Jeremaia 48 - Vakavakadewa Vou kei na iVola tale eso（FNVDC12）

Vakarusai o Moapi

1Oqo na ka a kaya na Turaga o Jiova me baleti Moapi.

“Ena yaco na veika ca vei ira na lewe i Nibo,

Ni sa vakarusai na nodra koro!

Sa valuti o Kiriaceimi

Sa bale sobu na kena bai kaukauwa

Ka ra sa vakamaduataki na lewena;

2sa takali na lagilagi kei Moapi.

Era sa bukivere na meca mai Esiponi,

‘Me da vakarusa na matanitu o Moapi.’

Ena vagalui na koro o Tiponi;

Era na vakasavi iko ena i valu.

3Era kacivaka na lewe i Oroneimi,

‘Na leqa! Na Rusa!’

4Sa vakarusai o Moapi

Rogoca mada na nodra tagi na gone.

5Rogoca mada na domo ni nodra tagi

Ena sala ka gole cake ki Luici,

Na domo ni tagi ni rarawa,

Ena sala ka gole sobu ki Oreneimi.

6‘Totolo! ni drotaka na nomuni bula!

Me vaka e dua na ose kila ni veikau!’

7Moapi o sa vakararavi ki na nomu kaukauwa

Kei na nomu i yau,

O iko o na bau kau tani talega,

Kei na nomu kalou o Kimosi

Ena kau yani vakabobula

Vata kei ira na nona turaga kei na bete.

8Ena lako mai na dauveivakarusai

Ki na veikoro yadua,

Ka na sega sara na koro me na bula;

Na qakilo ena vakacacani,

Kei na buca ena vakarusai,

Me vaka sa kaya o Jiova.

9Vakaduria e dua na i bulubulu vatu kei Moapi

Sa na vakarau vakarusai vakadua.

Ena biu tu na kena veikoro me ra rusa

Ka na sega e dua me na bula tale kina.”

10Ena cudruvi na tamata e sega ni cakava na cakacaka ni Turaga ena yalona taucoko! Ena cudruvi na tamata ena sega ni veivakamatei ena nona i seleiwau.

Vakarau na Veikoro kei Moapi

11A sa kaya na Turaga o Jiova, “E dau galala tu ga o Moapi ka sega ni bau kau vakabobula. O Moapi e vaka na waini sa vo tu ka sega ni yavalati; ka sega ni bau sova mai na dua na saqa ki na dua tale na saqa. Na kena i gunugunu sa sega ni vakacacani, e daumaka tu ga ka sega ni bau veisau.

12Ia oqo sa yaco mai na gauna me'u na tala kina na tamata me ra la'ki sovaraki Moapi tani me vaka na waini. Era na vorolaka na nona veisaqa ni waini ka vorolaki ira vakamatailalai.

13Era na qai madua na kai Moapi ena vuku ni nodra kalou o Kimosi me vaka na nodra maduataki Peceli, na Isireli na nodra i nuinui.

14Kemuni na tagane ni Moapi,

A cava o ni kaya kina

Ni o ni tamata qaqa ena i valu?

15Sa vakarusai o Moapi kei na kena veikoro

Ka ra vakamatei na kena cauravou rairai vinaka,

A kaya na Tui, na Turaga Qaqa.

16Na leqa i Moapi sa voleka mai;

Sa voleka sara na kena rusa.

17Ni tagicaki koya na veimatanitu voleka.

Kemuni kece sara sa kila na kena rogo;

Ni kaya, ‘Sa cavuka na nona veiliutaki qaqa;

Sa oti yani na kena lagilagi kei na nona kaukauwa.’

18Kemuni na tiko mai Taiponi,

Ni lako sobu mai na nomuni tikotiko dokai,

Ka dabe ena kuvu ni soso ena dela ni qele.

Sa tiko oqo o koya e mai vakarusai Moapi

Ka sa laiva tu na kena bai ni valu me vakacacani.

19Kemuni na kai Aroeri

Ni tu ena bati ni sala ka vakaraica,

Tarogi koya sa dro mai se cava sa yaco?

20Era na kaya, ‘Sa bale o Moapi,

‘Tagicaka, ni sa vakamaduataki.

Kacivaka ena bati ni uciwai na Erinoni

Ni sa vakarusai o Moapi.’

21Sa yaco mai na veilewai ena veikoro ena buca: ki Oloni, Jeasa, Mefeaci,

22Tiponi, Nipi, Pecitipelaceimi,

23Kiriaceimi, Pecikamuli, Pecimeoni.

24Kerioci kei Posira. Sa yaco mai na veivakarusai ena veikoro kece kei Moapi, yawa se voleka.

