ВЫХАД 22 - Б?бл?я (пераклад А.Бокуна)（BBB）

1 Калі хто ўкрадзе вала або ягня, і зарэжа яго або прадасьць яго, тады пяць валоў заплаціць за вала і чатыры авечкі — за ягня.

2 Калі пры падкопаваньні будзе знойдзены злодзей, і будзе біты, і памрэ, тады няма крыві за яго.

3 Калі ўзыйшло над ім сонца, будзе крыві за яго. Плацячы, мае заплаціць злодзей, а калі ня мае чым, няхай прададуць яго за ўкрадзенае ім.

4 Калі шукаючы, знойдуць украдзенае ў руцэ ягонай ад вала аж да асла і да ягняці, і яны жывыя, няхай заплаціць падвойна.

5 Калі хто спасьвіў поле або вінаграднік, і пусьціў статак свой, і пасьвіць на полі іншага, няхай заплаціць найлепшым з поля свайго і найлепшым з вінаградніку свайго.

6 Калі выйдзе агонь і ахопіць цярніну, і пажарэ снапы, або збожжа, або поле, тады плацячы, заплаціць той, хто запаліў агонь.

7 Калі хто дасьць бліжняму свайму срэбра альбо рэчы на захаваньне, і яны будуць украдзеныя з дому таго чалавека, калі будзе знойдзены злодзей, няхай заплаціць падвойна.

8 А калі ня будзе знойдзены злодзей, тады наблізіцца гаспадар дому да Бога, што ня выцягнуў рукі сваёй на ўласнасьць бліжняга свайго.

9 Пра ўсялякую рэч, няма згоды, пра вала, пра асла, пра авечку, пра плашч, пра ўсялякую згубу, пра якую скажа, што яна яго, справа абодвух мае прыйсьці да Бога. Каго прызнае вінным Бог, той заплаціць бліжняму свайму падвойна.

10 Калі хто дасьць бліжняму свайму асла, альбо вала, альбо ягня, альбо якую іншую скаціну на захаваньне, а яна здохне, або будзе скалечана, або ўзята ў палон, і ніхто гэтага ня бачыў,

11 тады прысяга перад ГОСПАДАМ няхай будзе між абодвума, што ня выцягнуў рукі сваёй на ўласнасьць бліжняга свайго; і прыйме гэтую гаспадар ейны, і ня будзе плаціць.

12 А калі, крадучы, украдуць у яго, тады заплаціць гаспадару ейнаму.

13 Калі разьдзіраючы, разьдзярэ яе, тады як сьведчаньне прынясе разьдзёртае, і ня будзе плаціць.

14 І калі хто пазычыць у бліжняга свайго, і яна будзе скалечана або здохне, а гаспадара ейнага не было пры ёй, тады, плацячы, заплаціць.

15 А калі гаспадар ейны быў пры ёй, тады ня будзе плаціць. Калі яна нанята была, тады атрымае цану найму.

16 Калі хто зьвядзе дзяўчыну, якая не заручаная, і будзе ляжаць з ёю, мае заплаціць вена і ўзяць яе сабе за жонку.

17 А калі бацька ейны, адмаўляючыся, адмовіцца выдаць яе за яго, няхай адважыць срэбра паводле вена дзяўчыны.

18 Варажбіткі не пакінеш пры жыцьці.

19 Кожны, хто ляжа са скацінаю, няхай сьмерцю памрэ.

20 Той, хто складае ахвяры багам, апрача адзінага ГОСПАДА, будзе аддадзены закляцьцю.

21 А прыхадня ня будзеш крыўдзіць, і ня будзеш уціскаць яго, бо вы самі былі прыхаднямі ў зямлі Эгіпецкай.

22 Ніякай удавы і сіраты ня будзеш прыгнятаць.

23 Калі ты, прыгнятаючы, будзеш прыгнятаць іх, тады яны крыкам будуць клікаць да Мяне, і Я слухаючы, выслухаю крык іхні,

24 і ўзгарыцца гнеў Мой, і Я заб’ю вас мячом, і будуць жонкі вашыя ўдовамі, і дзеці вашыя — сіротамі.

25 Калі пазычыш грошы з народу Майго, беднаму, які ў цябе, ня будзеш для яго як ліхвяр, не накладай на яго адсоткаў.

26 Калі, беручы ў заклад, возьмеш у заклад плашч бліжняга твайго, да заходу сонца зьвернеш яму,

27 бо гэта — адзінае накрыцьцё ў яго, якім накрываецца ён, гэта — адзеньне для скуры ягонай. На чым будзе ён спаць? І станецца, што ён будзе клікаць да Мяне, і Я пачую, бо Я — міласэрны.

28 Бога не праклінай, і начальніка ў народзе сваім не кляні.

29 Не марудзь са шчодрасьці твайго і тоўчні тваёй. Першароднага з сыноў тваіх аддасі Мне.

30 Гэтаксама зробіш з валом тваім і з авечкаю тваёй. Сем дзён няхай яны будуць пры матцы сваёй, а ў восьмы дзень аддасі іх Мне.

31 I вы будзеце сьвятымі людзьмі для Мяне; і мяса, разьдзёртага ў полі, ня ешце; сабакам кідайце яго.