Vakarua 20 - Vakavakadewa Vou kei na iVola tale eso（FNVDC12）

Vakaro ni Veivaluvaluti

1Ni o ni sa lako ka vala vata kei ira na kemuni meca, ka raica ni sa levu cake na nodra qiqinivalu, nodra ose kei na nodra mataivalu mai vei kemuni, mo ni kakua sara ni rerevaki ira. Ena vala vata kei kemuni o Jiova na nomuni Kalou, o koya ka vakabulai kemuni mai na vanua o Ijipita.

2Ni bera ni tekivu na i valu, me qai lako mai e dua na bete me mai vosa ki na mataivalu,

3ka kaya, Kemuni na Isireli ni vakarorogo mada! E daidai o ni sa na lako yani mo ni vala. Kua sara ni rerevaki ira na kemuni meca, se yalolailai, se taqaya;

4ni sa lako vata kei kemuni o Jiova na nomuni Kalou ka na solia vei kemuni na qaqa.

5Me ra qai vosa na turaganivalu vei ira na tamata, ka kaya, E dua beka na tamata e tiko eke ka sa qai tara oti ga e dua na vale ka sa bera ni vakatabuya? Kevaka e tiko e dua me qai lesu yani o koya ki na nona i tikotiko. De na qai mate o koya ena i valu ka na qai dua tani tale na tamata ena vakatabuya na nona vale.

6E bau dua beka na tamata e tiko eke ka sa qai tea ga e dua na loganivaini ia a sega mada ni sa bau tauca na vuana? Kevaka e tiko e dua, me lesu tale o koya ki na nona vale, de na qai mate o koya ena i valu, ka na qai dua tale na tamata ena vakayagataka na i sevu ni vuana.

7E bau tiko beka eke e dua na tamata ka sa duguca oti e dua na goneyalewa me watina? Kevaka e tiko e dua, me lesu tale o koya ki nona vale. De na qai mate o koya ena i valu ka na qai dua tale na tagane e vakawatitaka na yalewa sa musuki oti tu vua.

8Era na kaya talega na turaganivalu vei ira na sotia, E bau tiko beka e dua na tamata sa yalolailai ka rere? Kevaka e tiko e dua, me lesu tale o koya ki na nona i tikotiko, de na qai vakayalolailaitaki ira talega na kena vo.

9Ia ni sa oti na nodra vosa na turaganivalu vei ira na sotia me ra qai veiliutaki yani na i liuliu ni veiwasewase.

10Ni o ni sa lako yani mo ni valuta e dua na koro, ni solia mada e liu vei ira na lewena na digidigi ni veisaututaki.

11Kevaka era sa dolava mai na matamata me ra soro, era na qai nomuni bobula, ia me ra vakacakacakataki vakaukauwa.

12Kevaka era sega ni via soro na lewena ka digitaka me ra vala, mo ni valuta sara na koro o ya.

13Ia ni sa soli ira vei kemuni o Jiova na nomuni Kalou ka o ni sa rawa sara na koro o ya, mo ni qai vakamatei ira kece sara na kena tagane.

14Ia mo ni qai tauri ira na yalewa, na gone, na manumanu kei na veika kece e tu ena koro o ya me ra nomuni i toki ni valu. Ni vakayagataka na veika kece e nodra na kemuni meca, sa solia vei kemuni o Jiova na nomuni Kalou.

15Me vaka o ya na veika mo ni vakayacora ki na veikoro era yawa mai vei kemuni ka ra sega ni koro ni vanua oqo.

16Ia ni o ni valuta na veikoro ena vanua sa solia o Jiova na nomuni Kalou mo ni taukena ni kakua tale ni vakabula e dua na ka bula.

17Vakarusai ira taucoko sara vakadua na tamata; o ira na Itaiti, na Amoraiti, na Kenaiti, na Perisaiti, na Ivaiti kei ira na Jepusaiti, me vaka sa vakarota o Jiova na nomuni Kalou,

18me ra kakua tale ni vakavulici kemuni mo ni cakava na veika vakasisila era dau cakava ni ra qaravi ira na nodra veikalou, ka o ni na qai valavala ca kina vei Jiova na nomuni Kalou.

19Ena gauna o ni valuta tiko kina e dua na koro, ni kakua ni tatalaka sobu na kena veikau vuata, veitalia ga kevaka e balavu sara na gauna o ni valuta tiko kina. Mo ni kania na vuana, ia ni kakua ga ni vakarusa na vuna; o ira na veikau vuata era sega ni kemuni meca.

20E rawa mo ni taya na veikau ka sega ni dau vua ka vakayagataka me nomuni i kabakaba me yacova ni sa vakadrukai na koro.