1 Вось імёны каленаў. Ад канца паўночнага ў бок шляху на Хэтлён, як ісьці да Хамату, да Хацар-Энону, на мяжы Дамаску, на поўначы ў бок Хамату, ад усходу да захаду, — частка Дана.
2 А пры мяжы Дана ад боку ўсходняга да боку заходняга — частка Асэра.
3 А пры мяжы Асэра ад боку ўсходняга да боку заходняга — частка Нэфталі.
4 А пры мяжы Нэфталі ад боку ўсходняга да боку заходняга — частка Манасы.
5 А пры мяжы Манасы ад боку ўсходняга да боку заходняга — частка Эфраіма.
6 А пры мяжы Эфраіма ад боку ўсходняга да боку заходняга — частка Рубэна.
7 А пры мяжы Рубэна ад боку ўсходняга да боку заходняга — частка Юды.
8 А пры мяжы Юды ад боку ўсходняга да боку заходняга будзе дар, які вы прынясеце, шырынёю ў дваццаць пяць тысячаў і даўжынёю як адна з частак ад боку ўсходняга да боку заходняга, і будзе сьвятыня на сярэдзіне яе.
9 Гэта дар, які вы прынясеце для ГОСПАДА, даўжынёю ў дваццаць пяць тысячаў і шырынёю ў дзесяць тысячаў.
10 І гэта будзе частка сьвятая для сьвятароў: на поўнач дваццаць пяць тысячаў, на захад дзесяць тысячаў, на ўсход дзесяць тысячаў, на поўдзень дваццаць пяць тысячаў, і будзе сьвятыня ГОСПАДА на сярэдзіне яе.
11 Для сьвятароў пасьвячоных з сыноў Цадока, якія пільнавалі служэньне Маё, якія не блукалі, калі блукалі сыны Ізраіля, як блукалі лявіты,
12 будзе частка са дару зямлі, як сьвятое сьвятых, побач з часткаю лявітаў.
13 А лявіты маюць побач з часткай сьвятароў, даўжынёю ў дваццаць пяць тысячаў і шырынёю ў дзесяць тысячаў, разам доўгая на дваццаць пяць тысячаў і шырокая на дзесяць тысячаў.
14 Ня будуць прадаваць з яе нічога, і ня будуць замяняць, і ніхто не забярэ што найлепшае з зямлі гэтай, бо яна сьвятая для ГОСПАДА.
15 А пяць тысячаў, якія яшчэ засталіся з шырыні ў дваццаць пяць тысячаў, будуць звычайныя, і будуць для гораду для засяленьня і на пашу, а горад будзе пасярэдзіне.
16 Вось памеры ягоныя: бок паўночны — чатыры тысячы пяцьсот; бок паўднёвы — чатыры тысячы пяцьсот, бок усходні — чатыры тысячы пяцьсот, бок заходні — чатыры тысячы пяцьсот.
17 І будзе паша для гораду: на поўнач — дзьвесьце пяцьдзясят, на поўдзень — дзьвесьце пяцьдзясят, на ўсход — дзьвесьце пяцьдзясят, на захад — дзьвесьце пяцьдзясят.
18 А тое, што засталося з даўжыні насупраць часткі сьвятой, дзесяць тысячаў на ўсход і дзесяць тысячаў на захад. І будзе яно каля часткі сьвятой, і ўраджай ягоны будзе на хлеб для работнікаў гораду.
19 Будуць яго апрацоўваць работнікі гораду, якія з усіх каленаў Ізраіля.
20 Уся частка будзе мець дваццаць пяць тысячаў на дваццаць пяць тысячаў; чатырохкутнік, прынесены як дар сьвяты з уласнасьці гораду.
21 А рэшта — для князя з аднаго і другога боку часткі сьвятой і ўласнасьці гораду, уздоўж тых дваццаці пяці тысячаў аж да мяжы ўсходняй, а на захадзе ўздоўж тых дваццаці пяці тысячаў аж да мяжы заходняй, насупраць частак каленаў, гэта для князя, і будзе частка сьвятая і сьвятыня пасярэдзіне.
22 Уласнасьць лявітаў і ўласнасьць гораду будзе пасярод таго, што належыць князю. Паміж мяжой Юды і мяжой Бэн’яміна будзе князя.
23 А рэшта каленаў: ад боку ўсходняга да боку заходняга — частка Бэн’яміна.
24 А пры мяжы Бэн’яміна ад боку ўсходняга да боку заходняга — частка Сымона.
25 А пры мяжы Сымона ад боку ўсходняга да боку заходняга — частка Ісахара.
26 А пры мяжы Ісахара ад боку ўсходняга да боку заходняга — частка Завулёна.
27 А пры мяжы Завулёна ад боку ўсходняга да боку заходняга — частка Гада.
28 А пры мяжы Гада з боку паўднёвага ў правы бок будзе мяжа ад Тамару да водаў Мэрывот-Кадэшу і ўздоўж ручая да Мора Вялікага.
29 Гэта зямля, якую падзеліце жэрабем як спадчыну паміж каленаў Ізраіля, і гэта часткі іхнія, кажа Госпад ГОСПАД.
30 І вось выхады з гораду. З боку паўночнага, які чатыры тысячы пяцьсот даўжыні,
31 брамы гораду паводле імёнаў каленаў Ізраіля. Тры брамы з боку паўночнага: адна брама Рубэна, адна брама Юды і адна брама Левія.
32 З боку ўсходняга, які чатыры тысячы пяцьсот, тры брамы: адна брама Язэпа, адна брама Бэн’яміна і адна брама Дана.
33 З боку паўднёвага, які чатыры тысячы пяцьсот, тры брамы: адна брама Сымона, адна брама Ісахара і адна брама Завулёна.
34 З боку заходняга, які чатыры тысячы пяцьсот, тры брамы: адна брама Гада, адна брама Асэра і адна брама Нэфталі.
35 Наўкола мае васямнаццаць тысячаў. А імя гораду будзе з таго дня: “ГОСПАД там!”»
Who We AreWhat We EelieveWhat We Do
2025 by iamachristian.org,Inc All rights reserved.
