Same 74 - Vakavakadewa Vou kei na iVola tale eso（FNVDC12）

1Kemuni na Kalou, a cava o ni sa biuti keimami kina vakaoqo?

O ni na cudruvi ira tikoga li na nomuni tamata ka sega ni mudu?

2Ni nanumi ira mada na nomuni tamata,

O ira o ni a digitaka me ra nomuni ena gauna makawa sara,

Io, na kawa tamata o ni a vakabula me nomuni yavusa digitaki.

Ni nanuma na Ulunivanua o Saioni, na vanua o ni a dautiko kina.

3Ni vakalakova mada na veika kece sa rusa tu oqo;

Era sa vakacacana na neimami meca na ka kecega ena Valenisoro!

4Era sa kaila ga ena qaqa na kemuni meca ena nomuni vale tabu;

Ka rra sa vakaduria kina na nodra drotini me dusia na nodra sa qaqa.

5Era sa vaka na i rairai ni tamata daumusu kau

Era sa musumusulaka sobu na veikau ena nodra i matau.

6Era sa musulaka na kau kece sa ceuti

Ena nodra matau kei na i tukituki.

7Era sa vakacacana na nomuni Valenisoro ka vakama ena buka;

Ka ra sa vakadukadukalitaka sara na vanua o ni dau qaravi kina.

8Era sa vinakata talega me ra vakarusai keimami vakadua;

Era sa vakama kece na veivanua tabu ena vanua oqo.

9Sa yali kece na neimami vakatakarakara tabu;

Sa sega tale ni qai vo e dua na parofita,

Ka sa sega ni bau dua e kila se cava na dede ni veika oqo.

10Ena vakacava soti na kena dede, kemuni na Kalou,

era na vakalialiai keimami tikoga kina na neimami meca?

Era na vakacacana tikoga li na yacamuni me tawa mudu?

11Na cava o ni bese tiko kina ni vukei keimami?

Na cava o ni biuta tiko kina na ligamuni ki na dakumuni?

12Ia o ni sa neimami tui na Kalou mai na i vakatekivu,

O ni sa qaqa vakavuqa e vuravura.

13 Lako 14.21 O ni sa wasea rua na wasawasa ena nomuni kaukauwa levu

Ka vorolaka na uludra na drakoni e loma ni wasa.

14 Jope 41.1; Same 104.26; Aisea 27.1 O ni sa vorolaka na ulu i Livaiacani,

Ka solia na yagona me kedra era sa tiko ena vanua dravuisiga.

15O ni sa cakava na mataniwai kei na tobu wai;

Ka vakamacara na veiuciwai lelevu.

16Sa nomuni na siga, ka sa nomuni talega na bogi;

O ni sa vakatikora na siga kei na vula ena kedrau dui i tutu;

17O ni sa yalana na i yalayala kei vuravura.

Ka o ni sa lesia na vula i katakata kei na vula i batabata.

18Ia, mo ni nanuma ga, i Jiova,

Ni ra sa dau veiwalitaki kemuni o ira na nomuni meca;

Era sa tamata tawa vakabauta ga ka beca na yacamuni.

19Ni kakua ni biuti ira tu na nomuni tamata malumalumu

vei ira na kedra meca i tovo kaukauwa;

Ni kua ni guilecavi ira na nomuni tamata era sa vakararawataki.

20Ni nanuma na veiyalayalati o ni sa cakava kei keimami.

Sa tu na i tovo kaukauwa ena veiyasana butobuto ni vanua oqo.

21Ni kakua ni laivi ira era vakararawataki me ra vakadrukai,

Ni laivi ira ga na dravudravua ka vakaloloma

me ra vakacaucautaki kemuni.

22Mo ni tucake na Kalou, ka taqomaka na nomuni dodonu!

Mo ni dau nanuma ni ra sa ia ga na veiwalitaki kemuni

na tamata lecaika ena veisiga yadua.

23Ni kua ni guilecava na nodra kaila ni vakacudrucudru

na kemuni meca,

Na rorogo sa sega ni mudu rawa mai vei ira era saqati kemuni.

Sa Turaganilewa na Kalou

Vua na i liuliu: me vaka na i lagalaga ni “Kakua ni Vakarusa.” A Same i Esava. A Sere.