Gk Esiteri D (15) - Vakavakadewa Vou kei na iVola tale eso（FNVDC12）

1A qai masu siga tolu o Esiteri. E na ikatolu ni siga ni sa masu oti, sa luvata na nona isulu ni vakaloloku qai tokara na isulu totoka.

2Sa ukucavu tu vakaranadi, sa qai kere veivuke vua na Kalou na iVakabula e raica na ka kece, sa qai kauti rau nona vada,

3e dua erau veiyabeni toka,

4na kena ikarua e tabea toka yani nona itiniyara.

5E totoka vakaoti na kena irairai, e serau na matana e na marau kei na loloma, e loma ga sa rise na yatena e na domobula.

6Ni sa sivi kece na katuba, sa lai tu sara e mata ni tui. E dabe toka e na idabedabe vakatui, vakaisulu e na isulu kece vakatui, ukutaki e na koula kei na vatu talei. Sa vakadomobula dina.

7Sa serau na matana, sa qai wadravi Esiteri e na cudru katakata. Sa turese na duru ni ranadi, sa vulaci na matana, sa rebo, qai ovaca yani na vada e liu tiko vua.

8Sa qai vakamalumalumutaka na Kalou na yalo ni tui, qai lade yani e na kidroa mai nona idabedabe, mokoti koya me yacova ni sa kilai yalona tale. E mani vakacegui koya e na vosa malua, a kaya,

9“Sa vakacava Esiteri? O yau na watimu. Kua ni leqa,

10o na sega ni mate, ni noda lawa qo e baleti ira ga na lewenivanua. Toro mai.”

11Sa qai laveta na matanakilagi koula, vakatauca e domo i Esiteri;

12sa mokoti koya, a kaya “Vosa mai.”

13Qai kaya vua o Esiteri, “Au raici kemuni saka, au nanuma de yagilosi ni Kalou, au sa domobulataka na kemuni lagilagi,

14ni tautani saka na kemuni irairai, na matamuni e vutuniloloma.”

15Ia ni se vosa tiko, sa rebo tale.

16Sa lomaleqa na tui. Era saga kece na nona tamata mera vakabulai Esiteri.

Ni bera nioni wilika na vakadewa e ra, ni wilika mada na Est 5.3–8.12. E talanoataki kina ni o Esiteri sa sureti rau vakarua o Asuerosi kei Amani i na kanavata sa vakarautaka. E na ikarua ni kanavata sa mani vakaraitaka vei Asuerosi na nona nakicataka na kawa vakaJiu o Amani. Sa lewa o Asuerosi me vakamatei sara o Amani. Sa qai kerei Asuerosi o Esiteri me boko na lewa e liu me baleti ira na Jiu, mera vakamatei ga na kedra meca.