1Ena gauna e tui kina e Juta o Jo-akimi na luve i Josaia, a tukuna vei Jeremaia na Turaga o Jiova,
2Lako mada ki na nodra mataqali na luve i Rekapi ka veivosaki kei ira. Kauti ira mai ki na dua na rumu ni vale e loma ena Valenisoro ka solia vei ira eso na waini.”
3Ia au sa mai kauti Jiasinaia yani na luve i Jeremaia, na luve i Epasinaia kei ira kece na tacina kei na luvena,
4ka kauti ira ki na Valenisoro. A kauti ira yani ki na tiki ni vale sa nei luve i Enani na luve i Ikitalia, na tamata ni Kalou. Na rumu ni vale oqo e volekata na nodra rumu ni vale na vakailesilesi ena dela ni rumu ni vale i Maseia na luve i Salumi na i vakatawa ni katuba, ni Valenisoro.
5Au sa mai biuta yani e matadra na kawa i Rekapi na bilo kei na so na saqa ni waini, ka kaya vei ira, “Ni gunu waini mada.”
6Ia era a qai kaya, “Keimami sega ni dau gunu waini baleta ni ra a tukuna vei keimami na neimami qase o Jonatapi na luve i Rekapi me keimami kakua sara ni gunu waini, ka vakakina o ira na neimami kawa.
7A sa kaya talega me keimami kakua ni tara vale se teitei, me keimami kakua ni tea se volia e dua na loganivaini. A vakaroti keimami me keimami tiko voli ga ena valelaca ena neimami gauna ni bula taucoko, me keimami na tiko voli ga kina ena vanua keimami tiko kina me vakataka na vulagi.
8Keimami sa muria kece na veivakaro i Jonatapi na luve i Rekapi, na neimami qase. Keimami sega ni gunu waini ka vakakina o ira na wati keimami kei ira na luve i keimami tagane kei na yalewa.
9Keimami sega ni tara vale me keimami tiko kina, ka sega ni dua na neimami loganivaini, vanua se itei ni sila, se witi.
10Keimami tiko voli ga ena veivalelaca. Keimami muria ka cakava na veika kece sara a vakaroti keimami kina o Jonatapi na neimami qase.
11Ia a curuma mai na vanua oqo o Nepukanesa na tui Papiloni, keimami a nakita me keimami lako mai ki Jerusalemi ni keimami sa rerevaki ira na veimataivalu ni Papiloni kei Siria. Sa i koya o ya na vuna keimami a mani tiko kina e Jerusalemi.”
12A sa kaya vei Jeremaia o Jiova,
13Sa tukuna na Turaga Qaqa na nodra Kalou na Isireli, “Lako ka tarogi ira na lewe i Juta kei ira na lewe i Jerusalemi se cava era bese kina ni vakarorogo vei au ka muria na noqu i vakaro?
14O ira na kawa i Jonatapi era a muria na nona i vakaro me ra kakua ni gunu waini, a sega sara ni dua vei ira a bau gunu waini me yacova na siga edaidai, baleta ni ra muria na i vakaro ni nodra qase. Ia oi au, au a vosa tikoga vei kemuni, o ni a sega sara ni vakarorogo vei au.
15Au a talai ira tikoga mai na noqu dauveiqaravi na parofita vei kemuni ka ra a tukuna vei kemuni mo ni biuta tani na nomuni tovo ca ka cakava na ka dodonu. Era a vunauci kemuni mo ni kakua ni qarava na veikalou tani, mo ni na tikoga kina ena vanua au a solia vei kemuni kei na nomuni qase.
16O ira na kawa i Jonatapi era a talairawarawa ki na noqu i vakaro.
17Sa i koya oqo a kaya kina na Turaga Qaqa na nodra Kalou na Isireli, ‘Au sa na kauta mai vei kemuni na lewe i Juta kei Jerusalemi na veivakarusai au a yalataka. Au na cakava na ka oqo baleta ni o ni bese ni vakarorogo ena gauna au a vosa kina vei kemuni, ka bese ni rogo mai ni'u kacivi kemuni.”
18A qai tukuna o Jeremaia vei ira na mataqali i Rekapi ni a tukuna na Turaga Qaqa, na nodra Kalou na Isireli, “O ni sa muria na i vunau a solia vei kemuni o Jonatapi na nomuni qase; o ni a muria kece na nona i vakavuvuli ka cakava na ka kece a vakarota vei kemuni.
19O koya oqo a kaya kina na Turaga Qaqa na nodra Kalou na Isireli. E sega ni mudu ena kawa i Rekapi na tagane me na qaravi au.”
Who We AreWhat We EelieveWhat We Do
2025 by iamachristian.org,Inc All rights reserved.
