1 І прамовіў ГОСПАД да Майсея, кажучы:
2 «Зрабі сабе дзьве трубы срэбныя, кутыя, і будуць яны склікаць усю грамаду, каб рыхтаваць табар.
3 І затрубяць, і зьбярэцца да цябе ўся грамада да ўваходу ў Намёт Спатканьня.
4 А калі ў адну затрубяць, зьбяруцца да цябе князі і начальнікі дружынаў Ізраіля.
5 Калі затрубіш працягла, выйдзе табар, які з усходняга боку.
6 Калі другі раз працягла затрубіш, выйдзе табар, які з паўднёвага боку. Знакам на вырушаньне табару будзе працяглае трубеньне.
7 На зьбіраньне царквы затрубіце, але не працягла.
8 Трубіць у трубы будуць сыны Аарона, сьвятары. Будзе гэта вам і нашчадкам вашым пастанова вечная.
9 Калі будзеш ісьці на вайну ў зямлі вашай супраць ворага, які наступае на вас, будзеце трубіць у трубы. Гэта будзе кліч ваш перад абліччам ГОСПАДА, Бога вашага, і Ён збавіць вас ад ворагаў вашых.
10 У дзень радасьці вашай, у сьвяты і ў маладзікі, пры вашых цэласпаленьнях і ахвярах мірных, будзеце трубіць у трубы; і яны будуць нагадваньнем перад абліччам Бога вашага пра вас. Я — ГОСПАД, Бог ваш!»
11 І сталася ў другі год, у другі месяц, у дваццаты месяца, паднялося воблака з-над Сялібы Сьведчаньня.
12 І вырушылі сыны Ізраіля ў дарогу сваю з пустыні Сынай, і спынілася воблака ў пустыні Паран.
13 Першы раз паводле з вуснаў ГОСПАДА, праз Майсея, вырушылі ў дарогу.
14 Першым вырушыў сьцяг табару сыноў Юды з дружынамі сваімі, а над дружынамі ягонымі Нахшон, сын Амінадава.
15 А над дружынамі пакаленьня сыноў Ісахара Натанаэль, сын Цуара.
16 А над дружынамі пакаленьня сыноў Завулёна Эліяў, сын Хэлёна.
17 І разабралі Сялібу, і вырушылі сыны Гершона і сыны Мэрары, несучы Сялібу.
18 І выйшаў сьцяг табару сыноў Рубэна з дружынамі сваімі, а над дружынамі ягонымі Эліцур, сын Шэдэура.
19 А над дружынамі пакаленьня сыноў Сымона Шэлюміэль, сын Цурышадая.
20 Над дружынамі пакаленьня сыноў Гада Эліясаф, сын Дэўэля.
21 І выйшлі сыны Кегата, несучы сьвятыя, і пакуль яны прыйшлі, Сяліба была ўжо пастаўлена.
22 І выйшаў сьцяг табару сыноў Эфраіма з дружынамі сваімі, а над дружынамі ягонымі Элішама, сын Амігуда.
23 А над дружынай пакаленьня сыноў Манасы Гамаліэль, сын Пэдагсура.
24 А над дружынамі пакаленьня сыноў Бэн’яміна Абідан, сын Гідэоні.
25 І выйшаў сьцяг табару сыноў Дана з дружынамі сваімі, а над дружынамі ягонымі Ахіезэр, сын Амішадая.
26 А над дружынамі пакаленьня сыноў Асэра Пагіэль, сын Акрана.
27 А над дружынамі сыноў Нэфталі Ахіра, сын Энана.
28 Вось такі быў паходу сыноў Ізраіля з дружынамі сваімі, калі выходзілі.
29 І сказаў Майсей Хававу, сыну Рэгуэля, Мадыянца, цесьця свайго: «Мы выходзім у месца, пра якое сказаў ГОСПАД: "Я дам вам". Хадзі з намі, і будзе табе добра, бо ГОСПАД абяцаў дабро Ізраілю».
30 Той сказаў яму: «Не пайду, але пайду ў зямлю маю і да сваякоў маіх».
31 І сказаў: «Не пакідай нас, бо ты ведаеш, як мы маем раскладацца табарам у пустыні, і будзеш для нас вачыма.
32 Калі пойдзеш з намі, тады калі будзе нешта добрае, што дасьць нам ГОСПАД, мы дамо табе».
33 І вырушылі яны з гары ГОСПАДА, і ішлі на працягу трох дзён. Каўчэг Запавету ГОСПАДА ішоў наперадзе іх на працягу трох дзён, каб знайсьці месца на табар.
34 І воблака ГОСПАДА над імі ўдзень, калі яны выходзілі з табару.
35 І было, калі вырушаў Каўчэг, Майсей казаў: «Паўстань, ГОСПАДЗЕ, і няхай разьбягуцца ворагі Твае, і няхай паўцякаюць тыя, што ненавідзяць Цябе, перад абліччам Тваім».
36 А калі ставілі, казаў: «Вярніся, ГОСПАДЗЕ, да шматлікага войска Ізраіля!»
Who We AreWhat We EelieveWhat We Do
2025 by iamachristian.org,Inc All rights reserved.
