1Sa i koya oqo na veivosa sa kaya vei Lemueli na tui, o tinana,
2Sa i iko na luvequ tagane na i sau ni noqu masu. Na cava me'u tukuna vei iko?
3Kakua ni vakayagataka na nomu kaukauwa kei na nomu i lavo kece vei ira na yalewa; era sa vakarusa na tui eso.
4Rogoca sara Lemueli, sa sega ni kilikili me ra daugunu waini na tui se me ra dau gadreva me ra gunuva na waini kaukauwa.
5Ni ra sa gunu era na guilecava na lewa ka sega ni kauwaitaka na nodra dodonu na tamata kei na ka era gadreva.
6Solia na waini kaukauwa vei ira sa voleka ni rusa kei ira era sa loma bibi.
7Laiva me ra gunu me ra guilecava kina na nodra dravudravua kei na nodra rarawa ena nodra dodonu kece na vakaleqai.
8Mo vosa ena vukudra ka ra sega ni vosa rawa, ena nodra dodonu kece na vakaleqai.
9Mo vosa ena vukudra, ka mo turaganilewa yalododonu. Taqomaka na nodra dodonu na dravudravua kei ira era leqa tu.
Na Radinivale Vinaka10Sa dredre sara me da raica e dua na radinivale vinaka! Ni sai yau levu o koya ka i yau lailai na vatu talei.
11Sa solia taucoko na turaga watina vua na nona veivakabauti, ka sa sega vakadua kina ni dravudravua o watina.
12Sa caka vinaka ga vua na turaga watina, ka sega ni caka ca, ena veisiga kece sara ni nona bula.
13Sa vakasaqara na vutika ni sipi kei na i sulu lineni, ka sa makututaka na cakacaka ni ligana.
14Sa dau kauta vakayawa mai na kena kakana, me vaka era dau vakayacora na waqa ni veivoli.
15Sa dau yadra vakamataka ni se buto na vanua, ka sa vakarautaka na kedratou kakana ni matavuvale, kei na nodra i tavi na nona yalewa dauveiqaravi.
16Sa raica na vanua ka volia ena i lavo sa rawa, me loganivaini.
17Sa dau cakacaka kaukauwa, ka gugumatua o koya.
18Sa kila na yaga ni veika kece e cakava ka sa dau cakacaka tiko o koya me yacova sara na bogi levu.
19Sa vakaviviga ga na nona wa ni culacula ka talia ga o koya na nona i sulu.
20Sa yalovinaka vei ira na dravudravua kei ira na vakaloloma o koya.
21Sa sega ni taqaya ni sa tau na wai cevata baleta ni sa tu na nodratou i sulu ni katakata na nona lewe ni vale.
22Sa cakava ga na nona i tutuvi, ka daramaka na i sulu lokaloka vinaka sara.
23Sa kilai levu na watina tagane ka sa dua na lewe ni vanua nuitaki.
24Sa dautali i sulu o koya ka qai volitaka vei ira na volivoli.
25Sa qaqa ka dokai o koya ka sega ni rerevaka na gauna mai muri.
26Sa dau vosa ena yalovinaka kei na vuku.
27Sa dauogaoga tikoga ka qarava na leqa ni nodratou matavuvale.
28E ratou sa vakaraitaka vua na luvena na nodratou vakavinavinaka ka sa vakacaucautaki koya na watina tagane.
29Sa kaya na watina tagane, E levu na yalewa era radini vale vinaka, ia o sa uasivi duadua ga o iko.
30Na i tovo veitemaki ni yalewa e dau veivakacalai ka na takali na rairai vinaka, ia na yalewa sa rerevaka na Kalou ena vakacaucautaki.
31Vakacaucautaki koya ena vuku ni veika kece sa cakava. Sa dodonu me ra dokai koya na tamata kecega.
Who We AreWhat We EelieveWhat We Do
2025 by iamachristian.org,Inc All rights reserved.
