1A buli o Joasa me tui ni a qai vitu na nona yabaki ni bula, a veiliutaki tiko mai Jerusalemi, ka vasagavulu na yabaki. Na yaca i tinana o Sipia mai Perisepa.
2A cakava o Joasa na ka e dodonu ena mata i Jiova ena gauna kecega a bula kina o Jioiata na bete.
3A vakawatitaki koya o Jioiata kei rau e rua na yalewa, ka vakatubura eso na luvena tagane kei na so na luvena yalewa.
4Ni oti na ka oqo, a nanuma o Joasa me vakavinakataka tale na vale i Jiova.
5A vakasoqoni ira vata na bete kei ira na Livai, ka kaya vei ira, Ni lako yani ki na nodra veikoro na Juta, ka kumuna mai na i lavo mai vei ira kece na Isireli me vakavinakataki tale kina na vale ni nomuni Kalou, ia mo ni cakava vakatotolo na ka oqo. Ia era a sega ga ni vakatotolotaka na Livai.
6Lako 30.11-16A kacivi Jioiata na bete liu, na tui, ka kaya vua, A cava o sega ni tarogi ira kina na Livai se cava, na vuna era a sega tiko kina ni ra la'ki kauta mai Juta kei Jerusalemi na i vakacavacava ka a lavaka o Mosese, na i talatala i Jiova, ki na i soqosoqo ni Isireli ena vuku ni vale ka tu kina na i vunau?
7Ni ra curuma vakaukauwa yani na Vale ni Kalou o ira na luve i Acalaia na yalewa ca o ya, ka taura kina na veika vakatabui ka a vakacabori ena vale i Jiova me solia vei ira na Peali.
8Era a cakava e dua na kato, ni a vakaroti ira kina na tui, ka ra vakatikora e tautuba mai na matamata ni vale i Jiova.
9Era a kacivaka raraba ena veiyasana vaka-Juta kei Jerusalemi, me kau mai vei Jiova na i yau ka a lavaka o Mosese na i talatala ni Kalou vei ira na Isireli ena vanua dravuisiga.
10Era a marau kece na turaga, kei ira kece na lewe ni vanua, ka ra kauta mai na nodra i vakacavacava ka biuta ki na kato, me yacova sara ni soli oti.
11Ia ni ra a kauta mai na kato na Livai vei ira ka a lesi ira na tui, era raica ni levu sara na i lavo era kumuna ena kato, e rau a dau lako mai na nona vunivola na tui, kei na tamata ni bete levu, ka vakalala na kato, ka kauta tale ki na kena i tutu. Era a cakava vakakina ena veisiga, ka levu sara na i lavo a kumuni kina.
12E rau a solia na i lavo oqo na tui kei Jioiata vei ira era a lewa na cakacaka ena vale i Jiova; a qai nodra i tavi me ra saumi ira na matai ni vatu, kei na matai ni kau ka vakakina o ira na matai ni kaukamea kei na parasa, me ra vakavinakataka na vale i Jiova.
13Era a cakacaka na matai, ka toso vinaka na cakacaka ni vakavinakataki vale ena cakacaka ni ligadra, ka vakacavari vakavinaka na vakavinakataki ni Vale ni Kalou me vaka ena kena i tutu dina, e liu.
14Ia ni ra vakaotia, era a qai kauta tale mai vua na tui kei Jioiata na i lavo a vo, ka me caka kina na i yaya ni vale i Jiova, na i yaya ni qaravi ni cakacaka, kei na vakacaboisoro, na i tutu ni ka boi vinaka, na bilo koula kei na bilo siliva. Era a vakacabora tiko eso na i soro kama ena vale i Jiova ena veisiga kecega i Jioiata.
15Ia a qase mai o Jioiata, ka dede sara na nona gauna ni bula, a qai mate; a yabaki dua na drau tolusagavulu na dede ni nona bula, ena siga a mate kina.
16Era a buluti koya ena koro i Tevita, ka bulu vata kina kei ira na tui, baleta ni a caka vinaka e Isireli o koya, ka vakakina vua na Kalou kei na nona mataqali.
17Ia ni sa mate o Jioiata, era a lako mai na turaga ni Juta, ka mai vakarokoroko vua na tui, ka ciqomi ira o koya.
18Era a biuta na vale i Jiova na Kalou ni nodra qase, ka qarava na kalou yalewa ni veikau kei na nodra matakau. A yaco na cudru vei ira na Juta kei ira mai Jerusalemi me baleta na nodra valavala cala oqo.
19Ia a tala eso na parofita o koya, me la'ki vakalesui ira tale vei Jiova; era a beitaki ira ena vuku ni nodra i valavala, ka bese ga ni rogoci ira.
20 Maciu 23.35; Luke 11.51 A curu na Yalo ni Kalou vei Sakaraia na luve i Jioiata na bete; ka tu cake vei ira na tamata, ka kaya, Sa vosa vakaoqo na Kalou, A cava li o ni sa vakacacana kina na vunau i Jiova, ka dredre kina na tiko vinaka? E baleta ni o ni sa biuti Jiova, ka sa biuti kemuni talega o koya.
21Ia era a bukia na kena vere, ni a vakarota na tui me ra vakaviriki koya ena vatu ena rara ni vale i Jiova.
22Ia a sega mada ga ni bau nanuma o Joasa na tui na nona dau cakacaka ena yalodina ki vua o Jioiata, na tama i Sakaraia; ia sa vakamatei luvena ga. Ia ni vakarau mate o Sakaraia, a kaya cake mai, Me raica o Jiova na ka o sa cakava oqo, ka sauma lesu vei iko!
Na i Cavacava ni Veiliutaki i Joasa23Ia ena mua ni yabaki o ya, a lako cake mai na nodra mataivalu na kai Siria me vala kei Joasa. Era a lako mai ki Juta kei Jerusalemi, era a mokuti ira kecega na vakailesilesi vei ira na lewe ni vanua, ka vakauta na nodra i yau, na i toki ni valu ki Tamasiko vua na nodra tui.
24E dina ni ra lewe lailai wale na mataivalu ni Siria era a lako mai, ia a solia ki ligadra o Jiova e dua na mataivalu levu nodra na Juta, baleta ni ra biuti Jiova, na Kalou ni nodra qase. A vakaoqo na kena soli na lewa vei Joasa.
25Ia ni ra lako tani mai vei, Joasa ka laivi koya ni a sa vuetaki vakaca sara, era a qai buki kena vere na tamata era a qaravi koya tiko me saumi kina na dra ni luve i Jioiata na bete, ka ra vakamatei Joasa ena nona i mocemoce. A mate o Joasa; ka ra buluti koya ena koro i Tevita, ia a sega ga ni bulu o koya ena nodra i bulubulu na tui.
26Ia o rau na bukiveretaki koya o Sapati na luve i Semeaca, e dua na yalewa ni Amoni, kei Jiosevata na luve i Semerice e dua na yalewa ni Moapi.
27Ia na i vakamacala me baleti ira na luvena tagane, kei na i colacola bibi ka bikai kina, kei na kena vakavinavinakataki tale na Valenisoro, a volai tu ena i vakamacala ni Kedra i Vola na Tui. A buli me tui o Amasaia na luvena me kena i sosomi.
Who We AreWhat We EelieveWhat We Do
2025 by iamachristian.org,Inc All rights reserved.
