Yalomatua 19 - Vakavakadewa Vou kei na iVola tale eso（FNVDC12）

Nodra mate vakasakasaka na kai Ijipita

1Ia sa tau vei ira na tawadodonu na cudru tawaloloma me yacova na kena icavacava, nioni sa kila rawa tu na ka era na cakava,

2ni na veisau na lomadra mera vakamuri ira, dina nira sa sereki ira na nomuni tamata, ra vakusakusataki ira mera lako.

3Era se lolosi tiko e na bati ni ibulubulu, era baci tauca tale na lewa lialia mera vakasasataki ira tale na tamata era a vakamasuti ira cikevi ira mada mera vagalala.

4Era sa naulu tiko ga i na kedra kuita, era sa guilecava na ka sa yaco, me qai tau dina vei ira na kedra kuita na itotogi se vo mera cola,

5mera sota kaya na mate sakasaka, ia mera vakuria nomuni tamata na ilakolako veivakurabuitaki.

Na Kalou e tuberi ira, taqomaki ira nona digitaki

6Sa buli vou na veikabuli taucoko, me vaka nomuni lewa, mera viribaiti kina na luvemuni.

7Sa laurai na o ni vakaruguta na keba, sa votu na vanua mamaca, sa vuki na Wasa Damu me sala galala, vuki na ua codrocodro me buca drokadroka,

8era muri yani vakayasana e na ligamuni veimaroroi, e na nodra qoroya na cakamana.

9Era veiciciyaki vaka na ose, era veiladeyaki vaka na lami e na nodra vakacaucautaki kemuni saka e na nomuni sereki ira.

10Era se vakananuma nodra tiko tani ni a vura mai qele na navanava, sega na manumanu yaga, a vura mai uciwai na boto sega ni wili rawa, sega na ika.

11Oti, nira sa garova sara ga na kakana uasivi, era sa kunea e dua na mataqali manumanuvuka vou.

12Era cabe mai wasa na moa me oti kina nodra viakana.

Nodra kuitataki na kai Ijipita

13E sega ni dau tau na itotogi vei ira na tamata valavalaca, ke sega ni lutu rawa na kurukuru. E rauti ira vinaka na kedra itotogi, ni sega tale na vanua era sevaki vakalevu kina na vulagi.

14E so era dau bese ni ciqomi ira na vulagi, ia o ira qo era vakabobulataki ira tale na vulagi era via vukei ira.

15E so era totogitaki nira sega ni ciqomi ira na vulagi,

16ia o ira qo era sa kidavaki ira na vulagi e na soqo ni marau, wiliki ira mera tautauvata, era qai vakararawataki ira sara vakaca.

17E vakamatabokotaki tale ga na matadra, me vakataki ira e na matanivale ni qase yalododonu o Lote, ni sa solegi ira na buto, era vakayayamo mera dui vaqara nodra katuba ni vale.

Na kaukaua mana ni Kalou

18Sa veiveisau na veika kece, me vaka na domo ni api e dua tu ga na irorogo ni nota yadua, e duidui ga na kedra itautau. E matata vinaka na ka a yaconi laurai.

19Sa vuki na manumanu ni vanua me manumanu ni wai, na manumanu ni wai sa cabe i vanua.

20Na buka e caudre tu ga e wai, sa vaka e guilecava o ra wai ni dau bokoboko.

21Ia na yameyame, e sega ni bau kama kina na kabula era veilakoyaki tu e na kedra maliwa, se me waicala kina na kakana vakalomalagi waicala rawarawa.

22E na veika kece saka, oni sa vakacerecerea vakalagilagia nomuni matatamata, oni sega tale ga ni bureitaka na veivuke e na veigauna kei na veivanua.