25Na qaqa ni Moapi sa vakamalumalumutaki, ka sa vakarusai na nona kaukauwa, sa kaya o Jiova.

Vakayalomalumalumutaki o Moapi

26Vakamatenitaki Moapi, baleta ni saqata na Turaga o Jiova. Ena vaqiqiqi o Moapi ena nona lua, ka ra na dredre na tamata.

27I Moapi, o nanuma li na nomu a vakalialiai ira na Isireli? O a okati ira me vaka era sa vesu vata kei na dua na i lawalawa daubutako.

28Kemuni na tamata o ni tiko mai Moapi, ni biuta na nomuni veikoro. Ni la'ki tiko ena veibarinisavu. Ni cakava mo ni vaka na ruve e cakava na nona sova ena yasa ni tadrua ni vatu.

29Sa rui viavialevu o Moapi! Au sa rogoca na nodra viavialevu, dokadoka, kei na nodra qaciqacia na tamata, na levu ni nodra dokai ira vaka i ira.”

30A sa kaya o Jiova, “Au sa kila na nodra dokadoka na nodra qase. Sa sega na vanua e tini kina na nodra viavialevu, dokadoka, na nodra qase. Sa sega na vanua e tini kina na nodra viavialevu, ka sega ni tudei na ka era cakava.

31Ia oqo au na tagicaki Moapi taucoko kei ira na kai Kiri Erese.

32Au na tagicaki ira na kai Sipima, o sa vaka e dua na vaini sa yaco na tabana, ki na Wasa Damudamu ka yaco sara ki Jaseri. Ia oqo na vuamu ena vula i katakata kei na nomu vaini sa vakarusai.

33Sa kau tani mai na vanua bulabula o Moapi na reki kei na marau. Sa sega tale ni drodro mai na waini mai na i keli ni waini; ni sa sega ni dua me caka waini se kaila ena marau.

34Era sa tagi na kai Esiponi kei Ealale, ka rawa ni rogoci sara na nodra tagi mai Jeasa; e rawa ni ra rogoca na kai Soa, ka rogo sara ki Oroneimi kei Ekilaca Silisia. Sa bau maca talega na wai drodro na Nimirimi.

35Au na tarovi ira na lewe i Moapi mai na nodra vakacaboisoro ena veivanua cecere kei na nodra vakacaboisoro ki na nodra veikalou,” a sa kaya o Jiova.

36Sa tagicaki Moapi na yaloqu kei ira na kai Kiri Erese me vaka e dua sa vakatagitaka na sere ni veibulu ena bitu ni vakatagi, baleta ni sa takali yani vakadua na veika era taukena.

37Na tamata yadua era sa toroya na uludra kei na kumidra. Era tava kece na ligadra ka ra daramaka kece na i sulu taga.

38Ena veidela ni vale kece kei na veivanua ni soqo kece sa sega tale ni dua na ka e caka kina, ia na veitagicaki ga baleta ni'u sa vorolaki Moapi me vaka e dua na saqa sa sega ni dua e vinakata,” a kaya o Jiova.

39Sa vorolaki vakamatailalai o Moapi! Kacivaka! Sa vakamaduataki o Moapi. Sa rusa tu ka ra sa vakalialia na veimatanitu kece era tiko wavolita.”

Sega ni Dro o Moapi

40A sa kaya o Jiova, “Ena covi Moapi sobu mai e dua na matanitu me vaka e dua na Ikeli sa tevuka na tabana.

41Na veikoro kei na bai ni valu ena vakarusai. Ena siga o ya era na vakarerei na sotia ni Moapi me vaka e dua na yalewa sa taratara.

42Sa na vakarusai o Moapi ka na sega tale ni qai dua na matanitu, baleta ni sa vorati au.

43Sa waraki ira tu na kai Moapi na rere, na qara kei na dai.

44O koya ena via drotaka na rere ena lutu ena qara, kei koya ena bula mai na qara ena coko ena dai baleta ni'u sa lewa na gauna me vakarusai kina o Moapi.” A sa kaya o Jiova.

45O ira era dro era sa tovolea me ra raica e dua na vanua me ra taqomaki kina ena koro o Esiponi. Ia o Esiponi na koro e a veiliutaki kina ena dua na gauna o Sioni na tui sa kama. Sa kama ena buka na nodra vanua na kai Moapi kei na nodra veiulunivanua na tamata dau via vala ni Moapi.

46Era sa vakaloloma na kai Moapi! Era sa vakarusai na tamata era sokalou vei Kimosi, ka ra sa kau vakabobula na luvedra yalewa kei na tagane.

47Ia ena gauna mai muri au na cakava me ra tiko vinaka tale na kai Moapi.” Oqo na veilewai ni Kalou ki Moapi.