2 Veigauna 32 - Vakavakadewa Vou kei na iVola tale eso（FNVDC12）

Na Kaba Vakaivalu i Senakaripi(2Tui 18.13-37; 19.14-19; Aisea 36.1-22; 37.8-36)

1Ni oti na veika kece sa vakayacora ena yalodina vei Jiova o Esekaia, a sa curuma vakaukauwa mai na vanua o Juta na tui Asiria o Senakaripi. A sa vesuka vakaukauwa na veikoro sa vakabai, ka sa nanuma ni na nona na qaqa.

2Ni sa raica o Esekaia na i naki i Senakaripi me valuti Jerusalemi talega,

3a sa qai bosea kei ira na nona i vakailesilesi me ra sogota na drodro ni wai mai na veimataniwai vure era tu ena taudaku ni koro; ka ra a vukei koya kina.

4Era a qai soqoni vata mai na lewenivanua e vuqa, era a sogota na veimata ni wai vure kece, ka tabonaka na soniwai sa drodro ki na loma ni vanua, ka sa sega tale kina ni qai drodro yani e dua na wai.

5A sa vaqaqacotaka o Esekaia na taqomaki ni koro ena nona vakavinakataka na bainikoro, ka tara kina eso na vale ni yadra balabalavu, ka qai tara e dua tale na bai e dakuna. E kuria oqo na nona vakavinakataka na i taqotaqomaki ka tara koto ena vanua bulu e toka ena yasana ki na tokalau ni tikina makawa ni koro o Jerusalemi. A sa bulia talega e vuqa na i yaragi kei na i sasabai.

6A sa lesi ira na turaganivalu o koya me lewai ira na tamata, ka vakasoqoni ira vata mai ena rara sa donuya na matamata ni koro. A sa vosa ni veivakauqeti vei ira, ka kaya,

7Ni kaukauwa ka qaqa. Ni kakua ni rere se taqaya ena vuku i tui Asiria kei ira na nona mataivalu e vuqa era sa salavata mai. Sa levu cake sara na kaukauwa e tiko e yasada mai na kena e tiko vua.

8E tiko vua na kaukauwa vakatamata, ia sa tiko kei keda o Jiova na noda Kalou me vukei keda, ka vala ena vukuda. Era sa vakayaloqaqataki na tamata ena veivosa oqo ni nodra tui.

9Ena dua na gauna e muri, ni donumaka na nona a se tiko ga e Lakisi o Senakaripi kei na nona mataivalu, a sa vakadewataka yani o Senakaripi kivei Esekaia kei ira na Juta era tiko vata mai Jerusalemi na i tukutuku oqo:

10Oqo na vosa i Senakaripi na tui Asiria: O ni sa vakanuinui tiko li ena cava, ni kemuni sa tiko wele voli ga ka dina ga ni sa vesuki vakaukauwa o Jerusalemi?

11Sa sega beka ni vakacalai kemuni o Esekaia, ni sa soli kemuni yani mo ni mate ena viakana kei na viagunu, ena nona kainaka voli vei kemuni, Ena vakabulai keda o Jiova na noda Kalou mai na ligana na tui Asiria?

12A sega li ni o Esekaia vata ga oqo ka a vakacacana na veivanua ni sokalou kei na vakacaboisoro vei Jiova, ka qai tukuna vei ira na lewenivanua e Juta kei Jerusalemi me ra sokalou ka vakacacabo ena dua ga na i cabocabonisoro?

13O ni sega beka ni se kila na ka era a vakayacora na noqu qase vata kei au vei ira na tamata ni veivanua eso? Era a vakabulai ira li na lewenivanua oqo o ira na nodra veikalou mai na liga i tui Asiria?

14Ena gauna cava mada e sa bau veivakabulai kina na nodra kalou na veimatanitu vei ira na nodra tamata mai na ligaqu? Ia na cava mo ni qai nanuma kina ni rawa ni vakabulai kemuni na nomuni Kalou mai na ligaqu?

15Ena ka oqo, mo ni kakua kina ni qai vakatarai Esekaia me vakaisini kemuni, se me vakacalai kemuni vakaoqo; ni kakua talega ni vakadinati koya, ka ni a sega ni dua na kalou mai na dua na vanua se matanitu sa kaukauwa cake me vakabulai ira na nona tamata mai na ligaqu se mai na ligadra na noqu qase. Ena qai rawa vakacava vua na nomuni Kalou me vakabulai kemuni mai na ligaqu!

16O ira na i vakalesilesi ni Asiria sa tukuna talega na veivosa ca lelevu me baleti Jiova na Kalou kei Esekaia, na tamata ni Kalou.

