2. NA IVOLA I SUSANA 13 - Vakavakadewa Vou kei na iVola tale eso（FNVDC12）

Erau rawai Susana na turaganilewa e na totoka kei Susana

1A tiko kina mai Papiloni e dua na turaga na yacana o Iokimi.

2A vakamautaki Susana na luve i Ilikia, marama totoka sara, dau doka na Turaga.

3Erau yalododonu na nona itubutubu, erau a tuberi luvedrau e na lawa i Mosese.

4E vutuniyau dina o Iokimi, teivaki vakamaqosa nona lomanibai; era dau gole mai vua na Jiu, ni dokai duadua vei ira kece.

5E na yabaki ya, erau a lesi kina e rua na qase merau turaganilewa. Qo na vosa ni Turaga me baleti rau: “Sa basika mai Papiloni na ca vei ira na turaganilewa qase e dodonu mera veiliutaki.”

6O rau qo erau dau lasava na vale nei Iokimi, e dau vakacaberi kece kina vei rau na kisi ni veilewai.

7Era dau suka na tamata e na sigalevu tutu, qai dau lai gade o Susana e na lomanibai nei watina.

8Erau dau raici koya e veisiga na qase qo ni lai wavoki kina, erau sa mani garovi koya.

9Erau sa vakatanitaka na lomadrau, erau sa bese ni rai i lomalagi se merau nanuma na vakatulewa dodonu.

10Erau sa mateci koya ruarua, erau sega ga ni veitukunitaka nodrau lomaleqa,

11nirau madua na tusanaka nodrau gagano.

12Erau sa qai dau nanamaki e veisiga merau saravi koya.

13Erau kaya, “Daru lako i vale, sa gauna ni kana.”

14Rau sa curu i tuba, rau veitalatala. Nodrau qai dui cowiri lesu mai, erau mani sota. Rau veitarogitaka na vuna, erau sa qai dui tusanaka nodrau gagano. Erau sa mani lomavata me dua na gauna merau sotavi koya taudua kina.

Erau sagai Susana na turaganilewa

15E na nodrau nanamaki tiko gona, e dua na siga sa curu yani i lomanibai o Susana, me vaka na nona ivakarau, vata kei rau na nona vada, me sisili, ni katakata sara na siga.

16E lala sara tu na vanua, o rau ga na qase erau tokalulutaki koya.

17Sa kaya vei rau na vada, “Drau lai kauta mai na waiwai kei na sede, drau qai sogota mai na bai meu sisili.”

18Erau cakava vakina, rau sogota na bai, rau curu e na matamata e sau merau vakayacora na nodrau talai; erau sega ni raici rau na qase, nirau vuni toka.

19Erau sa curu i tuba na vada, erau qai tucake na qase, rau cici yani vua, rau kaya,

20“Raica, sa sogo na bai e sega ni dua e raici kedatou, keirau sa domoni iko; mo vakaio mada medatou sa lasa.

21Keo bese, keirau na vakadinadinataka ni dua na cauravou drau a tiko vata, qori na vuna o a talai rau kina na vada.”

22Sa vutugu o Susana, a kaya, “Au sa veileqayaki. Keu cakava qo, au na mate kina; ke sega, au na sega ni dro bula rawa vei kemudrau.

23E vinaka cake meu kua ni cakava, meu tacori e na nomudrau vere, meu kua ga ni cala e mata ni Turaga.”

24Sa qai kaila o Susana e na domo levu, rau qai kaikaila tale ga na qase.

25Sa qai cici yani e dua vei rau, dolava na bai.

26Eratou sa rogoca na lewenivale na kaikaila e lomanibai, era qai cici mai e na matamata e sau se cava sa yacovi koya.

27Erau sa tukutuku na qase, era sa madua vakalevu kina na lewenivale, ni se qai vakadua me tukuni na ka vaqo me baleti Susana.

Erau vakadinadina na turaganilewa e na kisi kei Susana

28Mataka cake era sa soqo na tamata e na vale nei watina o Iokimi, erau qai basika mai na qase, dei tiko na lomadrau me mate o Susana.

29Erau mani kaya vei ira, “Me kau mai o Susana, na luve i Ilikia, wati i Iokimi.”

30Sa mani lakovi. Era veitomani mai o rau nona itubutubu, o iratou na luvena kei ira kece na wekana.

31O Susana e yalewa rakorako rairai totoka.

32Me vaka ni ubi tu na matana, rau sa lewa na qase ca me cereki me mamau mada ga na matadrau.

33Era sa mani veitagici na wekana, itokani kei ira kece na tiko kina.

34Erau sa qai duri na qase e na kedra maliwa, rau tabaka na uluna.

35Sa qai tacake tagitagi i lomalagi, ni nuitaka tu na Kalou.

