Job 10 - Papiamentu Bible 2013(PB13)

Job ta akusá Dios di ta inhustu ku su kriaturanan

1Mi ta fadá di biba;

mi ta bai deshogá mi,

trese mi kehonan dilanti

i saka tur amargura ku mi alma ta sinti.

2Mi ta bai bisa Dios:

No kondená mi, Dios.

Bisa mi

di kon Bo ta akusá mi.

3Bo gusta oprimí mi?

Bo ta despresiá trabou di bo propio man,

tanten ku intriga di hende malbado sí Bo ta gosa?

4Akaso Bo ta mira kosnan manera hende ta mira nan?

Bo bista riba nan n' ta mas amplio ku di nos?

5Akaso bo bida ta mes kòrtiku ku di nos,

Bo ta mortal, manera nos, hende?

6Pakiko Bo ta rondia tur mi pikánan antó

i skrudiñá kada falta ku mi tin,

7ounke Bo sa ku mi no ta kulpabel

i ku niun hende no por libra mi di bo poder?

Job ta akusá Dios ku E ta vigilá Job pa destruyé

8Bo mannan mes a modelá i forma mi,

akaso e mes mannan ei

ku a hasi mi un obra asina presioso,

awor ke destruí mi?

9Kòrda ku Bo a modelá mi manera klei,

awor Bo ke hasi mi stòf atrobe?

10Bo a laga mi kurpa forma

manera ora lechi kuaha bira keshi;

11Bo a hinka mi den otro ku wesu i múskulo,

Bo a lora nan den karni i tapa nan ku kueru.

12Bo a duna mi bida i amor.

Mi tabata bou di bo protekshon.

13Sinembargo bo intenshon a keda skondí;

awor mi sa ki plan Bo tabatin:

14Bo tabata sinta vigilá ki ora mi ta peka,

pa Bo nenga mi bo pordon.

15Asina mi peka m'a kohe awa serka Bo,

pero te na ora mi hasi loke ta bon mes,

mi tin ku kana kabes abou.

Mi no ta solamente yená ku tristesa,

nò, mi ta hogá den aflikshon.

16Si mi hera kana kara na laria,

Bo ta yag riba mi manera leon;

i Bo ta asta hasi kosnan maravioso

djis pa tormentá mi.

17Bo ta keda ataká mi pa pone mi sufri

i bo rabia kontra mi ta krese kada be mas.

Bo ta manda problema pa mi manera sòldánan deskansá,

fresku pa bataya.

Job ta pidi Dios pa lag'é na pas, pasobra tòg e ta serka di muri

18Dios, pakiko Bo a laga mi nase?

Mihó m'a muri promé ku wowo di hende a mira mi,

19e ora ei lo mi no a eksistí nunka

i lo a saka mi fo'i den barika di mi mama, hiba graf.

20Mi bida n' ta basta kòrtiku kaba?

Laga mi na pas,

podisé e ora ei mi por tin un tiki alegria

21promé ku mi bai e lugá sin regreso,

e pais di tiniebla i sombra di morto,

22e pais ku skuridat profundo,

di abismo pretu i di káos,

kaminda asta klaridat ta skur.’