Isaías 25 - Papiamentu Bible 2013(PB13)

Kantika di gradisimentu

1T'Abo, SEÑOR, ta mi Dios,

mi ke alsa Bo,

bo nòmber mi ke alabá,

pasobra bo obranan ta maravioso.

Bo ta keda fiel na desishonnan,

ku B'a tuma fo'i tempu bieu.

2Bo a kambia e siudat den monton di piedra,

e stat fortifiká B'a hasi ruina.

Fòrti di tiranonan strañero

no ta ni sombra mas di un siudat

i no ta lant'é nunka mas.

3E pueblo, un ten tan poderoso,

mester duna Bo homenahe;

e siudat dje tiranonan mester tembla pa Bo.

4Pa débilnan Bo tabata refugio,

sí, refugio pa tur den nesesidat:

un lugá di skonde yobida duru,

un sombra den kalor.

Maske furia dje tiranonan ta manera áwaseru

ku ta suta kant'i un muraya

5i manera kalor den desierto,

Bo ta silensiá nan rasmentu,

nan gritu di viktoria Bo ta plakia

manera nubia ta plakia kalor di solo.

Un komementu festivo pa tur pueblo

6Riba seru di Sion

SEÑOR soberano ta pone un komementu pa tur pueblo:

kuminda sabroso i biña ekskisito,

karni di mas fini,

biña ku añanan a hecha.

7Riba e seru akí

SEÑOR ta kibra e belo di rou ku ta tapa tur pueblo,

e mortaha ku ta kubri tur nashon.

8Señor Dios ta mata Lamuèrtè pa semper,

E ta seka lágrima na wowo di tur hende,

E ta kita e bèrgwensa ku su pueblo a pasa

den mundu henter.

T'esei SEÑOR mes a primintí.

9E dia ei hende lo bisa:

‘Bo n' ta mira?

T'asina ta nos Dios.

Den djE nos a pone nos konfiansa

i t'E a salba nos.

T'esaki ta e SEÑOR di nos konfiansa.

Awor nos por kanta yen di alegria,

pasobra El a trese salbashon pa nos.’

Dios ta regla kuenta ku Moab

10Man di SEÑOR ta riba seru di Sion,

ma MoabIsaías 15:1—16:14; Yeremías 48:1-47; Ezekiel 25:8-11; Amos 2:1-3; Sofonías 2:8-11 lo ta trapá bou di su pia,

manera sa trapa foya di pal'i maishi den mèst.

11Moab lo span brasa

manera un hende na punto di hoga,

pero SEÑOR lo kibra su orguyo

maske e trata di resistí ku astusia.

12Pa loke ta toka bo murayanan

altu i fortifiká, Moab,

SEÑOR lo basha nan abou,

flènster nan den stòf

i hasi nan pareu ku suela.