Salmo 116 - Papiamentu Bible 2013(PB13)

SALMO 116Danki, SEÑOR, B'a salba mi di morto

1Mi ta stima SEÑOR: E ta skucha

mi gritu di ousilio.

2El a paga mi atenshon, ta p'esei

mi t'invok'É henter mi bida.

3Ora morto a shorotá mi ku kabuya,

ansha di graf a drenta mi

i benout 'i doló a kohe mi,

4m'a invoká nòmber di SEÑOR:

‘SEÑOR, salba mi bida!’

5SEÑOR ta klemente i hustu,

E ta yen di kompashon.

6SEÑOR ta warda esnan ku ta sensio,

den berans El a salba mi.

7Awor mi por bolbe bira kalmu:

SEÑOR tabata bon pa mi.

8Sí, El a libra mi di morto,

El a seka mi wowo

i a mira pa mi no trompeká.

9Mi ta kana den presensia di SEÑOR

den tera di bibunan.

10Mi ta'tin fe, maske mi a bisa:

‘Mi kurason ta pisá.’

11Den mi desesperashon mi di:

‘Tur hende ta gaña.’

12Kon lo mi por paga SEÑOR

tur bondat k'El a hasi mi!

13Lo mi hisa e bokal di salbashon

i invoká SEÑOR su nòmber.

14Lo mi kumpli ku tur mi promesanan,

ku mi a hasi na SEÑOR,

ora henter su pueblo ta presente.

15Ta kosta SEÑOR hopi di mira

su amigunan muri.

16O SEÑOR, mi ke ta bo sirbidó;

bo sirbidó mi ta,

ami, e yu di bo sirbiente:

Bo a kibra mi buinan.

17Pa gradisí Bo, lo mi hasi un sakrifisio

i invoká SEÑOR su nòmber.

18Lo mi kumpli ku tur e promesanan

ku mi a hasi na SEÑOR,

ora henter su pueblo ta presente

19den plenchi di tèmpel di SEÑOR,

meimei di bo, Herusalèm.

Alabá sea SEÑOR!