ЭСТЭР 4 - Б?бл?я (пераклад А.Бокуна)（BBB）

1 А Мардэхай даведаўся пра ўсё, што зрабілася, і разьдзёр Мардэхай шаты свае, і апрануў на сябе зрэбніцу і попел; і выйшаў на сярэдзіну гораду, і крычаў крыкам вялікім і голасным.

2 І прыйшоў аж да брамы валадарскай, бо нельга было ўваходзіць у браму валадарскую ў зрэбніцы.

3 І ў кожнай акрузе і месцы, куды дайшло слова валадара і закон ягоны, была вялікая жалоба ў Юдэяў, і пост, і плач, і галашэньне; і зрэбніца і попел сталіся ложкам для мноства.

4 І прыйшлі дзяўчаты Эстэр і эўнухі ейныя, і паведамілі ёй, і вельмі захвалявалася валадарка, і паслала шаты, каб Мардэхай апрануў і зьняў з сябе зрэбніцу сваю, але ён не прыняў.

5 І паклікала Эстэр Гатаха, з эўнухаў валадара, якога ён прыставіў да яе, і загадала даведацца пра Мардэхая, што гэта і чаму гэта.

6 І пайшоў Гатах да Мардэхая на гарадзкую плошчу, якая перад брамай валадарскай.

7 І паведаміў яму Мардэхай пра ўсё, што адбылося з ім, і пра вызначаную срэбра, якое абяцаў Аман адважыць у скарбніцу валадарскую за Юдэяў, каб выгубіць іх.

8 І даў яму водпіс ліста закону, выдадзенага ў Шушане на вынішчэньне, каб паказаў Эстэр і паведаміў ёй, і загадаў ёй, каб яна пайшла да валадара маліць яго і прасіць яго за народ свой.

9 І прыйшоў Гатах, і паведаміў Эстэр словы Мардэхая.

10 І сказала Эстэр Гатаху, і загадала Мардэхаю:

11 «Усе слугі валадара і народ акругаў валадарскіх ведаюць, што для кожнага мужчыны і жанчыны, хто ўвойдзе да валадара на ўнутраны панадворак, калі яго ня клікалі, адзін закон — мае быць забіты. І толькі той, да каго выцягне валадар скіпетр свой залаты, будзе жыць. А мяне ня клікалі, каб прыйсьці да валадара, вось ужо трыццаць дзён».

12 І ён паведаміў Мардэхаю словы Эстэр.

13 І сказаў Мардэхай, каб адказалі Эстэр: «Ня думай у душы тваёй, што ты з усіх Юдэяў уцячэш у доме валадарскім.

14 Бо калі моўчкі прамаўчыш у гэты час, палёгка і выратаваньне прыйдзе для Юдэяў з іншага месца, а ты і дом бацькі твайго загінеце. І хто ведае, ці ня дзеля такога часу, як гэты, ты дасягнула валадарства?»

15 І сказала Эстэр, каб адказалі Мардэхаю:

16 «Ідзі, зьбяры ўсіх Юдэяў, якія знаходзяцца ў Шушане, і посьціце за мяне, і ня ешце і ня піце тры дні, ані ўдзень, ані ўначы; і я, і дзяўчаты мае будзем таксама посьціць, і тады я пайду да валадара, хоць гэта не паводле закону, і калі маю загінуць, дык загіну».

17 І адыйшоў Мардэхай, і зрабіў усё, як загадала яму Эстэр.