E kanto di tur kanto 7 - Papiamentu Bible 2013(PB13)

1Esta elegante bo pianan chikí ta lusi

den bo sandalia, prinsesita!

Kurva di bo hepnan parse hoya,

obra di un artista!

2Bo lombrishi ta bokal rondó.

No laga biña kaba nunka den dje!

Bo barika ta lombra manera un man di trigo,

rondoná di leli.

3Bo pechunan ta manera dos biná yòn,

manera ohoch'i gasela!

4Bo pal'i garganta parse toren di ivor,

bo wowonan ta pone mi kòrda e veivernan di Hèshbon,

band'i porta di Bat-Rabim.

Bo nanishi ta altu manera toren di Libanon,

ku bista riba Damasko.

5Bo kabes ta koroná bo kurpa

manera seru di Karmel,

bo kabeinan ta kabuya koló püs,

den bo krùlnan tin un rei changá!

6Amor, bo ta bunita, un enkanto,

e kos di mas presioso

ku hende por deseá.

7Bo figura ta delegá manera un palma,

ku pechu manera tròsh'i drùif.

8Un desishon m'a tuma:

Mi ke subi e palma

i gara su tròsh'i dadel!

Podisé bo pechunan ta manera tròsh'i drùif

i fragansia di bo aliento ta manera di apel fresku,

9bo boka mes sut ku e biña di mas delisioso…

10… biña ku ta kore basha mesora

den garganta di mi amor

i ta pone ku asta den soño e ta sigui murmurá.

11Ta di mi amor mi ta

i t'ami e ta anhelá.

12Ban, mi amor, ban pafó,

ban pasa anochi meimei di flor di hèna.

13Anto mainta trempan

nos lo drenta hòfi di wendrùif,

pa mira si e matanan ya a rama,

si tin kònòpi ku a habri kaba

i si palunan di granatapel n' ta floria ainda.

Ei lo mi entregá bo mi amor!

14Fruta di mandrágora ta plama su aroma,

fruta di mas delisioso ta na nos alkanse,

tantu di e aña akí komo di aña pasá:

tur m'a warda pa bo, mi amor.