Vakarua 14 - Vakavakadewa Vou kei na iVola tale eso（FNVDC12）

Vakatabui na i Tovo Vakaloloku Cala

1“Sai kemuni na tamata i Jiova na nomuni Kalou. Ni gauna o ni vakalolokutaka kina na mate, mo ni kakua ni tavai kemuni, se tasia na yadremuni me vaka era dau cakava na so.Kakana Savasava kei na Kakana Tawa Savasava(Vsoro 11.1-47)

3Mo ni kakua ni kania e dua na kakana tawa savasava.

4Sai ira oqo na veimataqali manumanu yava i va mo ni kania: na bulumakau, na sipi, na me,

5na dia, na sipi kila, na me kila kei na enitilopi.

6Sa tara mo ni kania na manumanu yava i va kece sa wase rua na kedra ququ ka mama vakarua na kedra.

7Mo ni kakua ni kani ira oqo: na kameli, na ravete se na koni. Era okati me ra tawa savasava, baleta ni ra mama vakarua na kedra ka sega ni wase rua na ququ ni yavadra.

8Mo ni kakua ni kania na vuaka. E wili me tawa savasava na vuaka baleta ni mama ga vakadua na kena. Kua ni kania na lewena na manumanu yava i va oqo se tara na yagona ni sa mate.

9Sa tara mo ni kania na veimataqali ika kecega sa vakalaca ka vakavarina.

10Kevaka e bula voli e loma ni wai e dua na ka, ka sega ni vakalaca se vakavarina, me kakua ni laukana; e dodonu me wili me ka tawa savasava.

11Sa tara mo ni kania e dua ga na manumanu vuka savasava.

12Ia sai ira oqo na manumanu vuka mo ni kakua ni kania: na ikeli, na vulituri, na osipere,

13na busati, na kaite, ena kena veimataqali kecega;

14na reveni ena kena veimataqali kecega;

15na ositeriji, na manulevu ni bogi, na dre, kei na manulevu ena kedra veimataqali;

16na lulu lalai, na lulu lelevu, na lulu ni wai,

17na lulu ni vanua lala, na vulituri vula kei na komorati,

18na sutoki, na belo, ena kena veimataqali kecega; na upoe kei na beka.

19“Na manumanu lalai dauvuka kece sa tawa savasava; mo ni kakua ni kania.

20Ia sa tara mo ni kania na manumanu vakatabana kece sa okati me ra savasava.

21“Mo ni kakua ni kania e dua na manumanu sa mate vakaikoya ga. Sa rawa mo ni solia vei ira na vulagi era tiko kei kemuni me ra kania, se mo volitaka vei ira na kai tani. Ia o ni sa nona na Kalou o Jiova; o ni sa nona tamata.

Mo ni kakua sara ni vakasaqara e dua na luve ni me ena wai ni sucu i tinana.

Lawa ni Soli Katini

22Wasea vakatikitiki na dua na i katini ni veika kece o rawata mai na nomuni teitei ena veiyabaki yadua.Vsoro 27.30-33; Tiko 18.21

23Ia mo ni qai lako ki na vanua sa digitaka o Jiova na nomuni Kalou me dau qaravi kina, ka kania mai kea ena mata i Jiova na i katini ni nomuni sila, waini, waiwai ni olive kei na ulumatua ni nomuni sipi se nomuni bulumakau. Mo ni cakava na ka oqo mo ni vulica kina mo ni rerevaka na nomuni Kalou o Jiova ena veigauna kecega.

24Kevaka o ni tiko vakayawa sara mai na vanua sa dau qaravi kina na Kalou, ka sa dredre mo ni colata kina na i katini ni veika kecega sa vakalougatataki kemuni kina o Jiova, mo ni qai cakava na ka oqo:

25Mo ni veisautaka na i katini ni ka kece me i lavo, ka kauta ki na vanua sa digitaka o Jiova na nomuni Kalou.

26Ni o ni sa yaco kina, vakayagataka na i lavo ena ka ga o ni vinakata; volia kina na bulumakau, na sipi, na waini, kei na gunu kaukauwa. Kauta na veika o volia ki na mata i Jiova ka kania e kea kei ira na lewe ni nomuni vuvale kece, ena marau.

27Ia mo ni kakua ni guilecavi ira na Livai era tiko kei kemuni, baleta ni sega na ka era taukena me nodra.

28Ena veiyatolu na yabaki mo ni kauta na i katini kece ni ka o ni rawata mai na nomuni teitei me maroroi ena nomuni dui koro.

29Na kakana oqo me kedra na Livai, baleta ni sega na ka era taukena, me kedra talega na vulagi, na luveniyali, kei ira na yada era tiko ena nomuni veikorokoro me ra mai kana ka mamau ena qai vakalougatataki kemuni vakaidina o Jiova na nomuni Kalou ena veika kecega o ni sa cakava.