Tiko Voli mai na Lekutu 29 - Vakavakadewa Vou kei na iVola tale eso（FNVDC12）

Na i Madrali ena Solevu ni Yabaki Vou(Vsoro 23.23-25)

1Ena i matai ni siga ena i kavitu ni vula, mo ni qarava kina e dua na nomuni soqoni tabu; mo ni kakua ni cakava kina na cakacaka o ni dau cakava ena veisiga. Oqori na siga mo ni uvu davui kina.

2Ia mo ni vakacabora kina e dua na i soro kama, me boi vinaka vei Jiova: me dua na luve ni bulumakau tagane, e dua na sipi tagane, ka vitu na lami tagane yabaki yadua ka sega ni dua na ka e ca kina.

3Na nomuni madrali laukana me waki vata na valawa digitaki kei na waiwai me tolu na kilokaramu ena dua na i vakarau me cabori vata kei na yadua na bulumakau ka rua na kilokaramu me cabori vata kei na dua na sipi tagane,

4kei na dua na kilokaramu ena veiyadua na luve ni sipi e vitu,

5kei na dua na me tagane me i soro ni valavala ca mo dou sorovaki kina.

Na i Madrali ni Siga ni Veisorovaki(Vsoro 23.26-32)

6Oqo me ra i kuri ki na i soro kama ni vula vou kei na kena i madrali laukana, kei na i soro kama sa vakacabori ena veisiga kei na kena i madrali laukana kei na medra i madrali liviraki, me vaka na kena i valavala vei ira, me boi vinaka na i madrali sa vakacabori ena bukawaqa vei Jiova.

Na i Madrali ena Siga ni Veisorovaki(Vsoro 23.26-32)

7Ena i katini ni siga ni kavitu ni vula me dua kina na nomuni soqoni tabu, ka mo ni vakamalumalumutaka na yalomuni; mo ni kakua ni cakava kina e dua na cakacaka.Vsoro 16.29-34

8Mo ni vakacabora e dua na i soro kama vei Jiova; ka me boi vinaka: me dua na luve ni bulumakau tagane, e dua na sipi tagane, kei na vitu na lami tagane yabaki yadua; me kakua ni dua na ka me ra ca kina.

9Na kedra i madrali laukana na valawa matailalai sa veiwaki vata kei na waiwai, me tolu na kilokaramu me baleta na bulumakau, e rua na kilokaramu me baleta na sipi tagane,

10ka dua na kilokaramu me baleta na lami yadua e vitu;

11me dua talega na me tagane me i soro ni valavala ca, me i kuri ni soro ni valavala ca sa ia kina na veibulubuluti, kei na i soro kama sa cabo ena veisiga kei na kena i madrali laukana, kei na medra i madrali liviraki.

Na i Madrali ni Solevu ni Valetabanikau(Vsoro 23.33-44)

12Ena i katini kalima ni siga ena i kavitu ni vula, me dua kina na nomuni soqoni tabu; ni kakua ni cakava kina e dua na cakacaka bibi o ni dau cakava e veisiga, ia mo ni vakayacora e dua na kana vata vei Jiova me siga vitu;

13ka mo ni vakacabora e dua na i soro kama, a i soro sa cabori ena bukawaqa, me ka boi vinaka vei Jiova; me tinikatolu na bulumakau gone, rua na sipi tagane, kei na tinikava na lami tagane sa yabaki yadua, me kakua sara na kena ca.

14Me kedra i madrali laukana na valawa matailalai sa veiwaki vata kei na waiwai; e tolu na kilokaramu me baleta na sipi tagane yadudua vei ira na lewe tinikatolu, e rua na kilokaramu me baleta na sipi tagane yadua,

15ka dua na kilokaramu me baleta na lami yadua e tinikava:

16me dua talega na me tagane me i soro ni valavala ca, me i kuri ni i soro kama sa dau vakayacori tiko, na kena i madrali laukana, kei na mena i madrali liviraki.

17Ena i karua ni siga ni kanavata, ni vakacabora e tinikarua na bulumakau gone, e rua na sipi tagane, e tinikava na lami tagane sa yabaki yadua ka sega na ka e ca kina;

18kei na i madrali laukana kei na i madrali liviraki me baleta na bulumakau, na sipi tagane, kei na lami, me veirauti kei na kedra i wiliwili, me vaka na kena i valavala;

19me dua talega na me tagane me i soro ni valavala ca, me i kuri ni soro kama sa dau vakayacori tiko, kei na kena i madrali laukana, kei na medra i madrali liviraki.

