Tiko Voli mai na Lekutu 11 - Vakavakadewa Vou kei na iVola tale eso（FNVDC12）

Na Vosa Kudrukudru ena Loma ni Vanua Lala

1Era sa qai vosa kudrukudru na tamata ena vuku ni veileqa sa yacovi ira ki vei Jiova. Ni sa rogoca o Jiova, sa qai cudru ka vakatala na nona bukawaqa vei ira na tamata. Na bukawaqa ni cudru i Jiova sa vakamai ira ka vakacacana e dua na yasa ni nodra i tikotiko.

2Era sa tagi vei Mosese o ira na tamata; sa qai vakamamasu vei Jiova o Mosese, ka sa mudu kina na kama.

3Sa qai vakatokai na vanua o ya me yacana o Tapera, baleta ni a yaco kina na kama mai na bukawaqa i Jiova.

Digitaka o Mosese e Vitusagavulu na i Liuliu

4Eso na vulagi ka lako vata voli kei ira na Isireli era sa dau garova vakalevu na kana lewe ni manumanu; ia era sa garova vakakina talega na Isireli, ka kaya, “Isa, me bau dua mada ga na lewe ni manumanu me da kania!

5Eda dau kana ika vakalevu sara mai Ijipita, ka sega ni da volia. O ni bau vakasamataka li na kiukaba, na meleni, na liki, na varasa, kei na qaliki eda dau kania mai kea?

6Ia oqo, sa oti na noda kaukauwa. Sa sega tale ni qai dua na ka eda kania, ia na mana duadua ga ena veisiga yadudua.”

7Na mana oqo sa vaka na sorenikau lailai, kei na rokana sa vulavula siyawa ka viavia la'ki dromodromo.

10A sa rogoca o Mosese na nodra tagi na tamata ena nodra veimatavuvale kece sara, ka ra sa tu o ira na tamata ena katuba ni nodra dui valelaca. A sa tubu vakalevu kina na cudru i Jiova, ka sa rarawa talega o Mosese.

11Sa qai kaya vei Jiova o Mosese, “A cava na vuna o ni sa rui vakararawataki au kina na nomuni tamata? A cava na vuna au sa sega ni kune loloma kina e matamuni, mo ni tauca kina vei au na kedra i colacola na tamata kecega oqo?

12Au a vakasucumi ira li mai na tamata kecekece oqo, mo ni kaya kina vei au, ‘Mo keveti ira voli e lomaseremu, me vaka na nasi sa roqota voli e dua na gone dramidrami, ki na vanua o ni sa bubuluitaka tu ni o ni na solia vei ira na nodra qase?’

13Me'u kauta mai vei na lewe ni manumanu me keimami kania. Era sa vosa kudrukudru tikoga ka via kania na lewe ni manumanu.’

14Sa sega ni rawa ni'u qaravi ira na tamata kece oqo, ni sa rui bibi vei au na kena i colacola.

15Kevaka o ni sa cakava vakaoqo vei au, mo ni vakamatei au sara kevaka o ni sa lomani au, me'u kakua kina ni raica na noqu vakaloloma.”

16Sa qai kaya vei Mosese o Jiova, “Mo vakasoqoni ira vata mai vei au e lewe vitusagavulu na qase ni Isireli, o ira o kila ni ra na dauveiliutaki vinaka vei ira na tamata, ka kauti ira mai ki na Vale ni Veitavaki me ra tu vata kei iko e kea.

17Au na qai lako sobu yani me'u vosa vei iko mai kea, ka'u na wasea talega kivei ira na yalo vata ga kau sa solia vei iko. Era na colata vata kei iko na i tavi bibi ni nodra raici na lewenivanua, mo kakua kina ni colata vakataki iko ga.

18Mo kaya vei ira na tamata, ‘Ni vakasavasavataki kemuni me baleta na siga ni mataka, ka o ni sa na qai kana lewe ni manumanu. Sa rogoca o Jiova na nomuni vosa kudrukudru kei na tagi, ena nomuni tukuna voli, “O cei li me na vakani keda ena lewe ni manumanu? Ni sa vinaka vei keda na tiko mai Ijipita.” Ia sa solia vei kemuni o Jiova na lewe ni manumanu mo ni kania.

