1Ni oti oqo, era a qai lako mai na luve i Moapi, kei ira na luve i Amoni, ka ra lako vata tiko mai kei ira eso na Amoni, me ra mai veivala kei Josefati.
2Era a vosa vei Josefati eso na tamata, ka kaya, Era sa lako vakaivalu mai vei kemuni e lewe vuqa sara mai Itomi, mai na tai ka dua ni wasawasa; ka raica, era sa tiko mai Eseonitamari oqori o Eniketi.
3A rere o Josefati, ka vakarau me vakasaqarai Jiova, ka kacivaka raraba e dua na lolo vakavanua e Juta taucoko.
4Era a soqoni vata na Juta, me ra kerea na veivuke vei Jiova; era a lako mai na veikoro e Juta me ra vakasaqarai Jiova.
5A tucake o Josefati vei ira na lewe ni vanua e Juta kei Jerusalemi ena vale i Jiova ena rara vou;
6ka kaya, Kemuni Jiova na nodra Kalou na neimami qase, o ni sega li ni Kalou mai lomalagi? O ni sega li ni lewa na veimatanitu kecega ena veivanua? Sa koto e ligamuni na kaukauwa kei na qaqa, ka sega kina ni dua me vorati kemuni rawa.
7Aisea 41.8; Jeme 2.23Kemuni na neimami Kalou, o ni sa sega li ni vakasavi ira tani na lewe ni vanua oqo e matadra na nomuni tamata na Isireli, ka solia ki na kawa i Epara-ama na nomuni i tokani ka tawa mudu?
8Era a tiko kina, ka tara kina e dua na vale tabu me nomuni, ena vuku ni yacamuni, ni ra kaya,
9Kevaka sa yaco vei keda e dua na ca, se na i seleiwau se na tau ni lewa, se na veicudruvi, se na mate levu, se na dausiga, keimami na tu ena mata ni vale oqo, e matamuni talega, ni sa tiko na yacamuni ena vale oqo, ka tagi vei kemuni ena dela ni neimami rarawa, o ni na qai rogoca mai, ka veivakabulai.
10 Vrua 2.4-19 Ia oqo, ni raica, na luve i Amoni kei Moapi, kei ira mai na ulunivanua o Sia, o ira o ni a sega ni laivi ira na Isireli me vala kei ira, ni ra a lako cake mai na vanua o Ijipita, era a levei ira vakatikitiki, ka sega ni vakacacani ira — raica,
11era a sauma tale vei keda, ena nodra mai vakasavi keda tani mai na nomuni votavota, o ni a solia me keimami taukena.
12Oi kemuni na neimami Kalou, o ni na sega li ni vakatau lewa vei ira? Ni sa sega vei keimami na kaukauwa me vorati ira rawa na lewe vuqa oqo era sa lako mai me veivala kei keimami. Keimami sa sega ni kila na ka me keimami kitaka, ia sa rai ga yani vei kemuni na mata i keimami.
13Ia ena gauna e loma, era a tu ena mata i Jiova na Juta kecega, kei ira na nodra lalai, na watidra, kei na luvedra.
14A qai curu na Yalo i Jiova vei Jesieli, na luve i Sakaraia, na makubui Penaia, na luve i Jieli, na luve i Matanaia, e dua na Livai vei ira na luve i Esava, ni a tu vei ira na lewe ni vanua.
15Vrua 20.1-4A sa kaya o koya, Ni rogoca oi kemuni kecega na Juta kei kemuni na kai Jerusalemi, kei kemuni Josefati na tui: Sa vosa vakaoqo vei kemuni o Jiova, Ni kakua ni rere se taqaya me baleti ira na lewe vuqa oqo, ni sa sega ni nomuni na i valu, ka sa nona ga na Kalou.
16Ni lako sobu ni mataka, ka la'ki vala kei ira; raica, era na muria cake mai na i cabecabe ki Sisi; ia o ni na kunei ira ena boto ni buca, ena tokalau ni veikau o Jirueli.
17 Lako 14.13,14 Ena sega soti ni vinakati mo ni vala ena i valu oqo; ni tu vakaivalu ga, tu vakadua, ka sarava na qaqa i Jiova ena vukumuni, Oi kemuni Juta, kei Jerusalemi. Ni kakua ni rere, se taqaya; ni lako yani ka veivala kei ira ni mataka, ka na totaki kemuni o Jiova.
18A vakacuva na uluna o Josefati, ka cuva sobu ki na qele, era a cuva sobu vakakina o ira na kai Juta kecega kei ira na kai Jerusalemi, ena mata i Jiova, ka qaravi Jiova.
19Era a tucake na Livai, na luve i Koaca, kei na luve i Kora, me ra vakavinavinaka vakadomoilevu sara vei Jiova na nodra Kalou na Isireli.