36Erau kaya na qase, “Keirau taubale tiko e lomanibai, sa qai lako mai na yalewa qo kei rau na vada, sa sogota na bai, qai vakasukai rau na vada.

37Sa qai basika mai e dua na cauravou a vuni toka kina, rau mai veidavoci vata.

38Keirau a tu sara e sau ni bai, keirau sa raica na ka vakasisila qo, keirau qai cici yani.

39Keirau raica sara ga nirau se veimokomoko tiko, keirau sega ga ni vesuka rawa na cauravou, ni rui kaukaua, sa mani dolava na bai a dro sara.

40Keirau mani vesuka na yalewa qo, keirau tarogi koya se o cei na cauravou, a sega ni via tukuna. Qo na neirau ivakadinadina.”

41Era vakabauti rau na soqo tiko, nirau nodra qase rau turaganilewa tale ga; sa mani lewai me mate.

Sa vakabulai Susana o Taniela

42Sa qai kaila e na domolevu o Susana, a kaya: “Kemuni na Kalou tawamudu oni kila na veika vuni, oni kila na veika se bera mai,

43oni kila nirau beitaki yau vakailasu o rau qo. Au sana mate qo! Na ka erau beitaki yau kina e na nodrau lomaca, au sega ni cakava!”

44Sa rogoca nona tagi na Turaga.

45Ni sa kau tiko me lai vakamatei, sa qai vakauqeta na Kalou na yalo ni cauravou lailai yacana o Taniela.

46Sa qai kailavaka o Taniela, “Au sa galala mai na dra ni yalewa qo.”

47Era vuki kece vua na tamata, ra kaya: “Na cava o kaya?”

48Sa duri e na kedra maliwa a kaya “Oni lialia na luve i Isireli? Oni sa lewa me mate e dua na luve i Isireli ni se bera ni vaqaqai vinaka me kilai na kena dina?

49Ni lesu tale i na vanua ni veilewai, nirau beitaki koya vakailasu na qase qo.”

50Era sa mani kusa kece yani. Eratou sa qai kaya na qase vei Taniela, “Mai dabe e ke mo tukutuku vei keitou, ni sa vakatara vei iko na Kalou.”

51Sa qai tukuna vei iratou o Taniela, “Ni tawasei rau merau veiyawaki, au na qai vaqaqai rau.”

52Nirau sa dui tutu, a kaciva e dua vei rau, kaya vua, “O iko na qase valavalaca makawa; qo sa qai sukavi iko nomu itovo ca.

53O dau vakataulewa tawadodonu, o dau vakacalai ira na tawacala, o qai talaci ira na cala; ia a tukuna na Turaga, ‘Kua ni vakamatea e dua e dodonu e yalosavasava.’

54Ia keo a raica dina na yalewa qo, tukuna mada vei yau: Na ruku ni kau cava o raica nirau lasa tiko kina?” A sauma, “E ruku ni vunidrega.”

55“Sa vinaka!” a kaya o Taniela, “Nomu lasu sa vu sara ga ni nomu mate, ni sa rogoca na yagilosi ni Kalou na lewa ni Kalou mo musu rua.”

56Sa vakatikitikitaki koya, qai tukuna me kau mai na kena ikarua. Sa kaya vua, “O iko na kawa i Kenani sega ni kawa i Juta, sa vakacalai iko na matavinaka, sa vukica na lomamu na garogaro.

57Qo na ivakarau drau dau cakava vei ira na goneyalewa ni Isireli era sa vakayacora ga na lomamudrau e na rere; ia na goneyalewa ni Juta a sega ni vosota rawa nomudrau ivakarau ca.

58Tukuna sara mada vei yau: na ruku ni kau cava o toboki rau nirau lasa tiko kina?” A sauma “E ruku ni vunioki.”

59“Sa vinaka!” e kaya o Taniela, “O iko tale ga sa vu ni nomu mate nomu lasu, ni sa waraki iko tu na yagilosi ni Kalou sa vakaiselewau me musuki iko rua, modrau na mate kina.”

60Era tabalaka kece na kaila na soqo tu, ra vakacerecerea na Kalou e dau vakabulai ira na nuitaki koya.

61Era qai qaqauraki rau na qase, ni sa vakacalai rau o Taniela e na veibeitaki lasu e na vosa ga ni gusudrau.

62Era qai cakava vei rau na ka erau a via cakava vua na wekadrau, era mani vakamatei rau me vaka na lawa nei Mosese. Sa mani sega kina ni dave na dra tawacala e na siga ya.

63Erau vakacaucautaka na Kalou o Ilikia kei na watina e na vuku ni luvedrau o Susana, vaka tale ga kina na watina o Iokimi kei ira kece na wekana, baleta ni sega ni kune vua e dua na ka vakamadua.

64Me tekivu mai e na siga ya, sa sakitaki vakalevu o Taniela vei ira na lewenivanua.