Ezekiel 28 - Papiamentu Bible 2013(PB13)

Profesia kontra rei di Tiro

1SEÑOR a dirigí palabra na mi:

2‘Hende, bisa rei di Tiro: Esaki SEÑOR, mi Dios, ta bisa: Bo a haña mashá pretenshon i a bisa: “Mi ta un dios, mi ta sinta riba un trono dibino, meimei di laman.” Ounke ta hende bo ta i no un dios, bo a hinka den bo kabes ku bo ta un dios.

3Sierto, bo ta mas sabí ku Daniel: niun sekreto no ta keda skondí pa bo.

4Dor di bo sabiduria i konosementu bo a optené rikesanan i a kolekshoná oro i plata den bo kambernan di tesoro.

5Bo a sa di engrandesé bo rikesa dor di a usa bo kabes den maneho di negoshi. Pero e rikesa ei a pone bo haña pretenshon.’

6P'esei, SEÑOR, mi Dios, ta bisa lo siguiente: ‘Pasobra bo a hinka den bo kabes ku bo ta un dios,

7Mi ta manda pueblonan strañero riba bo, esunnan di mas kruel. Nan ta destruí loke bo a konstruí ku bo sabiduria grandi i kita bo bunitesa for di bo.

8Nan lo laga bo baha den graf; lo bo muri un morto violento meimei di laman.

9Ora bo para kara kara ku bo asesinonan, lo bo bisa e ora ei ainda: “Mi ta un dios”? Ora bo kai den nan man, lo bo eksperensiá ku no ta un dios bo ta, pero un hende.

10E pueblonan strañero lo laga bo muri un morto sin honor. Asina Mi a papia,’ SEÑOR, mi Dios, ta bisa.

Kantika di lamento riba rei di Tiro

11SEÑOR a dirigí palabra na mi:

12‘Hende, kanta un kantika di lamento riba rei di Tiro. Bis'é: Esaki ta loke SEÑOR, mi Dios, ta bisa:

Bo tabata modelo di perfekshon,

yen di sabiduria

i di bunitesa perfekto.

13Bo tabata den Eden, e hardin di Dios.

Bo pañanan tabata kubrí ku piedranan presioso:

rubí, topas, yaspes koló bèrdè,

turkesa, óniks, nefrit,

safiro, garnafein i esmeralda.

E prendanan ku bo tabatin bistí

tabata di oro;

dia a krea bo

nan tabata poné kla.

14Bo tabata un kerubin ku alanan habrí

ku mester a tene warda;

Mi a duna bo un lugá.

Bo tabata riba e seru sagrado di e diosnan,

aya bo tabata kana rònt

meimei di e piedranan lombrante.

15Bo komportashon tabata ireprochabel

for di dia ku a krea bo,

te ora bo a kuminsá hasi maldat.

16Bo aktividat komersial ekstenso

a hasi violensia un parti di bo bida

i pone bo hasi piká.

P'esei Mi a ekspulsá bo for di e seru di e diosnan;

abo, ku mester a tene warda,

Mi a kita

for di meimei di e piedranan lombrante.

17Esta orguyoso bo tabata di bo bunitesa!

Pero bo no a pèrdè solamente bo bunitesa,

bo sabiduria tambe a disparsé.

Mi a benta bo abou na suela,

reinan a wak bo ku despresio,

tumando hopi gustu.

18Dor di bo hopi maldatnan,

dor di bo negoshi deshonesto,

bo a profaná bo santuarionan.

P'esei Mi a laga un kandela lanta den bo

ku a kima bo kaba ku bo;

Mi a hasi di bo poko shinishi

dilanti di tur hende ku tabata para wak.

19Bo a laga tur pueblo

ku a konosé bo, keda babuká;

loke ta pasa ku bo ta hororoso,

bo a disparsé pa semper!’

Profesia kontra Sidon

20SEÑOR a dirigí palabra na mi:

21‘Hende, fiha bo bista riba e siudat SidonYoel 3:4-8; Zakarías 9:1-2; Mateo 11:21-22; Lukas 10:13-14 i profetisá kontra dje.

22Bisa: Esaki ta loke SEÑOR, mi Dios, ta bisa: Mi ta bai tuma medida kontra bo, Sidon! Asina lo Mi engrandesé mi gloria. Bo habitantenan lo rekonosé ku t'Ami ta SEÑOR, ora Mi kastigá nan i mustra nan ku t'Ami ta Esun santu.

23Mi ta manda pèst den siudat i sanger lo drama den su kayanan. Su enemigunan lo atak'é di tur banda i lo mata su habitantenan paden di su murayanan. E ora ei nan lo rekonosé ku t'Ami ta SEÑOR Dios.

24Den e pueblonan bisiña ku ta menospresiá pueblo di Israel, fo'i djawó lo no tin sumpiña mas ku ta keda hinka e pueblo ni kashá ku ta keda hasié doló. I e israelitanan lo rekonosé ku t'Ami ta SEÑOR Dios.’

25Esaki ta loke SEÑOR, mi Dios, ta bisa: ‘Ora Mi trese e pueblo di Israel huntu for di e paisnan kaminda Mi a plama nan, Mi ta demostrá e pueblonan dor di loke Mi ta hasi ku pueblo di Israel, ku t'Ami ta Esun santu. E israelitanan lo biba den e pais ku Mi a duna mi sirbidó Yakob.

26Nan lo biba seif den e pais, konstruí kas i planta hòfi di wendrùif. Nan lo biba seif ora Mi kaba di kastigá tur e pueblonan bisiña ku a trata Israel ku menospresio. E israelitanan lo rekonosé ku t'Ami, SEÑOR, ta nan Dios.’