17A vola talega o Senakaripi na tui Asiria eso na i vola, ka vakasewasewani kina o Jiova na nodra Kalou na Isireli, ka vosa vakacacataki koya, ka vaka, Me vaka ni ra sa sega ni vakabulai ira rawa na nodra tamata mai na ligaqu o ira na kalou ni veimatanitu eso, ena sega talega ni vakabulai ira rawa na nona tamata mai na ligaqu na Kalou i Esekaia.

18Era a kailavaka vakadomoilevu ena vosa vakaiperiu vei ira na lewenivanua e Jerusalemi era tiko ena dela ni bai, me vakarerei ira ka vakayalolailaitaki ira, me na rawarawa kina na kena tauri vakavesu na koro.

19Era sa vosa vakaoqo me baleta na Kalou ni Jerusalemi baleta ni ra nanuma ni sa vaka ga na nodra kalou na tamata tale eso ni vuravura, na kalou matakau sa bulia na liga ni tamata.

Na Druka kei Na Mate i Senakaripi(2Tui 19.1-37; Aisea 37.1-38)

20Ia ena vuku ni ka oqo, e rau a masu ka tagi kina ki lomalagi o Esekaia na tui, kei Aisea na parofita, na luve i Emosi.

21A tala mai e dua na agilosi o Jiova ka qai la'ki vakamatei ira na tamata qaqa kecega, na nodra i liuliu, kei ira na turaganivalu ena i tikotiko ni valu i Senakaripi na tui Asiria. A lesu o Senakaripi ki na nona vanua ena mata madua. Ia ni yaco yani o koya ki na nona burekalou, era a vakamatei koya ena i seleiwau, eso na luvena dina.

22A vakabulai Esekaia kei ira na kai Jerusalemi o Jiova, mai na liga i Senakaripi na tui Asiria, mai na ligadra talega na kena meca eso; ka sa vakaceguya na Kalou na veiyasana kecega.

23Era a lewe vuqa era kauta mai na i solisoli vei Jiova, e Jerusalemi ka, vakakina na vatu talei eso me ka ni loloma vei Esekaia na tui Juta; ka vakalagilagi kina o koya e matadra na veimatanitu kecega me vakatekivu mai na gauna o ya kei na veigauna mai ki muri.

Na Tauvi Mate kei na Viavialevu i Esekaia(2Tui 20.1-3,12-19; Aisea 38.1-3; 39.1-8)

24Ena gauna o ya, a tauvi mate kina o Esekaia, ka voleka sara ni mate; a masu vei Jiova o koya ka mani saumi na nona masu ka soli vua e dua na i vakatakilakila.

25Ia a sega ni caka vinaka tale o Esekaia me vaka na ka vinaka a caka vua, ni a viavialevu ka dokadoka na yalona, ia ni vaka tu oqo, a yaco kina vei Esekaia na cudru, ka vakakina vei ira na Juta, e Jerusalemi.

26Ia a vakamalumalumutaki koya o Esekaia ka mani sega kina ni yaco vei ira na cudru i Jiova ena gauna i Esekaia.

Na i Yau kei na Cakacaka i Esekaia(2Tui 20.12-19; Aisea 39.1-8)

27A vutuniyau sara o Esekaia, ka dokai talega; ka tara eso na veivaleniyau, me tu kina na siliva, na koula, na vatu talei, na ka boi vinaka, na i sasabai, kei na veimataqali i yaya talei kecega;

28na lololo talega me maroroi kina na sila, na waini, na waiwai; kei na bai ni veimataqali manumanu, kei na bai ni sipi.

29A vakarautaka talega na veikoro me nona, ka levu na nona qele ni sipi, kei na qele ni manumanu a taukena o koya, ni a solia vua na Kalou na i yau levu me nona.

30A botana na ulu ni wai o Qihoni o Esekaia, ka vagolea vaka ki na ra ni yasa ni koro i Tevita. A lako vakavinaka sara na veiliutaki i Esekaia.

31Ia ena vuku ni ka me baleti ira na talai mai vei ira na turaga mai Papiloni, o ira ka ra a talai mai vei Esekaia me vakataroga na veika mana taleitaki a yaco ena vanua, a biuti koya ga na Kalou me rawa kina ni vakatovolei koya, me rawa ni kila kina o koya na ka a tu e lomana.

Na i Cavacava ni Veiliutaki i Esekaia(2Tui 20.20-21)

32Ia oqo, na vo ni cakacaka i Esekaia, kei na nona i valavala vinaka, raica, a volai ena vola ni raivotu i Aisea na parofita, na luve i Emosi, ena kedra i Vola na Tui Juta kei Isireli.

33A mate o Esekaia ka ra buluti koya ena i cabecabe ki na kedra i bulubulu na luve i Tevita; ka ra vakarokorokotaki koya ena nona mate o ira kece na Juta kei ira na kai Jerusalemi. A lewa o Manasa na luvena, me kena i sosomi.