Tiko Voli mai na Lekutu 28 - Vakavakadewa Vou kei na iVola tale eso（FNVDC12）

Na i Madrali ni Veisiga(Lako 29.38-46)

1Sa vosa vei Mosese o Jiova ka kaya,

2Mo vakaroti ira na Isireli, ka kaya; ‘Na i soro sa vakacabori vei au, na kakana, sa vakacabori ena bukawaqa, me sa ka boi vinaka vei au, mo ni qarauna ka nanuma tiko mo ni vakacabora ena kena gauna dodonu.’

3Ia mo kaya vei ira, Oqo na i soro sa vakacabori ena bukawaqa, ka mo ni vakacabora vei Jiova: e rua na lami tagane yabaki yadua ka sega na ka e ca kina, me i soro kama ena veisiga.

4Mo vakacabora e dua vei rau na lami ena mataka, ka vakacabora na i ka rua ni lami ena yakavi;

5kei na dua na kilokaramu na valawa matailalai me i madrali laukana, sa veiwaki vata kei na dua na lita na waiwai.

6Oqo na i soro kama sa vakacabori tiko ena veisiga ka a vakatabui mai na Ulunivanua o Saineai me i soro boi vinaka, ka sa vakacabori vei Jiova ena bukawaqa.

7Na kena i madrali liviraki o ya me dua na lita waini me baleta na lami yadua; ka me liviraki oqori ena i cabocabonisoro vei Jiova.

8Ena yakavi mo vakacabora vata kei na i karua ni lami na i madrali laukana kei na dua na i madrali liviraki me vaka ga na i madrali ena mataka. Oqo na i soro sa cabori ena bukawaqa, ka kena i boi sa vinaka vei Jiova.

Na i Madrali ni Siga ni Vakacecegu

9Ia ena Siga ni Vakacecegu, me rua na lami tagane yabaki yadua ka sa sega ni dua na ka e ca kina kei na rua na kilokaramu na valawa matailalai, me veiwaki vata kei na waiwai me i madrali laukana, kei na kena i madrali liviraki:

10Oqo na i soro kama ena Siga ni Vakacecegu kecega, me i kuri ni soro kama ena veisiga, kei na kena i madrali liviraki.

Na i Madrali ni Veivula Vou

11Ena i vakatekivu ni vula kecega, mo ni vakacabora e dua na i soro kama vei Jiova: me rua na bulumakau gone ka tagane, dua na sipi tagane, vitu na lami tagane yabaki yadua ka sega ni dua na ka e ca kina;

12oqo me cabori vata kei na tolu na kilokaramu na valawa matailalai me i madrali laukana, sa veiwaki vata kei na waiwai, me baleta na bulumakau yadua: kei na rua na kilokaramu na valawa matailalai sa veiwaki vata kei na waiwai me i madrali laukana me baleta e dua na sipi tagane;

13kei na dua na kilokaramu na valawa matailalai sa veiwaki vata kei na waiwai, me madrali laukana, me baleta na lami; me i soro kama me i soro boi vinaka, a i soro sa vakacabori ena bukawaqa vei Jiova.

14Na kena i madrali liviraki: me rua na lita na waini dua na bulumakau; me dua veimama na lita na waini; oqo na i soro kama ni veivula yadua ena yabaki taucoko.

15Me dua talega na luve ni me tagane me i soro ni valavala ca me vakacabori vei Jiova; me sa cabori vata kei na i soro kama ena veisiga kei na kena i madrali liviraki.

Na i Madrali ni Lakosivia(Vsoro 23.5-14)

16Ena i katinikava ni siga ena i matai ni vula, me vakacabori kina e dua na i soro ni Lakosivia vei Jiova.Lako 12.1-13; Vrua 16.1-2

17Ia ena i katinikalima ni siga ni vula oqo, me ia kina e dua na kana vata; ena loma ni vitu na siga me laukana kina na madrai sa sega ni vakatubu.Lako 12.14-20; 23.15; 34.18; Vrua 16.3-8

18Ena i matai ni siga me dua kina na soqoni tabu: mo ni kakua ni cakava kina e dua na cakacaka o ni dau cakava ena veisiga,

19ia ni vakacabora ga e dua na i soro ena bukawaqa, a i soro kama vei Jiova; me rua na bulumakau gone, dua na sipi tagane, kei na vitu na lami tagane yabaki yadua, me qarauni me kakua ni dua na tikidra e ca;

20Na nodra i madrali laukana me valawa digitaki ka waki vata kei na waiwai: me tolu na kilokaramu ni dua na i vakarau me vakacabori vata kei na dua na sipi tagane,

21me dua na kilokaramu me vakacabori vata kei na yadua vei ira na vitu na lami,

22me dua talega na me tagane me i soro ni valavala ca mo ni sorovaki kina.

23Mo ni vakacabora na veika oqo, me i kuri ni soro kama ena veimataka o ya na i soro kama ena veisiga.

24Me vakacabori tiko vakaoqo ena veisiga me siga vitu, na kakana me i madrali sa vakacabori ena bukawaqa, me boi vinaka vei Jiova; ia me vakacabori oqo me i kuri ni soro kama ena veisiga kei na kena i madrali liviraki.

25Ia ena i kavitu ni siga, me dua kina na soqoni tabu; mo ni kakua ni cakava kina na cakacaka o ni dau cakava ena veisiga.

Na i Madrali ni Solevu ni Tatamusuki(Vsoro 23.15-22)

26Ena i matai ni siga ni Solevu ni Tatamusuki, ena gauna o ni cabora kina na i madrali laukana ni sila vou vei Jiova, mo ni soqoni vata mai ka sokalou, ka me kakua ni vakayacori e dua na cakacaka o ni dau cakava ena veisiga.Lako 23.16; 34.22; Vrua 16.9-12

27Mo ni vakacabora na i soro kama me boi vinaka vei Jiova: me rua na bulumakau gone ka tagane, dua na sipi tagane, kei na vitu na lami tagane yabaki yadua;

28na nomuni madrali laukana me waki vata na valawa digitaki kei na waiwai, me tolu na kilokaramu ena dua na i vakarau me vakacabori vata kei na yadua na bulumakau, ka rua na kilokaramu me vakacabori vata kei na dua na sipi tagane,

29me ra tau yadua na kilokaramu na luve ni sipi e vitu;

30kei na dua na me tagane mo ni sorovaki kina.

31Mo ni vakacabori ira me i kuri ni soro kama ena veisiga, kei na kena i madrali laukana, mo ni cabora vata kei na kena i madrali liviraki. Me kakua ni dua na tikidra me ca.