Siraki 18 - Vakavakadewa Vou kei na iVola tale eso（FNVDC12）

Na Cecere ni Kalou

1O koya e bula tawamudu a bulia na vuravura taucoko,

2na Turaga duadua e yalosavasava,

3 e sega tale e dua merau lewe rua. E tubera na vuravura e na qeteqete ni ligana, era vakarorogo vua na veikabuli, baleta ni tui ni veika kece: nona kaukaua e wasea kina na ka tabu kei na ka tawakilikili.

4E sega ni dua e solia vua na kaukaua me tusanaka na nona cakacaka; o cei e rawa ni kila na nona cakacaka lelevu?

5O cei e rawa ni vakarautaka na nona kaukaua vakatui? O cei e rawa ni tukuna taucoko na nona loloma?

6E sega ni rawa ni vakalailaitaki se vakalevutaki, sega ni rawa na kila taucoko na lagilagi ni Turaga.

7Ni sa lai tinia na nona vakamacalataka, e se qai tekivu ga; e sega na vosa me kovuta taucoko.

8Na cava na tamata, na cava na betena? Na cava e vinaka kina, na cava e ca?

E tawayaga na tamata

9Sa levu na nona yabaki ke sa yacova na dua na drau.

10Ni laurai vata na gauna tawayalani, na vica na yabaki qori e vaka na turu ni wai e loma ni wasawasa se dua na mata ni nuku.

11E dau vosota vakadede gona na Turaga, sovaraka vei ira na tamata na nona loloma.

12E raica, e kila ni na ca na nodra itinitini, mani levu na nona vosoti ira.

13Na tamata e lomana ga na wekana, na Turaga e lomani ira na veikabula.

E veidusimaki, veituberi, veivakavulici, e vagolei ira lesu me vaka e cakava na ivakatawanisipi vua nona qelenisipi.

14E lomani ira era ciqoma na nona veivakadodonutaki ra namaka na nona lewa.

Na veivukei kei na loloma

15Na luvequ, kua ni karakara nio vukea e dua, se mo tauca na vosa mosimosi nio soli iloloma.

16E sega beka ni vakalailaitaka na katakata na tegu? E vinaka vakina na vosa mai na iloloma.

17E sega beka ni sivita na iloloma vinaka na vosa? Na ka ruarua qori e tu vua na tamata yalovinaka.

18Na lialia, e sega vua na yalovinaka, e dau cudrucudru; nona iloloma tale ga na tamata buroburogo e na sega ni serau kina na mata.

Dikevi iko

19Vuli mada ni se bera nio vosa; kauaitaka nomu bula ni se bera nio tauvimate.

20Dikevi iko mada ni bera nio beitaki, o na qai vosoti e na gauna ni veilewai.

21Mo vakuai iko rawa ni se bera nio totogitaki e na tauvimate; mo saumaki mai nio sa vakarau cala.

22Me kua ni dua na ka e tarovi iko e na nomu rokova sara na nomu yalayala, kua ni waraka me sa voleka o mate o qai cakava.

23Vakarautaki iko ni bera nomu yalayala, kua ni vakatovolea na yalovosota ni Turaga.

24Nanuma na nona cudru e na siga ni nomu mate, vakina na nona vuki tani vei iko e na siga ni veilewai.

25E na gauna ni sautu, nanuma na gauna ni viakana. E na gauna ni vutuniyau, nanuma na gauna ni dravudravua kei na leqa.

26E yaco na veisau mai na mataka me yacova na yakavi; e rawa ni vuki totolo na Turaga.

27Na tamata yalomatua e dikeva malua na ka kece; e na gauna ni valavalaca e qarauna me kua ni cala.

28Na tamata vuku e na kila rawa na yalomatua, e vakacerecerei koya e kunea.

29O ira era kila na ivosavosa, era sa matau mai kina, ra dau tauca na vosa vakaibalebale veiganiti.

Vakatulewa matau

30Kua ni muria na lomamu garogaro, tarova na nomu gagano.

31Keo laiva na yalomu me marautaka na gagano ca, era na dredrevaki iko na kemu meca.

32Kua ni marautaka na bula dakoba de na vakadravudravuataki iko na kena isau.

33Kua ni vakaleqai iko ni lala tu nomu taga o qai kere ilavo mo caka solevu ni kanavata kina.