20Era a sou ena mataka, ka lako yani ki na veikau o Tikoa; ia ni ra lako tiko yani, a tucake o Josefati ka kaya, Ni rogoci au oi kemuni na Juta kei kemuni na kai Jerusalemi! Ni vakabauti Jiova na nomuni Kalou, ka o ni na vakataudeitaki kina; ni vakadinati ira na nona parofita, mo ni na cakacaka yaco kina.
21Ni veivosaki oti kei ira na tamata, a lesia na tui eso vei ira na daunivakatagi me ra daramaka na nodra i sulu tabu ka liutaka na tayabe e matadra na lewe ni mataivalu, ka lagata na sere:
Me da vakavinavinaka vei Jiova,
Ni sa tudei ka tawa mudu na nona yalololoma.
22Ni ra tekivu laga sere ka vakavinavinaka, a sa vakatubura o Jiova e dua na tiko yavavala ena kedra maliwa na veimataivalu era kabai ira mai na Juta.
23O ira na Amoni kei na Moapi era a mokuti ira na lewe ni mataivalu ni Itomi se o ira na kai Ului Sia, ka vakarusai ira. Ni ra vakamatei ira oti na kai Sia, era sa qai veivakamatei ga vakataki ira.
24Ia ni ra yaco yani na Juta ki na valeniyadra sa vakarewa i cake ka tiko ena vanua lala, era sa qai rai yani vei ira na meca ka raica ni ra sa veibikabikai tu na yago ni mate e dela ni qele. E a sega ni dua na tamata me dro bula rawa.
25Ia ni sa toso yani o Josefati kei ira na nona tamata me ra kauta mai na i toki ni valu, era a kunea e vuqa sara na bulumakau, na i yau, na i sulu, kei na veika yaga tale eso. A taura e tolu na siga na nodra kumuna vata tiko na i toki ni valu, ia sa rui sivia na kena levu ka ra mani sega kina ni kauta lesu kece.
26Ena i kava ni siga, era a qai soqoni vata yani ena Buca o Beraka ka vakalagilagi Jiova mai kea ena vuku ni veika a vakayacora. Sa i koya oqo na vuna sa vakatokai kina na tikina o ya me Buca o Beraka me yacova na siga oqo.
27A liutaka na i lakolako lesu i Juta o Josefati ena reki, baleta ni a vakarusai ira na kedra meca o Jiova.
28Ni ra yaco yani ki Jerusalemi, era a tayabe yani ki na Valenisoro kei na domo ni vakatagi mai na api kei na davui.
29A sa tarai ira na veimatanitu kecega na yalo ni rerevaka na Kalou ena gauna era rogoca kina na nona a vakarusa o Jiova na kedra meca na Juta.
30A sa yaco na tiko sautu ena dela ni veiliutaki vakatui i Josefati, ni sa taqomaki koya na Kalou ena veiyasana.
Na i Cavacava ni Veiliutaki i Josefati(1Tui 22.41-50)31A sa yaco me tui Juta o Josefati ni sa yabaki 35, ka veiliutaki mai Jerusalemi me yabaki 25. Na yaca i tinana o Asupa, na luve i Sili.
32Me vaka na i valavala i Asa na tamana, sa dau vakayacora o koya na ka e dodonu ena mata i Jiova,
33ia sa sega ga ni vakarusa laivi na veivanua ni sokalou ki na kalou tani. Sa sega talega ni ra vagolea taucoko na lomadra na tamata ki na kena qaravi na Kalou ni nodra qase.
34Na veika taucoko sara sa vakayacora o Josefati, mai na i tekivu ni nona veiliutaki vakatui ki na kena i cavacava, sa volai tu ena i Vola Tukutuku i Jeu na Luve i Anani, ka oqo e tiki ni Kedra i Vola Tukutuku na Tui Isireli.
35Ia ena dua na gauna e muri, sa qai cakava e dua na veidinadinati o Josefati kei Easaia na tui Isireli, o koya sa kitaka e levu na i tovo vakasisila.
36E rau a duavata ena cakacaka ni ta waqa me soko ki Tasisi, ka toka na nodrau volau ni ta waqa mai Esionikeperi.
37E a qai parofisai o Iliesa na luve i Totavau mai na koro o Maresa, ka vakasalataki Josefati, ka kaya, Ena vuku ni nomu veidinadinati kei Easaia, ena vakarusa kina o Jiova na veika kece sara o sa cakava. Era a qai voca kece na waqa, ka sega ni soko rawa ki Tasisi.
Who We AreWhat We EelieveWhat We Do
2025 by iamachristian.org,Inc All rights reserved.
