1Dios ta bai baha pisá riba Moab:
E anochi ku a destruí e siudat Ar,
Moab a peresé;
e anochi ku a destruí Kir,
Moab a peresé.
2Habitantenan di Dibon
ta subi bai nan tèmpel.
Nan ta subi seritunan di sakrifisio pa yora.
Moab ta basha gritu di yoramentu
pa Nebo i Medba;
tur hende ta pelá chinu,
tur barba ta feitá.
3Riba kaya tur hende ta bistí na rou;
riba dak- i plasanan nan ta grita malai
i awa ta basha fo'i nan wowo.
4Na Hèshbon i Elalé hende ta grita pidi ousilio,
por tende nan gritu te den Yahas.
P'esei asta sòldánan di Moab tambe ta grita,
nan kurason a kai.
5Mi kurason ta sklama pa Moab.
Hendenan ta hui bai te Soar
i te Eglat-Shelishia.
Na yoramentu nan ta subi kaminda pa Luhit.
Riba kaminda pa Horonaim
por tende e kehonan
pa motibu di e destrukshon.
6Oásis di Nimrim a bira un desierto,
yerba a seka;
no tin nada bèrdè mas,
matanan tur a disparsé.
7P'esei tur loke hende por a salba,
tur loke no a keda destruí
nan ta karga pasa Roi di Manzaliña kuné.
8Den henter Moab eko di e yoramentu ta resoná,
e lamento ta yega te na Eglaim i Beer-Elim.
9Na Dimon awa ta kòrá di sanger,
pero ainda SEÑOR ta manda mas mizeria pa e siudat:
E ta lòs leon manda riba e moabitanan ku a sobrebibí,
riba e sobrá hendenan di e pueblo.
Who We AreWhat We EelieveWhat We Do
2025 by iamachristian.org,Inc All rights reserved.