Same 62 - Vakavakadewa Vou kei na iVola tale eso（FNVDC12）

1Au sa vakararavi duadua ga vua na Kalou;

Sa vu ga mai vua na noqu vakabulai.

2O koya duadua ga sa taqomaki au ka sa noqu i vakabula;

Sa dau taqomaki au o koya,

Au na sega sara ni vakadrukai rawa.

3A cava na kena dede mo ni ravuta tikoga kina e dua na tamata

Io, e dua ka nona kaukauwa e vaka ga na bai sa kabasu tu?

4O ni sa gadreva mo ni biuti koya sobu mai na nona dokai;

O ni sa dau taleitaka na lasu.

O ni sa dau vosataka na vosa ni veivakalougatataki,

Ia, o ni sa cudruvi koya ka rukaka ga ena lomamuni.

5Au sa vakararavi taudua ga vua na Kalou;

Au sa vakanuinui ga vua.

6Sa i koya taudua ga sa dau taqomaki au ka sa noqu i vakabula;

Sa viribaiti au o koya,

Ka'u sa na sega sara ni vakadrukai.

7Sa vakatautaki ga vua na Kalou

na noqu vakabulai kei na noqu dokai;

Sa i koya ga na noqu i sasabai kaukauwa;

O koya talega na noqu i drodro.

8Kemuni na noqu tamata, ni vakadinata na Kalou

ena veigauna taucoko sara.

Ni tukuna vua na nomuni leqa kecega,

ni sai koya ga na noda i drodro.

9Na tamata sa vaka ga e dua na i cegu cagi;

Sa ka tawayaga ga na tamata.

Biuti ira mada ena i vakarau, ka sa sega na kedra bibi;

Era sa mamada cake mai na i duabulu na i cegu.

10Kakua ni vakadinata na i valavala kaukauwa;

Kakua ni nuitaka mo rawata e dua na ka ena butako,

Veitalia sara ga kevaka e levu cake kina na nomu i yau,

Kakua sara ni vakararavi kina.

11Au sa rogoca vakavuqa ni sa kaya vakaoqo na Kalou

Ni sa nona ga na Kalou na kaukauwa,

12 Jope 34.11; Jere 17.10; Maciu 16.27; Roma 2.6; Vtaki 2.23 Ka sa vakakina na nona loloma tudei.

Oi kemuni ga, na Turaga, o ni sa sauma na tamata yadua

me vaka na i sau ni nona i valavala.