Revelashon 18 - Papiamentu Bible 2013(PB13)

Kaida di Bábel

1Despues mi a mira un otro angel baha for di shelu. E tabatin gran poder i su splendor tabata iluminá mundu.

2El a grita ku stèm fuerte:

‘El a kai! Bábel, e siudat grandi a kai.

El a bira un lugá di biba pa demoño,

un lugá di skonde pa tur sorto di mal spiritu,

un lugá di skonde pa tur sorto di para impuru,

un lugá di skonde pa tur sorto di bestia impuru i repugnante.

3Tur pueblo a bebe di e biña tèrko di su inmoralidat,

e reinan di mundu a kometé inmoralidat kuné,

i e komersiantenan di mundu a bira riku dor di su dekadensia sin límite.’

4E ora ei mi a tende un otro stèm for di shelu, ku a bisa:

‘Sali fo'i dje, mi pueblo!

Sino boso ta bira kómplise di su pikánan

i e plaganan ku ta bini riba dje, lo afektá boso tambe.

5Pasobra su pikánan a monta yega te na shelu

I Dios no a lubidá su maldatnan.

6Trat'é manera el a trata boso,

pag'é dòbel bèk di loke el a hasi ku boso.

Basha kos di bebe den su beker ku ta dòbel mas stèrki

ku loke el a duna boso pa bebe.

7Kous'é mes tantu doló i fèrdrit

ku e luho i dekadensia ku el a pèrmití su mes.

Pasobra e ta bisa den su mes:

“Mi ta sinta manera un reina riba mi trono!

Mi no ta biuda, mi no tin mester di bisti rou nunka.”

8P'esei tur plaga lo afekt'é un dia:

pèst, rou i mizeria di hamber.

Lo e kima den kandela,

pasobra Señor Dios ku ta husg'é, ta poderoso.’

9E reinan di mundu, su kompinchinan den inmoralidat i dekadensia, lo yor'é i ta tristu pa su motibu, ora nan mira huma di e kandela ku ta kim'é.

10Nan lo keda para na un distansia di miedu pa sufri su tortura huntu kuné i bisa:

‘Horibel, esta horibel!

Bábel, siudat grandi, siudat poderoso,

den un ora a dikta bo sentensia!’

11E komersiantenan di mundu tambe lo tene rou p'e, pasobra no tin ningun hende mas ku ta kumpra nan merkansia:

20Shelu, alegrá bo p'esei,

i boso tambe, hende ku ta pertenesé na Dios,

apòstel i profeta,

pasobra Dios a konden'é

pa tur loke el a hasi ku boso.’

21E ora ei un angel poderoso a kohe un piedra, mes grandi ku un piedra di mulina. El a benta esei den laman i bisa:

‘Asina, ku violensia,

lo basha, Bábel, e siudat grandi, abou

i lo no hañ'é nunka mas bèk.

22Lo no tende zonido di arpa,

kantamentu, flùit i tròmpèt,

mas den bo.

Lo no haña niun artesano mas den bo,

ni tende zonido di mulina mas den bo.

23Lus di lampi lo no bria mas den bo,

lo no tende stèm di brùit i brùidehòm mas den bo.

Pasobra bo komersiantenan tabata e hendenan importante riba mundu

i pa medio di bo bruheria a gaña tur pueblo.

24Bábel ta kulpabel na dramamentu di sanger

di e profetanan i di e hendenan ku ta pertenesé na Dios,

sí, di tur ku a keda asesiná na mundu.’