Aisea 32 - Vakavakadewa Vou kei na iVola tale eso（FNVDC12）

Na Tui Yalodina

1Raica, ena yaco me veiliutaki e dua na tui yalodina;

Ka ra na vakayacora na turaga na lewa dodonu.

2O ira yadua era na vaka na i vakaruru mai na cagi

Ka i drodro mai na cagilaba.

Era na vaka na uciwai ena vanua dravuisiga,

Ka vaka na i yaloyalo ni dua na vatu levu ena vanua sigasiga.

3Ena tadola tu na daligadra ka rai tu na matadra

Ki na nodra leqa na tamata.

4Ena yaco me lewa vinaka o koya sa dau yalo totolo,

Ka vosa vakavinaka ka matata o koya sa dau kaka,

5Era na sega tale ni vakatokai na lialia me ra turaga

Se na dauveivakaisini me yalodina.

6Ni sa dau vosataka na ka lialia na tamata lialia

Ka nakita me vakayacora na ka ca.

Na veika e kaya kei na veika e cakava

E vakacacani kina o Jiova;

Sa sega ni bau vakani koya sa viakana,

Se vagunuvi koya sa viagunu.

7Sa ca na nona i lawaki na tamata ca

Ka sa nakita me cakava na veika ca.

Sa nakita me vakarusai ira na dravudravua ena nona lasu,

Ka tabaki ira me ra kakua ni vakayagataka na nodra dodonu.

8Ia na tamata yalodina ena cakacaka ena yalodina

Ka tudei ena ka e dina.

Na i Totogi kei na Veivakacokotaki

9Kemuni na yalewa o ni sota kaya na bula vakacegu

Ka sega ni loma ocaoca,

Ni rogoca mada na noqu vosa.

10O ni sa tiko vakacegu ena gauna oqo,

Ia ena gauna vata oqo ena yabaki ka tu mai,

O ni sa na sotava na veika dredre,

Ni sa na sega tale na qerepi mo ni tomika.

11O ni a tiko voli ena bula vakacegu

Ka sega ni bau loma ocaoca,

Ia oqo mo ni sautaninini ena rere.

Ni luvata tani na nomuni i sulu

Ka vakaisulu ena i sulu kakadresudresu.

12Ni tavia na lomaseremuni ena rarawa,

Baleta ni sa vakarusai na veivaini

Kei na vanua bulabula vinaka;

13Ka sa tubu mai na wa vakavotona kei na soni

Ena nodra vanua na noqu tamata.

Ni tagicaka na veivale kece sara

Era mamarau tiko na lewena,

Kei na koro era dau mamarau.

14Na i tikotiko sara mada ga vakatui ena biu tu,

Ka na vakalalai vakadua na koro turaga.

Na veivale kei na kena bai cecere ena vakarusai vakadua.

Era na qai dau veilakoyaki kina na asa kila,

Ka na yaco me nodra i kanakana na sipi.

15Ia ena qai yaco me sovaraka tale vakadua,

Vei keda na Kalou na yalona.

Ena qai yaco me bulabula tale na vanua dravuisiga,

Ka vuataka na qele na vuata vinaka.

16Ena vakayacori ena veiyasa ni vanua kecega,

Na i tovo savasava kei na ka dodonu.

17Ni ra sa na ia na tamata yadua na ka dodonu,

Ena tubu kina na sautu kei na bula galala tawamudu.

18Ena yaco na bula sautu kei na vakacegu,

Ena nodra vanua na tamata ni Kalou,

Ka vagalalataki mai na nodra nuiqawaqawa.

19Ena qai tauca na veikau na uca cevata

Ka na bale sobu na koro.

20Sa na ka levu sara na nomuni marau

Ni sa levu na wai ena vuku ni kakana ni teitei,

Kei na vanua ni kanakana sa taqomaki vinaka

Me nodra na asa kei na bulumakau.