20Ena i katolu ni siga, me tinikadua na bulumakau, e rua na sipi tagane, e tinikava na lami tagane yabaki yadua sa sega na ka e ca kina;

21kei na i madrali laukana, kei na i madrali liviraki me baleta na bulumakau, na sipi tagane, kei na lami, me veirauti kei na kedra i wiliwili, me vaka na kena i valavala;

22me dua talega na me tagane me i soro ni valavala ca; me i kuri ni soro kama sa dau vakayacori tiko kei na kena i madrali laukana, kei na mena i madrali liviraki.

23Ena i ka va ni siga, me tini na bulumakau, rua na sipi tagane, ka tinikava na lami tagane sa yabaki yadua sa sega na ka e ca kina;

24vata kei na i madrali laukana, kei na i madrali liviraki me baleta na bulumakau, na sipi tagane, kei na ka me baleta na lami, me veirauti kei na kedra i wiliwili, me vaka na kena i valavala:

25me dua talega na me tagane me i soro ni valavala ca, me i kuri ni i soro kama sa dau vakayacori tiko na kena i madrali laukana, kei na mena i madrali liviraki.

26Ena i kalima ni siga, me ciwa na bulumakau, rua na sipi tagane, ka tinikava na lami tagane yabaki yadua, ka sega na ka e ca kina;

27vata kei na i madrali laukana kei na i madrali liviraki me baleta na bulumakau, na sipi tagane, kei na lami me veirauti kei na kedra i wiliwili, me vaka na kena i valavala;

28me dua talega na me tagane me baleta e dua na i soro ni valavala ca, me i kuri ni soro kama sa dau vakayacori tiko kei na kena i madrali laukana, kei na mena i madrali liviraki.

29Ena i kaono ni siga: me walu na bulumakau, rua na sipi tagane, ka tinikava na lami tagane yabaki yadua sa sega na ka ca kina,

30kei na i madrali laukana, kei na i madrali liviraki me baleta na bulumakau, kei na sipi tagane, kei na lami, me veirauti kei na kedra i wiliwili, me vaka na kena i valavala;

31me dua talega na me tagane me i soro ni dua na i valavala ca, me i kuri ni soro kama sa dau vakayacori tiko, na kena i madrali laukana, kei na mena i madrali liviraki.

32Ena i kavitu ni siga, me vitu na bulumakau, rua na sipi tagane, tinikava na lami sa yabaki yadua sa sega na ka e ca kina,

33kei na i madrali laukana, kei na i madrali liviraki, me baleta na bulumakau, na sipi tagane, kei na lami, me veirauti kei na kedra i wiliwili, me vaka na kena i valavala;

34me dua talega na me tagane me baleta e dua na i soro ni valavala ca, me i kuri ni soro kama sa dau vakayacori tiko na kena i madrali laukana kei na mena i madrali liviraki.

35Ena i kawalu ni siga, me vakayacori kina e dua na nomuni soqoni ni vakarokoroko: mo kakua ni cakava kina e dua na cakacaka bibi o ni dau cakava e veisiga;

36ia mo ni vakacabora e dua na i soro kama, na ka sa cabori ena bukawaqa, me ka boi vinaka vei Jiova: me dua na bulumakau, dua na sipi tagane, ka vitu na lami tagane sa yabaki yadua sa sega na ka e ca kina;

37kei na i madrali laukana kei na i madrali liviraki me baleta na bulumakau, kei na sipi tagane, kei na lami, me veirauti kei na kedra i wiliwili, me vaka na kena i valavala;

38me dua talega na me tagane me i soro ni dua na i valavala ca, me i kuri ni soro kama sa dau vakayacori tiko, kei na kena i madrali laukana, kei na mena i madrali liviraki.

39Na veika oqo mo ni vakacabora vei Jiova ena nomuni veisolevu lokuci, mei kuri ni veika o ni a bubului kina, kei na nomuni i soro ena yalo e vinakata, na nomuni soro kama, na nomuni i madrali laukana na nomuni i soro liviraki, kei na nomuni i soro ni veivinakati.

40Sa qai tukuna o Mosese vei ira na Isireli me vaka na ka kecega sa vakarota vua o Jiova.