Vakarua 17 - Vakavakadewa Vou kei na iVola tale eso（FNVDC12）

1Mo ni kakua ni vakacabora vei Jiova na nomuni Kalou e dua na bulumakau, se sipi sa tuvaki vakaca na yagona, se tauvi mate, ka ni sa cata sara na ka oqo o Jiova na nomuni Kalou.

2De dua o ni rogoca ni eso na tagane se yalewa ena dua na nomuni koro, ni ra sai valavala ca vei Jiova, ka voroka na nona veiyalayalati,

3ni ra sa qarava ka cuva ki na veikalou tani, se ki na matanisiga, se na vula, se na kalokalo, se ki na dua tale na ka sa tu mai lomalagi ka'u sa vakatabuya.

8Ena so beka na cala e kau cake mai ka dredre mo ni vakatulewa kina; na cala beka me baleta na taukeni dodonu ni yau, yaya, vanua kei na veika vaka o ya, se na cala ni veivakamavoataki, se cala ni laba. Ni sa yaco na ka oqo, mo ni qai lako ki na vanua sa lesia o Jiova na nomuni Kalou me dau qaravi kina,

9ka tukuna vei ira na bete na luve i Livai kei koya na turaganilewa e vakailesilesi ena gauna oqori me ra vakataulewa kina.

10Era na vakatauca na nodra lewa, ia mo ni vakayacora vakavinaka sara na lewa era sa virikotora me baleti kemuni.

11Mo ni ciqoma na nodra lewa ka muria vinaka sara na nodra i vakasala.

12O koya ena sega ni muria na nona lewa na bete, se turaganilewa vakailesilesi ena gauna oqori, me vakamatei. Ena sala oqo o ni na vakawabokotaka kina na ca oqo mai vei kemuni na Isireli.

13Ni ra na rogoca na tamata na ka oqo era na qai rere ka na sega tale ni dua ena via muria na i valavala o ya.

Dusidusi Eso me Baleta na Tui

14Ena gauna o ni na la'ki tawana kina ka taukena na vanua ena solia vei kemuni o Jiova na nomuni Kalou o ni na qai vinakata me dua na nomuni tui me vakataki ira na veimatanitu era wavoliti kemuni.1Samu 8.5

15Ni qarauna vinaka na tamata o ni lesia, me sai koya sa digitaka o Jiova na nomuni Kalou. Me kakua ni dua na tamata vulagi me nomuni tui, ia me dua ga vei kemuni.

16Me kakua ni cakava na tui me levu tu na nona ose, ka me kakua talega ni tala eso na tamata i Ijipita me ra la'ki voli ose mai kina, baleta ni a sa tukuna oti o Jiova me ra kakua ni lesu tale i kea.1Tui 10.28; 2Vei 1.16; 9.28

17Me kakua ni levu na watina na tui, baleta ni oqo ena vagolei koya tani mai vei Jiova. Me kakua talega ni vakavutuniyautaki koya ena siliva kei na koula.1Tui 10.14-22,27; 11.1-8; 2Vei 1.15; 9.27

18Ena gauna sa na buli kina me tui, me dua na nona i lavelave ni vola ni lawa ni Kalou kei na i vakavuvuli me lavetaki mai na i vola era taura tu na bete kei na luve i Livai.

19Me sa tu ga vua na i vola oqo, ka me wilika tiko ena veisiga kecega ni nona bula. Me na vulica mai kina me rerevaka na Kalou ka muria ena yalodina na i vakaro kece sa koto kina.

20Na ka oqo ena tarovi koya kina me kakua ni nanuma ni uasivi cake o koya mai vei ira na wekana na Isireli ka me kakua ni talaidredre ki na dua na i vunau i Jiova. Ena qai veiliutaki kina o koya me vuqa na yabaki kei ira talega na nona kawa era na tui e Isireli ena veitabagauna e vuqa.