Deuteronomio 34 - Papiamentu Bible 2013(PB13)

Morto di Moises

1For di vaye di Moab Moises a subi Nebo, un di e tòpnan di e serunan di Pisga, ku ta keda na altura di Yériko. Fo'i djei SEÑOR a lag'é mira henter e pais: e region di Guilead te Dan,

2henter e teritorio di Naftali, e teritorio di Efraim ku Manase, e teritorio di Huda te na Laman Mediteráneo,

3desierto di Neguèb i e region di Yordan na e siudat di palma Yériko te na Soar.

4SEÑOR a bis'é: ‘Esaki awor ta e pais di kua Mi a primintí Abraham,Génesis 12:7 IsakGénesis 26:3 i YakobGénesis 28:13 solemnemente: “Lo Mi duna boso desendientenan e pais akí.” Mi a laga bo mir'é ku bo mes wowo, pero lo bo no drent'é.’

5Aya na Moab, Moises, sirbidó di SEÑOR, a muri, manera SEÑOR a bisa.

6SEÑOR a der'é den un vaye na Moab enfrente di Bet-Peor. Te awe ningun hende no sa e lugá kaminda e ta derá.

7Moises tabatin 120 aña dia el a muri; su wowonan no a bira skur ni su forsa no a mengua.

8Den vaye di Moab e israelitanan a tene rou trinta dia largu pa Moises, te ora e tempu a pasa.

9Yozue, yu di Nun, tabata yená ku spiritu di sabiduria for di dia ku Moises a pone man riba su kabes. E israelitanan tabata obedes'é i hasi loke SEÑOR a ordená Moises.Numbernan 27:18,23; Yozue 1:16-18

10Nunka mas no a lanta un profeta na Israel manera Moises, ku a konosé SEÑOR kara kara.Éksodo 33:11; Numbernan 12:6-8; Deuteronomio 18:15-18; Sirag 45:1-5; Echonan 3:22-23

11Òf ku a hasi tur señal i milager, ku SEÑOR a mand'é hasi na Egipto kontra fárao, su funshonarionan i henter e pais.

12Òf ku a igual'é ku poder i ku kos grandi i impreshonante ku el a hasi pa henter Israel mira.