19O ni na sega ni kania tiko me siga dua wale ga, se me siga rua, se siga lima, se siga tini, se siga ruasagavulu,

20ia mo kania tiko ena loma ni dua taucoko na vula, me yacova sara ni sa la'ki basika tale mai daligamuni, ka sa velavela mai na kena i kanakana vei kemuni. Ena yaco oqo baleta ni o ni sa besetaki Jiova, o koya sa tiko kei kemuni, ka o ni sa qai tagi e matana, ka kaya, “Na cava li na vuna eda sa lako tani kina mai Ijipita?”

21Ia sa qai kaya o Mosese, “Era sa lewe 600,000 na tamata au sa kauti ira voli, ka o ni sa kaya ni o ni na vakani ira ena lewe ni manumanu me rauta e dua taucoko na vula?”

22Ena veirauti beka li ke ra vakamatei na qele ni sipi kei na qele ni bulumakau me kedra? Ena rauti ira beka li ke kumuni vata na ika kecega e wasawasa me kedra?”

23Sa qai tukuna vei Mosese o Jiova, “Sa vakaiyalayala beka li na noqu kaukauwa? O sa na vakarau raica se na yaco dina na noqu vosa vei iko, se sega!”

24A lako yani o Mosese ka tukuna vei ira na tamata na vosa kece i Jiova. Sa qai vakasoqoni ira vata na lewe 70 na i liuliu mai vei ira na nodra qase, ka tuvani ira me ra volita na vale tabu.

25A sa qai lako sobu mai o Jiova ena o, ka vosa vei koya, ka taura eso na yalo sa tu vua, ka solia vei ira na lewe 70 na i liuliu. Ni sa sobuti ira na yalo oqo, era sa qai vosa ena domo levu me vakataki ira na parofita, ka sega soti ni balavu na kena yaco oqo.

26Ia sa lewe rua na i liuliu mai vei ira na lewe 70 erau sa tiko ga e loma ni keba, a yacana e dua o Elitati kei na kena i karua o Metati, ka sa sobuti rau talega na yalo ka soli. E rau a sega ni lako yani ki na vale tabu, ia e rau sa vosa talega ena domo levu me vakataki ira na parofita ena loma ni keba.

27Sa qai cici yani e dua na cauravou, ka la'ki tukuna vei Mosese na ka e rau sa vakayacora tiko o Elitati kei Metati.

28Sa qai kaya o Josua na luve i Nuni, o koya na i vukevuke i Mosese, ka dua vei ira na nona tamata digitaki, “I Mosese na noqu turaga, mo ni tarovi rau!”

29A sa kaya vei Josua o Mosese, “O sa vuvu li ena vukuqu? Au diva mada ga me solia o Jiova na yalona vei ira na tamata kecega ka me ra vosa kece ena domo levu me vakataki ira na parofita!”

30Sa qai lesu tale o Mosese kei ira na i liuliu ki na nodra keba.

Vakarautaka o Jiova na Kueli

31Sa qai tala yani o Jiova e dua na cagi, ka vakavukaci ira yani na kueli mai wasawasa, ka ra vuka voli ga me rauta ni dua na mita mai na dela ni qele. Era sa la'ki ro toka na kueli me donuya na keba ka vica na kilomita vakarivirivi mai na veiyasana kece.

32Era sa qai kumuni kueli o ira na tamata ena siga taucoko o ya, kei na bogi taucoko, me yacova na siga taucoko ka tarava; ka sa sega ni dua na tamata me kumuna e lailai mai na dua na udolu na kilokaramu na kueli. Era sa qai dui vakasigana na kedra ena veiyasana e volita na keba.

33Ia, ni ra se kania tikoga na lewe ni manumanu, ka se bera ni tiloma, a sa waqa mai na cudru i Jiova vei ira na tamata, ka vakadewa ena kedra maliwa e dua na mate levu sara.

34Sa vakatokai kina me yaca ni vanua o ya o Kipiroci Ateva (a kena i balebale, “Bulubulu ni Gagano”), baleta ni ra a bulu kina o ira sa daugarova na lewe ni manumanu.

35Era sa qai toki na lewenivanua mai Kipiroci Ateva ki Eseroci; ka birika kina na nodra keba.