Predikador 12 - Papiamentu Bible 2013(PB13)

1I tene kuenta ku e Dios ku a krea bo, awor ku bo ta yòn.

Un dia dianan i añanan malu ta bini ku lo bo bisa:

‘Mi no por gosa mas di bida.’

2Tene kuenta ku Dios

promé ku solo bira skur,

luna i streanan bira skars di lus

i nubianan trese áwaseru.

3Ora esunnan ku ta tene warda na bo kas para tembla

i hendenan balente kana lomba doblá,

ora esunnan ku ta mula hariña stòp pasobra nan ta poko,

i esunnan ku ta wak dor di bentana mira skur;

4ora e portanan ku ta habri pa kaya ta será

i zonido di mulina baha, kaba na nada;

ora hende spièrta ku zonido di paranan,

anto tur stèm muri bai;

5ora hende tin miedu di altura i di peliger riba kaya;

ora palu di almendra floria i dalakochi lastra bai

i deseo no lanta mas.

E ora ei hende ta bai sosegá pa semper

i den kaya nan ta yora morto.

6Tene kuenta ku Dios ku a krea bo,

awor ku ainda e kordon di plata no a kibra

i e wea di oro no a kai kibra na pida pida;

awor ku e zjar na boka di pos no a kibra ainda

ni e katròl di e pos no a kibra.

7Bo kurpa ta kaba bira stòf, bai bèk den e tera for di kual el a sali;

i bo rosea di bida ta bai bèk serka Dios, ku a duna bo e.

8‘Sin sentido! Sin sentido!’ Predikador ta bisa.

‘Tur kos ta sin sentido!’

Tene rèspèt di Dios

9Predikador tabata un hende sabí, komo el a skucha proverbio, profundisá den nan i a presentá nan na un manera organisá, el a siña pueblo hopi kos.

10Predikador a buska palabranan ku ta zona agradabel pa esnan ku ta skucha i loke el a skibi tabata honesto i bèrdat.

11Palabra di hende sabí ta manera bion, i nan dichonan kolekshoná ta manera klabu, bon ankrá; ta ún wardadó di karné a duna nos nan.

12Mi yu, tene kuidou ku esnan ku ke duna bo mas riba loke bo a siña kaba. Por sigui skibi buki ketu bai i hopi estudio ta kansamentu di kurpa.

13Bo a tende tur kos i esaki ta e konklushon: tene rèspèt di Dios i kumpli ku su mandamentunan, ta esei ta importante.

14Pasobra Dios lo husga tur kos ku bo hasi, asta loke hende no por mira, sea ku ta algu bon òf algu malu.