Numbernan 31 - Papiamentu Bible 2013(PB13)

Ekspedishon pa kastigá Midian

1SEÑOR a bisa Moises:

2‘Tuma vengansa pa e israelitanan riba e midianitanan; despues lo bo bai sosegá serka bo antepasadonan.’

3E ora ei Moises a bisa e pueblo: ‘Laga poko di boso hòmbernan prepará pa bai guera. Nan mester sali bai bringa kontra e midianitanan pa tuma vengansa riba nan den nòmber di SEÑOR.

4Manda for di kada tribu di Israel mil hòmber pa bai bringa.’

5Asina a skohe mil hòmber for di kada tribu, na total 12.000 hòmber bon itrein pa bataya.

6E ora ei Moises a laga nan ranka sali, mil di kada tribu, huntu ku Pinhas, yu hòmber di saserdote Eleazar. Pinhas tabata karga e ophetonan sagrado i e tròmpètnan pa duna señal.

7Nan a ataká e midianitanan, manera SEÑOR a ordená Moises, mata tur hende hòmber.

8Den nan tabatin e sinku reinan di Midian: Ewi, Rèkèm, Shur, Hur i Reba. Tambe nan a mata Bileam, yu hòmber di Beor.

9E israelitanan a kohe e muhé midianitanan i e muchanan prezu, i a bai ku tur baka, karné i sobrá propiedat komo botin.

10Nan a pega tur siudat i tur kampamentu di e midianitanan na kandela.

11Nan a bai ku tur botin, ku tur bestia i ku tur prezu

12i a hiba nan pa Moises, pa saserdote Eleazar i pa e komunidat di e israelitanan den kampamentu den vaye di Moab, kantu di riu di Yordan pegá ku Yériko.

13Moises, saserdote Eleazar i tur hefe di e komunidat a bai topa nan pafó di kampamentu.

14Moises a bira furioso riba e hefenan di mil i di shen, ku tabata e komandantenan di e ehérsito, ku tabata bini bèk for di bataya.

15El a bisa: ‘Kiko, boso a laga tur e muhénan keda na bida?

16Ta nèt nan, riba konseho di Bileam, tabata e kousa, ku e israelitanan a bira lomba pa SEÑOR na Peor,Numbernan 25:1-9; Revelashon 2:14 di manera ku un plaga a kastigá e pueblo di SEÑOR.

17Ban mira, mata tur hóben hòmber; mata tambe tur hende muhé ku a tene relashon ku hende hòmber.

18Pero tur mucha muhé ku ta señorita ainda, boso mag laga na bida pa boso mes.

19Keda shete dia pafó di kampamentu i tur hende ku a mata un hende òf ku a mishi ku un hende ku a muri den guera, mester purifiká nan mes riba e di tres i e di shete dia; esei ta konta pa boso mes i pa e señoritanan ku boso tin prezu.

20Purifiká tambe tur paña i tur kos trahá di kueru, di lana di kabritu i di palu.’

21Saserdote Eleazar a bisa e hòmbernan ku a partisipá na e bataya: ‘Esaki e lei ku SEÑOR a duna Moises ta preskribí:

22-23Purifiká oro i plata, bròns, heru, staña i chumbu, tur loke no por kima, promé ku kandela i despues ku awa di purifikashon i purifiká tur loke por kima, solamente ku awa di purifikashon.

24Laba boso paña riba e di shete dia akí, pa boso bira puru. Kaba boso por drenta kampamentu atrobe.’

Partimentu di e botin for di Midian

25SEÑOR a bisa Moises:

26‘Konta abo huntu ku Eleazar i e otro hefenan kuantu hende i kuantu bestia boso a kita for di e midianitanan.

27Duna esnan ku a partisipá na e bataya mitar di e botin i sobrá di e komunidat e otro mitar.

28Tuma for di e hòmbernan ku a partisipá na e bataya un kontribushon pa SEÑOR; tuma di kada sinku shen: un hende, un baka, un buriku i un karné.

29Kita esei for di nan parti i duna saserdote Eleazar e komo kontribushon pa SEÑOR.

30Kita for di e parti di e sobrá israelitanan tantu for di hende komo for di baka, buriku i karné, for di tur bestia, ún di kada sinkuenta i duna e levitanan ku ta sirbi den e tènt sagrado di SEÑOR.’

31Moises ku saserdote Eleazar a hasi loke SEÑOR a ordená Moises.

32-35Lo siguiente a sobra di e botin ku e sòldánan a hòrta bai kuné: 675.000 karné i kabritu, 72.000 baka, 61.000 buriku i 32.000 mucha muhé ku tabata señorita ainda.

36-40Mitar di nan, pa e parti di e hòmbernan ku a partisipá na e bataya, tabata: 337.500 karné i kabritu, di kua 675 tabata e kontribushon pa SEÑOR; 36.000 baka, di kua 72 tabata e kontribushon pa SEÑOR; 30.500 buriku di kua 61 tabata e kontribushon pa SEÑOR; 16.000 mucha muhé di kua 32 tabata e kontribushon pa SEÑOR.

41Moises, a duna saserdote Eleazar e kontribushon pa SEÑOR, manera SEÑOR a ordená Moises.

42-46E otro mitar, ku tabata destiná pa e israelitanan ku Moises no a laga partisipá na e bataya, e parti pa sobrá di e komunidat, tabata tambe: 337.500 karné i kabritu; 36.000 baka, 30.500 buriku i 16.000 mucha muhé.

47For di e mitar pa e israelitanan Moises a kita ún for di kada sinkuenta, tantu for di hende komo for di bestia, i a duna e levitanan ku ta sirbi n'e tènt sagrado di SEÑOR, manera SEÑOR a ordená Moises.

48E komandantenan di e departamentonan di ehérsito, e hefenan di mil i shen, a bini serka Moises

49i bisa: ‘Bo sirbidónan a konta e hòmbernan ku tabata bou di nos komando i no falta niun di nan.

50P'esei nos ta ofresé SEÑOR e ophetonan di oro ku nos a kohe bai kuné komo ofrenda: kadena di pia, armbant, renchi ku seyo, renchi di orea i kadena, pa nan drecha tur kos entre nos i SEÑOR.’

51Moises ku Eleazar a tuma tur e prendanan di oro ei.

52E oro ku nan a risibí for di e hefenan komo kontribushon pa SEÑOR, tabata pisa en total kasi dosshen kilo.

53Tabata asina ku e sòldánan a kohe kos bai kuné pa nan mes tambe.

54Moises i saserdote Eleazar a tuma e oro for di e hefenan di mil i di shen i hib'é tènt di enkuentro, pa SEÑOR kòrda riba e israelitanan.