Aisea 19 - Vakavakadewa Vou kei na iVola tale eso（FNVDC12）

Na Kalou ena Cudruvi Ijipita

1 Jere 46.2-26; Isi 29.1–32.32 Oqo e dua na i tukutuku me baleti Ijipita.

Sa lako mai o Jiova ki Ijipita,

Ka sa vodo mai ena dua na o totolo sara.

Era sa sautaninini na matakau ni Ijipita e matana,

Ka ra sa rere sara na kena tamata.

2A sa kaya o Jiova,

“Au sa vakauqeti ira na kai Ijipita,

Me ra veivaluvaluti vakai ira.

Era na yaco me ra veivala

Na tamata yadua kei na wekana,

Na koro yadua kei na dua tale na koro

Kei na dua na vanua vata kei na dua tale na vanua.

3Ena yali na yalodra na kai Ijipita,

Ka'u na vakaveilecayakitaka na nodra i naki.

Era na la'ki taro i vakasala vei ira na matakau,

Kei ira na dauvaka draunikau,

Ka vakakina vei ira na daurairai,

Kei na daucakaisausau.

4Au na soli ira na kai Ijipita vua

E dua na dau veivakararawataki

Ka na lewai ira e dua na turaganilewa kaukauwa,

Sa kaya o Jiova ni lewevuqa.”

5Sa na lutu sobu tikoga na wai ena uciwai na Naile,

Ka na maca yani na kena wai ka na mamaca sara.

6Ena boica na veikeli musu ni ra sa maca mai,

Ka ra na maca ka mamaca sara

Na veibasoga ni uciwai na Naile,

Ka na vuca yani na gasau kei na kuta.

7Ena malai na veika kecega sa tei

Ena bati ni Naile,

Era na cagina tani ka yali sara yani,

Ka na mai mate tu yani na qele

Ena bati ni uciwai na Naile.

8O ira kece na dauqoli ena Naile,

Era na rarawa ka tagi,

Ka ra na yalo lailai na dausiwa

Kei ira era dauqoli kina.

9Era na taqaya na daucakaisulu

Kei ira na dautali i sulu vulavula.

10Era na musulaki sobu na dautali i sulu,

Ka tabaki sobu na tamata cakacaka saumi.

11Era sa lialia na i liuliu mai Soani

Ka ra sa solia na i vakasala lialia,

Na dauvakasala i tui Ijipita.

O ni sa kaya vakacava vei tui Ijipita,

“Oi au e dua na luvedra na tamata vuku,

Ka'u sa nodra kawa na tui e liu.”

12I tui Ijipita, sa evei na nomu tamata vuku?

Laiva mada me ra tukuna ka vakatakila vei iko,

Na ka sa nakita o Jiova me cakava vei Ijipita.

13Sa yaco me ra lialia na i liuliu mai Soani,

Ka ra sa vakacalai Ijipita na i liuliu ni kena veimataqali.

14A solia vei ira o Jiova e dua na yalo,

Me vakavuna na nodra veilecayaki,

Ka vakavuna me tataivatia o Ijipita

Ena ka kecega e cakava,

Me vaka e dua na tamata mateni tidara ena nona lua.

15A sa sega tu ni dua e Ijipita

Me cakava e dua na veivuke,

Se vutuniyau se dravudravua,

Cecere se lolovira.

16Ni na yaco mai na siga o ya era na yaco na kai Ijipita me ra malumalumu me ra vaka na yalewa. Era na sautaninini ena rere ni ra raica ni sa dodoka mai na ligana o Jiova me totogitaki ira.

17Era na daurerevaka na vanua o Juta na kai Ijipita ena veigauna kece e tukuni tale kina vei ira na veika rerevaki ka vakarautaka o Jiova ni lewevuqa me baleti ira.

Sa Vakalougatataki o Ijipita, Asiria, kei Isireli

18Ena gauna o ya, sa na vakayagataki tiko kina na vosa vaka-Iperiu ena lima na koro mai Ijipita. Era na vosa bubului na tamata ena yaca i Jiova ni lewevuqa. Ena vakatokai e dua vei ira na kena koro me o “Koro ni Matanisiga.”

19Ena gauna o ya sa na dua na i cabocabonisoro vei Jiova ena loma ni vanua o Ijipita, ka dua na duru vatu e vakacabori vei Jiova ena i yalayala ni vanua o Ijipita.

20Ena i vakatakilakila ka i vakadinadina vei Jiova ni lewevuqa ena vanua o Ijipita. Ena gauna era sa vakararawataki kina na tamata era na kerea na veivuke i Jiova, ena qai tala mai e dua me mai vakabulai ira.

21Ena qai vakatakilai koya vakai koya o Jiova vei ira na kai Ijipita; ena siga o ya era sa na qai kilai Jiova kina ka qaravi koya ena i soro kei na i soro kama. Era na vosa yalayala ni bubului vua ka vakayacora na ka era sa bubului kina.

22Ena qai totogitaki ira na kai Ijipita o Jiova; ia ena qai vakabulai ira tale. Era na qai gole vua, ka sa na qai rogoca na nodra masu o koya ka vakabulai ira.

23Ena gauna o ya e sa na dua tu na gaunisala levu mai Ijipita ki Asiria. Era na lako mai ki Ijipita na kai Asiria ka ra na lako ki Asiria na kai Ijipita ka ra na dau sokalou vata.

24Ena siga o ya sa na tautauvata kina o Isireli kei rau o Ijipita kei Asiria, ka ratou na vu ni veivakalougatataki ki vuravura taucoko.

25Ena vakalougatataki ira o Jiova ka kaya, “Au na vakalougatataki iko Ijipita na noqu tamata kei iko Asiria ka'u sa bulia vata kei iko Isireli na noqu tamata digitaki.”