1A sa solia o Jiova ni lewevuqa na i tukutuku oqo vei Sakaraia:
2“E noqu gagadre dina me'u vukei Jerusalemi baleta ni'u sa lomani ira vakalevu sara na nona tamata, a loloma ka sa vakavuna me'u cudruvi ira kina na kena meca.
3Au na lesu tale mai ki Jerusalemi, na noqu koro tabu, me'u tiko kina. Ena vakatokai o Jerusalemi me koro yalodina, ka na vakatokai na ulunivanua i Jiova ni lewevuqa me ulunivanua tabu.
4Era na qai laukune tale ni ra dadabe toka ena tolo ni sala o ira na tukanigone kei na buinigone, o ira sa qase sara ka tauri i toko.
5Era na osota tale yani na veigaunisala na gonetagane kei na goneyalewa me ra qito.
6Sa kaya o Jiova, “Era na rairai vakatitiqataka beka na vo-ni-bula ni matanitu oqo na kena yaco, ia sa sega sara ni dredre vei au na ka oqo.
7Au na vakabulai ira mai na noqu tamata mai na vanua era sa kau yani kina,
8ka vakalesui ira tale mai na tokalau kei na ra ni vanua me ra mai tiko e Jerusalemi. Era na noqu tamata, ka'u na nodra Kalou, ena yalodina kei na yalododonu.
9“Ni yaloqaqa! O ni sa rogoca tiko oqo na vosa vata ga era a tukuna na parofita ena gauna e a caka tiko kina na yavu ni noqu Valenisoro ena kena tara vou tale.
10Ni bera na gauna o ya, sa sega sara ni dua e rawata me sauma na nodra vakacakacakataki na tamata kei na manumanu, ka sega ni dua e veilakoyaki voli me galala rawa mai vei ira na kena meca. Au a vakavuna na nodra veimecaki na veiwekani.
11Ia oqo, sa veisau na noqu i vakarau vei ira na vo-ni-bula ni matanitu oqo.
12Era na tea na nodra i teitei ena galala. Ena vuavuai vinaka na nodra veivaini, ena bulabula vinaka na qele, ena levu na uca. Au na vakayacora me ra taukena na veika kece oqo o ira na vo-ni-bula.
13Oi kemuni na kai Juta kei Jerusalemi! E liu, era a dau ia na vosamuri na kai tani ka ra kaya, ‘Me samuti iko mada ga na rusa levu sa samuti rau o Juta kei Jerusalemi!’ Ia au na vakabulai kemuni, era na qai kaya kina vakaoqo na kai tani, ‘Mo qai votai talega ena veivakalougatataki vata ga sa yaco vei Juta kei Isireli!’ O koya oqo, mo ni yaloqaqa tiko kina ka kakua ni rere.”
14A sa kaya o Jiova ni lewevuqa, “Ni ra a vakacudrui au na nomuni qase e liu, au a qai nakita me'u vakarusai ira ka'u a sega sara ni veisautaka na lomaqu.
15Ia oqo, au sa nakita tiko me'u vakalougatataki ira na kai Jerusalemi kei Juta. O koya oqo mo ni qai kakua sara kina ni rere.
16Efe 4.25Na veika oqo e dodonu mo ni cakava: Ni sa ia na veivosaki, me dau tukuni ga na ka dina. Ena loma ni mataveilewai, ni dau vakatauca ga kina na lewa dodonu sa kauta mai na tiko veilomani.
17Ni kakua ni dau vakasamataka na sala eso mo ni veivakacacani ga kina vakai kemuni. Ni kakua ni tukuna na i tukutuku lasu ni o ni sa vosa bubului oti. Au sa besetaka sara na lasu, na lewa vakatawadodonu, kei na veivakasaurarataki.”
18A sa solia o Jiova ni lewevuqa na i tukutuku oqo vei Sakaraia, ka vaka,
19“Na lolo e dau vakayacori ena i kava, na i kalima, na i kavitu, kei na i katini ni vula ena yaco me nodra solevu ni reki kei na marau na Juta. Sa dodonu kina mo ni dauvinakata na dina kei na veilomani.”
20Sa kaya o Jiova ni lewevuqa, “Ena yaco mai na gauna me ra na lako mai kina ki Jerusalemi na lewe ni veimatanitu.
21Era na qai kaya na lewe ni dua na koro vei ira e dua tale, ‘Keimami sa na sokalou vei Jiova ni lewevuqa ka masuta na nona veivakalougatataki. Ni lako mai me da veitomani!’
22Era na lako talega mai ki Jerusalemi na veimatanitu kaukauwa ka rogo me ra mai sokalou vei Jiova ni lewevuqa, ka ra masuta na nona veivakalougatataki.
23Ena gauna oqori, era na lako kina vua e dua na Jiu e lewe tini na kai tani, era na qai kaya vua, ‘Keimami via lako vata kei iko, baleta ni keimami sa rogoca ni sa tiko vata kei iko na Kalou.’ ”
Who We AreWhat We EelieveWhat We Do
2025 by iamachristian.org,Inc All rights reserved.
