1Ni sere vakadomoilevu vua na Kalou na nodra i drodro,
Ni sere ena veisere ni veivakacaucautaki vua na Kalou i Jekope.
2Ni laga sere ka qiria na tibereli.
Qiria me rogo vinaka na api kei na soliteri,
3Uvuca na davui ni solevu ni vula vou,
Ni sa taucoko na vula, ena noda siga ni solevu.
4Sa i koya oqo na lawa e Isireli,
E dua na i vakaro mai vua na Kalou i Jekope.
5Sa vakarota vei ira na Isireli,
Ena gauna era sa lako tani kina mai Ijipita.
Au a rogoca kina e dua na domo au a sega ni kila.
6Au a laveta tani na i colacola e tabamuni,
Ka taura na basikete ni cakacaka mai na ligamuni.
7Ena gauna o ni a leqa kina o ni a tagi mai vei au,
ka'u a qai vakabulai kemuni.
Mai na noqu i vunivuni ena loma ni cava, au a vosa yani kina;
Ka'u a vakatovolei kemuni mai na wai mai Meripa.
8Ni rogoca mada na noqu tamata na noqu i vakasala vei kemuni.
Kemuni na Isireli au diva mo ni a vakarorogo vei au!
9Mo ni kakua sara ni qarava e dua na kalou tani
Se cuva ki na dua tale, vei au ga.
10Sa i au ga o Jiova na nomuni Kalou,
O koya sa kauti kemuni mai na vanua o Ijipita.
Ni dolava na gusumuni ka'u na vakani kemuni.
11Ia o ira na noqu tamata era sega ni via vakarorogo vei au;
Era sa sega ni via talai rawarawa na Isireli.
12Ia au sa mani biuti ira me ra muria ga na yalodra kaukauwa
Ka cakava ga na ka era vinakata.
13Kevaka era a vakarorogo mada ga vei au na noqu tamata
Au diva me ra talairawarawa vei au.
14Au sa na vakadrukai ira vakatotolo sara na kedra meca
Ka vakamalumalumutaki ira era veivala kei ira.
15O ira era cati au era na cuva vei au ena rere
Ka na sega ni mudu rawa na nodra i totogi.
16Au na vakani kemuni ena witi vinaka sara
Ka vakamamautaki kemuni ena oni ni veikau.
Sa Lewa na Veika Kece na KalouA Same i Esava.
Who We AreWhat We EelieveWhat We Do
2025 by iamachristian.org,Inc All rights reserved.
