ІСАЯ 22 - Б?бл?я (пераклад А.Бокуна)（BBB）

1 Цяжар адносна даліны Відзежу. Што з табой, што ты ўвесь выйшаў на дахі?

2 Поўны галасу горад шумлівы, горад вясёлы. Забітыя твае ня ўпалі ад мяча і не пагінулі на вайне.

3 Правадыры твае ўсе разам уцяклі, зьвязаныя без лукаў, усе, знойдзеныя ў цябе, разам зьвязаныя, хоць далёка яны паўцякалі.

4 Дзеля таго я сказаў: «Адвярніцеся ад мяне, я буду горка плакаць. Не спрабуйце суцешыць мяне, бо зьнішчаная дачка народу майго».

5 Бо гэта дзень замяшаньня, стаптаньня і бязладзьдзя, Госпада, ГОСПАДА Магуцьцяў у даліне Відзежу, руйнаваньня муроў і крыку на гарах.

6 Элям узяў сагайдак, на калясьніцах людзі і на конях, Кір выцягнуў шчыт.

7 І сталася, што найпрыгажэйшыя палі твае напоўніліся калясьніцамі, і вершнікі, стаючы, сталі насупраць брамы.

8 І ўзьнялі заслону з Юды; і ты паглядзеў у той дзень на зброю ў доме кедровым.

9 І вы ўбачылі шчыліны гораду Давіда, як іх шмат, і сабралі ваду ў ніжняй сажалцы;

10 і пералічылі дамы ў Ерусаліме, і разбурылі будынкі, каб умацаваць мур,

11 і зрабілі зборнік вады між двума мурамі для вады са старой сажалкі; і не глядзелі на Таго, Хто зрабіў усё гэта, і Таго, Хто гэтае здаўна ўкшталтаваў, ня бачылі.

12 І Госпад, ГОСПАД Магуцьцяў, паклікаў вас у той дзень плакаць і галасіць, і абстрыгчы, і апрануцца ў зрэбніцу.

13 А вось, вясёласьць і радасьць, забіваюць валоў і рэжуць бараноў, ядуць мяса і п’юць віно: «Будзем есьці і піць, бо заўтра памром».

14 І адкрыў у вушы мае ГОСПАД Магуцьцяў: «Ня будзе адпушчана вам беззаконьне гэтае аж пакуль не памраце, кажа Госпад, ГОСПАД Магуцьцяў».

15 Так сказаў Госпад, ГОСПАД Магуцьцяў: «Ідзі, увайдзі да гэтага ўрадоўца, да Шэўны, які над домам,:

16 “Што ты тут, або хто ў цябе тут, што ты высек тут сабе магілу? Ты зрабіў высока магілу сабе і ў скале высьвідраваў пакой для сябе.

17 Вось, ГОСПАД кіне цябе, кідаючы моцна, і хапаючы, схопіць цябе,

18 і, скручваючы, скруціць цябе ў клубок, цябе рукою, як кулю, у зямлю прасторную. Там ты памрэш, і там калясьніцы славы тваёй, ты — ганьба для дому гаспадара твайго.

19 І Я выганю цябе з месца твайго, і скіну цябе з пасады тваёй.

20 І станецца ў той дзень, Я паклічу слугу Майго Эліякіма, сына Хількіі,

21 і апрану яго ў адзеньне тваё, і падперажу яго поясам тваім, і ўладу тваю перадам у рукі ягоныя, і будзе ён бацькам для жыхароў Ерусаліму і для дому Юды.

22 І Я палажу ключ дому Давіда на рамёны ягоныя, і калі ён адчыніць, ніхто не замкне, а калі замкне, ніхто не адчыніць.

23 І Я ўваб’ю яго, як калок, у месцы вызначаным; і будзе ён пасадам славы для дому бацькі свайго.

24 І будзе вісець на ім уся слава дому бацькі ягонага, парасткі і атожылкі, усё начыньне дробнае ад талерак да ўсялякіх збаноў.

25 У той дзень, кажа ГОСПАД Магуцьцяў, калок, убіты ў месцы вызначаным, пахісьнецца, і зломіцца, і ўпадзе, і ўвесь цяжар, які на ім вісеў, прападзе, бо ГОСПАД прамовіў”».