1 Maciu 21.33; Mari 12.1; Luke 20.9 Me'u seretaka mada vua na noqu daulomani
E dua na sere ni loloma me baleta na nona loganivaini.
E dua tiko na nona loganivaini na noqu daulomani,
E koto ena dua na delana qele bulabula.
2E a cukita ka biuta tani na kena veivatu
Ka qai tea kina na veivaini digitaki.
A sa tara e dua na vale ni yadra e loma
Ka kelia na qara me dau qaqi kina na qerepi.
Sa qai waraka me dreu na qerepi,
Ia sa qai vuataka na qerepi ca.
3Ia oqo kemuni mai Jerusalemi kei Juta,
Au vakamasuti kemuni,
Mo ni lewa mada ena vukuqu kei na noqu loganivaini.
4A cava tale beka au a sega ni cakava ena noqu loganivaini
Ka dodonu me'u a cakava?
Ia ni'u sa vakaraica tiko me vuataka na vuana,
A cava sa qai vuataka ga kina na qerepi ca?
5Ia oqo au na tukuna vei kemuni,
Na ka au na cakava ki na noqu loganivaini.
Au na kauta tani na veikau era tubu wavokita
Ka basuraka sobu na kena bai,
Au na qai laivi ira na manumanu kila me ra buturaka sobu.
6Au na biuta tu ga me veikau tu,
Ena sega ni samaki se wereci
Ka sa na tubu mai kina na soni kei na kau vakavotona.
Au na vakarota talega na o
Me kua ni vakatauca kina na uca.
7O Isireli na loganivaini i Jiova ni lewevuqa,
Na vaini sa tea sai ira na lewe i Juta.
Sa namaka o koya me ra cakava na ka vinaka,
Ia sa qai kena i sosomi na vakadave dra.
Sa namaka o koya me ra cakava na ka dodonu,
Ia sa qai rogo mai na domo ni veivakararawataki.
Na Veika Ca sa Cakava na Tamata8Ena yaco na veika ca,
Vei ira era kuria na vale vei ira sa tu vei ira na vale
Vei ira era kuria na vanua vei ira sa tu na nodra vanua
Me yacova ni sa sega tale ni dua na tikina e vo.
Ka mo ni qai tiko vakataki kemuni ga ena loma ni vanua.
9Au sa rogoca ni sa kaya o Jiova ni lewevuqa,
“Ena vuqa sara na vale ena rusa,
Ka na sega ena tawana na veivale lelevu ka rairai vinaka.
10E tini na eka na vaini ena rawa kina e dua na qaloni waini
Ka rawa e dua na i vakarau sila mai na tini na i vakarau sore ni kau.”
11 Ym 2.7-9 Ena yaco na veika ca,
Vei ira era sou ena mataka lailai
Ka vaqara me ra gunu
Ka qai mateni tiko ena yakavi taucoko.
12Ena nodra kana magiti era sa rogoca kina,
Na api, na tibereli, na lute ka ra gunuva kina na waini,
Ia era na sega ni via kauwaitaka na veika sa cakava o Jiova.
13O koya oqo era na kau kina vakabobula na noqu tamata.
Era na mate na nomuni turaga ena viakana.
Ka ra mate na tamata wale ena karamaca.
14Sa vakalevutaka na ketena na i bulubulu,
Ka vakarabailevutaka na gusuna,
Me tilomi ira na turaga kei Jerusalemi,
Kei na dua na i lala tamata wale,
Vata kei na nodra maue kei na kosakosa.
15Ena vakamaduataki na tamata kecega
Ka ra vakayalomalumalumutaki kece na dokadoka.
16Sa vakaraitaka na nona cecere o Jiova ni lewevuqa,
Ena nona vakayacora na ka dodonu,
Ka vakaraitaka nona savasava
Ena nona lewai ira na nona tamata.
17Ena veiyasa ni koro sa rusa tu,
Era na kana co kina na lami
Ka ra na kunea talega kina na me
Na veico me ra kania.
18Ena yaco na veika ca vei ira era sa sega ni sereki ira rawa
Mai na nodra i valavala ca.
19Era na kaya,
“Laiva mada me vakatotolo mai o Jiova,
Ka cakava sara na ka e kaya me na caka me da raica mada.
Laiva mada na nodra Kalou na Isireli,
Me cakava na nona i naki,
Me da raica na ka e nanuma.”
20Ena yaco na veika ca,
Vei ira era vakatoka na vinaka me ca.
Era sa vukica na butobuto me rarama,
Kei na rarama me butobuto.
Era sa cakava na ka gaga me kamikamica,
Kei na kamikamica me gaga.
21Ena yaco na ka ca vei ira
Era nanuma ni ra sa vuku
Ka yalomatua sara.
22Ena yaco na veika ca vei ira
Era sa dau gumatua ena gunu waini
Kei ira na doudou ni ulia na gunu kaukauwa ni mateni.
23Ia o ni sa sereki ira era sa cala,
O ira era sa taura na ka era sa saumi kina,
Me ra cakava na ka tawa dodonu.
O ni sa qai kauta tani
Mai vei ira na tamata tawa cala na nodra dodonu.
24Ia me vaka na kena kama na vu ni sila ena buka,
Kei na kena yavu na co madu ena yameyame ni buka,
Sa na vuca vakakina na wakadra,
Ka vuka cake na sedra me vaka na kuvu ni soso.
Ni ra sa cata na lawa i Jiova ni lewevuqa,
Ka beca na nona vosa na Le Dua Yalo Savasava ni Isireli.
25O koya oqo sa cudruvi ira kina na nona tamata o Jiova,
Ka sa dodoka yani na ligana me totogitaki ira.
Ena uneune na veiulunivanua,
Ka na mai tu na yagodra era sa mate oti
Ena gaunisala me vaka na benu.
Ni sa yaco kece oqo e sa sega ga ni oti
Na cudru ni Turaga.
A sa dodoka tikoga yani na ligana.
26Ena solia na i vakatakilakila na Turaga
Ki na matanitu sa tu vakayawa.
Sa kaluvi ira me ra lako mai na i yalayala kei vuravura.
Ka raica ni sa totolo ka sega ni bera na nodra lako mai.
27Sa sega ni dua vei ira me oca se tarabe,
Era sa sega ni sosovu se via moce,
Ka sa sega ni bau lalaga e dua na beleti ni tolodra,
Se cavuka e dua na nodra i vava.
28Sa gagata na gasau ni nodra dakaititi,
Ka sa vakarau vana sara ga na nodra dakaititi.
Na bukubuku ni nodra ose sa vaka na vatu gagata,
Ka sa vaka na covulaca na nodra qiqinivalu.
29Na domodra na sotia sa vaka na domo ni laione,
Era sa vakamatea e dua na manumanu kila,
Ka sega ni dua e kauta tani rawa ni ra sa colata tiko.
30Ena siga o ya era sa tagicaki Isireli,
Me vaka na rogo levu ni vadugu ni wasawasa,
Kevaka e dua e raica yani na vanua,
Ena raica na butobuto kei na ka rarawa,
Ka sa vakabutobutotaki na rarama ena kena vei o.
Who We AreWhat We EelieveWhat We Do
2025 by iamachristian.org,Inc All rights reserved.
