qai talai Nikanore, e dua na nona vunivalu rokovi dau cati Isireli, me vakawabokotaki ira.
27Sa qai lako mai i Jerusalemi o Nikanore kei na dua na mataivalu levu, tala mata vakailawaki vei Jutasa kei iratou na tacina me tukutuku ni veisaututaki vaqo:
28“Medaru kua ni vala. Au na lako yani kei na le vica ga noqu tamata medaru sota e na veilomani.”
29Sa qai lako mai vei Jutasa, rau veimarautaki vinaka. Ia era sa vakarau tu na meca mera vesuki Jutasa.
30Sa kidava o Jutasa ni a lako mai vakailawaki o Nikanore, sa qai kilavaki koya, sa bese nirau sota tale.
31Ni sa kila o Nikanore ni sa tobo na nona ilawaki, sa lako yani merau vala kei Jutasa volekati Kafasalama.
32Era bale e lima beka na drau na mataivalu nei Nikanore, kena vo era sa se i na koro i Tevita.
33Ni sa oti qo, sa cabe o Nikanore i Dela i Saioni. Era biuta mai na loqi tabu na bete e so kei ira na qase mera kidavaki koya; ra vakaraitaka vua na isoro kama sa cabori tiko me baleta na tui.
34A mani vakalialiai ira ga, dredrevaki ira, vakadukadukalitaki ira, vosa beci ira,
35qai bubuluitaka e na dela ni nona cudru: “Me soli i ligaqu o Jutasa kei nona mataivalu; ke sega, keu lesu bula mai, au na vakama na vale qo.” Sa qai curu i tuba e na cudru waqawaqa.
36Era qai curu tale yani na bete, ra duri e mata ni yaletare kei na valenisoro, era qai tagi lagalaga vaqo:
37“Oni a digitaka na vale qo me vakatokai me nomuni, me nodra vale ni masu kei na kerekere na nomuni tamata.
38Ni kuitataka na tamata qo kei nona mataivalu mera mate e na iselewau; ni nanuma nodra vosa vakacacataki kemuni, mera kua tale ni bula.”
39A biuti Jerusalemi o Nikanore, lai keba e Becoroni, ra tomani koya e kea na mataivalu ni Siria.
40A keba mai Atasa o Jutasa kei na tolu na udolu na nona tamata. Sa qai masu, a kaya,
412Tui 19.35“Nira vosa vakacaca na italai ni tui, a lako yani nomuni yagilosi qai mokuti ira mate e dua na drau walusagavulukalima na udolu na kai Asiria.
42Moni qaqauraka vakina nikua na mataivalu era sa tuva tu qo e mata i keimami, mera kila kina na kena vo ni sa vosa beca na nomuni loqi tabu o Nikanore; moni lewai koya e na nona ivalavalaca.”
43Erau mani vala na mataivalu e na ikatinikatolu ni siga ni vula o Atara. A druka vakaca na mataivalu nei Nikanore, o koya sara ga a isevu ni mate.
44Nira sa raica na nona mataivalu ni sa mate o Nikanore, era kolotaka laivi nodra iyaragi, ra dui se.
45Era cemuri ira na Jiu me siga dua mai Atasa yaco sara i Qasara, era vakatagi biukila ni ivalu tiko ga.
46Era qai ucu mai na lewe ni veikoro e Jutia, ra sogolati ira na meca, ra biligi ira lesu vei ira na veicemuri tiko mai, era mani mate kece e na iselewau; sega ni dua e bula.
47Era sa qai taura na Jiu na itokinivalu, ra musuka na ulu i Nikanore kei na ligana imatau a dodoka vakaviavialevu, ra qai kauta mai me saravi e na ibili kei Jerusalemi.
48Era cibi na lewenivanua e na siga ya, ra solevutaka e na marau levu.
49Era mani lewa me dau vakananumi na siga qo e na veiyabaki e na ikatinikatolu ni siga ni Atara.
50Sa mani cegu siga vica na vanua o Juta.
Who We AreWhat We EelieveWhat We Do
2025 by iamachristian.org,Inc All rights reserved.
